Deuteronomio 31 - Q'eqchi Bible

VI. LI XKAMIK LAJ MOISÉS (31-34) Laj Josué kikanaak cho'q reeqaj laj Moisés

¹ Laj Moisés ki'aatinak wi' chik rik'in chixjunileb' laj Israel ut kixye reheb':

² “Waqk'aal (120) chihab' wank we anaqwan. Maak'a' chik inmetz'ew. Li Qaawa' ak xyehom we: «Laa'at ink'a' tatnume'q junpak'al li nima' Jordán», chan.

³ A' li Qaawa' laaYos, a'an li taak'amoq b'e cheru naq texnume'q junpak'al li nima'. A'an taasachoq reheb' li tenamit a'an cheru ut taarisiheb' sa' li xna'ajeb'. Laj Josué, a'an li taajolominq eere, jo' chanru xyehom li Qaawa'.

⁴ Li Qaawa' tixb'aanu reheb' li tenamit a'an jo' kixb'aanu re laj Sijón ut laj Og, awab'ej re Amor, jo'wi' reheb' li xtenamiteb' li ke'sache'k.

⁵ Li Qaawa' tixq'axtesiheb' sa' eeruq' ut laa'ex tento teeb'aanu reheb' jo' tz'aqal taqlanb'ilex wi' inb'aan.

⁶ Kawaq eerib' ut chiwanq xkawub' eech'ool! Mexxiwak ut mexsiksotk chiruheb', xb'aan naq a' li Qaawa' laaYos nab'eresink eere ut ink'a' texxkanab' eejunes”, chan laj Moisés.

⁷ Chirix chik a'an laj Moisés kixb'oq laj Josué ut kixye re chiruheb' chixjunil laj Israel: “Kawaq aach'ool ut matxiwak! Laa'at tat-ok, aawochb'eeneb' li tenamit a'in, sa' li ch'och' kixyeechi'i xk'eeb'al li Qaawa' reheb' leena' leeyuwa', ut laa'at taaq'axtesi reheb' re naq te'ok chisa'.

⁸ Li Qaawa' aj k'amolb'ehaq chawu; a'anaq aawochb'een. Moko tatxkanab' ta aajunes. Matxiwak b'i' ut mich'inank aach'ool”, chan laj Moisés.

⁹ Laj Moisés kixtz'iib'a li Chaq'rab' a'in ut kixq'axtesi reheb' laj tij, ralal xk'ajoleb' laj Leví, li neke'k'amok re li xLoq'laj Kaaxil li xSumwank li Qaawa'; kixk'e ajwi' reheb' chixjunileb' li xcheekel winqilal laj Israel.

¹⁰ Ut laj Moisés kixchaq'rab'iheb' chi jo'ka'in: “Rajlal wuqub' chihab', sa' xchihab'il li sachok k'as, sa' xNinq'eheb' li Muheb'aal,

¹¹ naq chixjunileb' laj Israel te'xch'utub' rib' chiru li Qaawa' laaYos sa' li na'ajej sik'b'il ru xb'aan, taayaab'asi li Chaq'rab' a'in chiruheb' chixjunil laj Israel.

¹² Taach'utub'eb' li tenamit, winq, ixq ut kok'al; jo'kan ajwi' laj ab'l tenamit li wankeb' sa' eeyanq, re naq te'rab'i ut te'xtzol roxloq'inkil li Qaawa' leeYos ut te'xk'e xch'ool chi xk'anjelankil ru chixjunileb' li raatinul li Chaq'rab' a'in.

¹³ Chi jo'kan eb' leeralal eek'ajol li toj maji' neke'xnaw ru, te'rab'i ut te'xtzol roxloq'inkil li Qaawa' leeYos jo' najtil te'wanq sa' li ch'och' toxeereechani junpak'al li nima' Jordán”, chan laj Moisés.

¹⁴ Chirix chik a'an li Qaawa' kixye re laj Moisés: “K'e reetal, li xkutankil laakamik nach' chik wank. B'oq chaq laj Josué ut wulaqex sa' li Loq'laj Muheb'aal, re naq tinye re li k'aru tento tixb'aanu”, chan. Koheb' laj Moisés ut laj Josué, ut ke'wulak sa' li Loq'laj Muheb'aal.

¹⁵ Ut li Qaawa' kixk'ut rib' aran, sa' jun li choql xaqxo sa' xb'een rokeb'aal li Loq'laj Muheb'aal.

¹⁶ Toja' naq li Qaawa' kixye re laj Moisés: “K'e reetal, chi seeb' tatq'ajq tatsutq'iiq rik'ineb' laana' laayuwa', ut li tenamit a'in te'xtikib' xmuxb'al rib' rik'ineb' li jalanil yos, xyoseb' li ch'och' toxe'okaq wi'. Tine'xkanab' ut te'xq'et li Sumwank kinb'aanu rik'ineb'.

¹⁷ Ab'an laa'in tinjosq'o'q rik'ineb', teb'inkanab' xjuneseb' ut tinmuq li wu chiruheb'. K'ajo' li rahilal ut ch'a'ajkilal taachalq sa' xb'eeneb'! Sa' li kutan a'an te'xye: «Ma ink'a' tab'i' yooko chi xk'ulb'al eb' li rahilal a'in xb'aan naq maak'a' chik li qaYos qik'in?», cha'qeb'.

¹⁸ Ab'anan laa'in tinmuq li wu sa' li kutan a'an xb'aan chixjunil li maa'usilal xe'xb'aanu naq xkoheb' chirixeb' li jalanil yos.

¹⁹ “Ut anaqwan tz'iib'ahomaq li b'ich a'in; chek'ut chiruheb' laj Israel, chek'eheb' chi xb'ichankil re naq li b'ich a'in tixch'olob' naq ink'a' us ke'xb'aanu eb' laj Israel.

²⁰ Naq akaq xe'woksi sa' li xq'emal ch'och' kinyeechi'i reheb' li xna' xyuwa'eb', naq akaq xe'wa'ak ut xe'nujak ut xe'ninqank xtib'eleb', te'xik chirixeb' li jalanil yos, te'xloq'oni ruheb' ut laa'in tine'xtz'eqtaana ut te'xq'et linSumwank.

²¹ Ab'anan naq toxe'tawe'q xb'aan li k'iila rahilal ut ch'a'ajkilal, li b'ich a'in tixch'olob' xyaalal li xmaakeb', xb'aan naq ink'a' taasachq sa' xch'ooleb' li ralal xk'ajol ut taab'ichamanq chi junelik. Ninnaw chi us k'aru yookeb' chi xk'uub'ankil anaqwan, toj chi rub'eetal naq te'woksi sa' li ch'och' inyeechi'om reheb'”, chan.

²² Sa' ajwi' li kutan a'an laj Moisés kixtz'iib'a li b'ich a'in ut kixk'ut chiruheb' laj Israel.

²³ Chirix chik a'an kixchaq'rab'i laj Josué, ralal laj Nun, chi jo'ka'in: “Kawaq aach'ool ut matxiwak xb'aan naq laa'at tatk'amoq reheb' laj Israel sa' li ch'och' inyeechi'om reheb', ut laa'in wanqin aawik'in”, chan.

²⁴ Naq kiraqe'k laj Moisés chi xtz'iib'ankil sa' jun li tasb'il hu li raatinul li chaq'rab' a'in,

²⁵ kixye reheb' laj Leví, li neke'k'amok xKaaxil li xSumwank li Qaawa':

²⁶ “K'amomaq li hu a'in tz'iib'anb'il wi' li Chaq'rab' ut k'ehomaq chi xk'atq li xKaaxil li xSumwank li Qaawa' leeYos. Aran taakanaaq chi xch'olob'ankil xyaalal leemaak.

²⁷ Xb'aan naq ninnaw chi us naq q'etq'etex ut kaw leejolom. A' wachik anaqwan, naq toj wankin sa' eeyanq, q'etq'etex chiru li Qaawa', ma toja' ta chik naq tinkamq!

²⁸ Ch'utub'omaq chiwu chixjunileb' li xcheekelal li kab'laju chi teep jo'wi' eb' laj nawonel chaq'rab', xb'aan naq ok we chi xq'axtesinkil reheb' li aatin a'in. Kutan saqenk chiru li choxach'och' naq rahilal te'xk'ul wi te'xq'etq'eti rib'eb'.

²⁹ Ninnaw naq akaq xinkamk chik, taapo'q leena'leb'; teekanab' li b'e xink'ut cheru ut naab'al li rahilal taachalq sa' eeb'een sa'eb' li kutan chaalel, xb'aan teeb'aanu li ink'a' us chiru li Qaawa' ut teechiq' xjosq'il rik'in leeyib' aj b'aanuhom”, chan laj Moisés.

³⁰ Toja' naq laj Moisés kixye li b'ich a'in chiru chixjunileb' laj Israel ch'utch'uukeb' aran. Kixye reheb' chalen sa' xtiklajik toj sa' xraqik: