Deuteronomio 34 - Q'eqchi Bible

Li xkamik laj Moisés

¹ Laj Moisés ki'elk sa' xtaq'ahil Mohab ut kitaqe'k sa' xb'een li tzuul Nebo, sa' xb'een Piská, sa' xka'yab'aal Jerikó, ut li Qaawa' kixk'ut chiru chixjunil li ch'och': chalen wan wi' Galahad toj sa' li ch'och' reheb' laj Dan,

² chixjunil li ch'och' reheb' laj Neftalí, reheb' laj Efraín ut eb' laj Manasés, chixjunil li ch'och' reheb' laj Judá toj wan wi' li palaw sa' rokeb'l saq'e;

³ kixk'ut Nejeb ut li xtaq'ahil Jerikó, a' li xTenamitul li kala', toj Sohar.

⁴ Ut li Qaawa' kixye re laj Moisés: “A'an a'in li ch'och' li kinyeechi'i sa' jurament re laj Abrahán, laj Isahak ut laj Jakob, naq kinye: A'eb' laawalal aak'ajol tink'e wi'. Xink'e chawil rik'in aawu, ab'anan ink'a' tat-ok chisa'”, chan li Yos.

⁵ Aran kikamk laj Moisés, laj k'anjel chiru li Qaawa', sa' li tenamit Mohab, jo' chanru k'uub'k'u chaq xb'aan li Qaawa'.

⁶ Ut kimuqe'k sa' Ru Taq'a, sa' li na'ajej Mohab, sa' xka'yab'aal Bet-Pehor. Maa'ani nanawok re b'ar wank li xmuqleb'aal chalen toj anaqwan.

⁷ Laj Moisés waqk'aal chihab' wank re naq kikamk; toj saqenk na'ilok ut toj kaw rib' chi us naq kixk'uula rib'.

⁸ Lajeeb' xka'k'aal kutan ke'xyaab'a rix li xkamik laj Moisés eb' laj Israel, sa' xtaq'ahil Mohab, toj reetal kiraqe'k li xkutankil li rahil ch'oolejil.

⁹ Nujenaq chi chaab'il k'a'uxl laj Josué, ralal laj Nun, xb'aan naq laj Moisés kixk'e li ruq' sa' xb'een. Jo'kan naq eb' laj Israel ke'ab'ink chiru ut ke'xb'aanu li kitaqlaak wi' laj Moisés xb'aan li Qaawa'.

¹⁰ Ab'anan arin Israel maajun chik propeet kiwakliik chaq jo' laj Moisés: li Qaawa' ut laj Moisés neke'xka'ya rib' naq neke'aatinak.

¹¹ Maajun chik kib'aanunk re chixjunileb' li sachb'ach'oolej li kitaqlaak wi' laj Moisés xb'aan li Qaawa' sa' li tenamit Ejiipt, sa' xb'een laj Parahón jo'wi' sa' xb'eeneb' laj k'anjel chiru ut chixjunil li xtenamit.

¹² Maajun chik wanjenaq rik'in xnimal xwankil jo' laj Moisés, chi xb'aanunkil xninqal eetalil chiru chixjunileb' laj Israel.