Eclesiastés 1 - Q'eqchi Bible

Maak'a' rajb'al chixjunil li wank sa' ruuchich'och'

¹ A'an a'in raatin laj Ch'olob'anel, li ralal laj David, ki'awab'ejink sa' xb'eeneb' laj Jerusalén.

² Li qayu'am maak'a' na'ok wi' -chan laj Ch'olob'anel-; jo'ch'inal jo'nimal wank sa' ruuchich'och', a'an maak'a' xyaalal ut maak'a' rajb'al!

³ K'aru naqara chirix li tawasij ib' ut li naqayal wi' qaq'e sa' li ruuchich'och' a'in?

⁴ Wan yookeb' chi yo'laak anaqwan, ut wan yookeb' chi kamk, ab'an li ruuchich'och' wank chi junelik.

⁵ Eq'la na'elk chaq li saq'e ut ewu na'ok wi' chik; naxik sa' junpaat sa' li xna'aj re naq taa'elq wi' chik wulaj.

⁶ Wan naq li iq' na'apunk sa' xjayal xsak'leb' iq', ut wan naq na'apunk chik sa' releb'l iq'. Naxsutis rib' li iq', ut naxik wi' chik sa' li na'ajej x'apunk wi' xb'enwa.

⁷ Chixjunileb' li nima' neke'xik sa' palaw, ut neke'sutq'iik wi' chik sa' li xyo'leb'aaleb' re xik wi' chik sa' li palaw; ab'an li palaw maajaruj nanujak.

⁸ Jwal ch'a'aj xch'olob'ankil naq ink'a' nak'ojlaak li qach'ool xb'aan chixjunil a'an. Maajun natawaak chi ilok, maajun natawaak chi ab'ink!

⁹ Li k'aru xk'ulmank junxil, taak'ulmanq wi' chik; li k'aru xb'aanumank najter, taa'uxq wi' chik. Maak'a' k'aru toj ak' sa' ruuchich'och'!

¹⁰ Wi wank junaq naxye: “A'in relik chi yaal naq toj ak'”, ab'an li k'aru nayeemank naq ak', ak wank ajwi' chaq junxil chiqu laa'o.

¹¹ Ink'a' jultik qe jo'nimal xk'ulmank junxil, chi moko eb' li poyanam chalkeb' re te'jultiko'q reheb' li k'aru xqab'aanu laa'o.

Maak'a' na'ok wi' xsik'b'al naab'al li qana'leb'

¹² Laa'in laj Ch'olob'anel xinwank cho'q awab'ej re Israel aran Jerusalén.

¹³ Rik'in li na'leb' k'eeb'il we xink'e inch'ool chi xpatz'inkil ut xtz'ilinkil rix jo'nimal nak'ulmank sa' ruuchich'och'. Ut xintaw ru a'in: q'axal aal li iiq a'in xk'e li Yos sa' qab'een re tqapaqo!

¹⁴ Xink'e reetal naq chixjunil li nak'ulmank sa' ruuchich'och', a'an maak'a' rajb'al ut chanchan li chapok iq'.

¹⁵ Li yokos ink'a' chik naru xtiikob'resinkil, ut li namajelo'k ink'a' naru rajlankil.

¹⁶ Toja' naq xinye sa' inch'ool: “Wank inna'leb', ut cham naxik wi'; jwal nim inna'leb' chiruheb' chixjunil li xe'awab'ejink arin Jerusalén xb'enwa chiwu. Q'axal xintaw inna'leb' jo'wi' xseeb'al ink'a'uxl.

¹⁷ Xink'e inch'ool re xnawb'al b'ar wank li choxahil na'leb' ut li xseeb'al k'a'uxl, jo'wi' li memil ut li jipil, ut xintaw ru naq a'in ajwi' chanchan li chapok iq'”, chankin sa' inch'ool.

¹⁸ Xb'aan naq ani naxsik' naab'al li xna'leb', nawank ajwi' naab'al li xch'a'ajkilal; ani numtajenaq xseeb'al li xk'a'uxl, numtajenaq ajwi' li xrahilal.