Deuteronomio 30 - Q'eqchi Bible

Li xsutq'ijikeb' chaq laj Israel

¹ “Naq taak'ul chixjunil laawosob'tesinkil ut laatz'eqtaanankil li xinye aawe, wi taatz'il rix sa' laach'ool sa' xyanqeb' chixjunil li tenamit b'arwi' xatxcha'cha'i li Qaawa' laaYos,

² wi tatsutq'iiq chaq rik'in li Qaawa' laaYos ut taapaab' chi anchal aach'ool ut chi anchal aawaanm, laa'at ut eb' laawalal aak'ajol, jo' chanru yookin chi xyeeb'al aawe anaqwan,

³ toja' naq li Qaawa' laaYos tatrosob'tesi wi' chik, taaril xtoq'ob'aal aawu, tatrisi chaq sa' chixjunileb' li tenamit xatxcha'cha'i wi' ut tatxch'utub' wi' chik.

⁴ Us ta cha'cha'inb'ilex toj sa' xmaril li ruuchich'och', aran ajwi' tolexxok li Qaawa' leeYos ut taachalq chesik'b'al.

⁵ Tatxk'am wi' chik sa' li xch'och'eb' laana' laayuwa' re naq aawehaq ajwi' laa'at li na'ajej a'an. Tixk'e xnimal xsahil aach'ool ut q'axal chik tatxnaab'alob'resi chiruheb' laaxe'toon.

⁶ Li Qaawa' laaYos tixk'e reetalil li Sumwank sa' laach'ool ut sa' xch'ooleb' laawalal aak'ajol, re naq taara li Qaawa' laaYos chi anchal aach'ool ut chi anchal aawaanm ut wanq aayu'am chi junelik.

⁷ Li Qaawa' laaYos tixtaqla chixjunil li rahilal a'in sa' xb'eeneb' li xik' neke'ilok aawe ut sa' xb'eeneb' li neke'rahob'tesink aawe.

⁸ Laa'at tatsutq'iiq chaq rik'in li Qaawa' laaYos, taapaab' ut taak'anjela ru chixjunil li xchaq'rab' li yookin chi xyeeb'al aawe sa' li kutan a'in.

⁹ Toja' naq li Qaawa' laaYos tatrosob'tesi re naq us tat-elq sa' chixjunil laak'anjel; tixnaab'alob'resi eb' laawalal aak'ajol, laaketomq ut laawawimq. Xb'aan naq jun sut chik taaraj li Qaawa' rilb'al xsahil aach'ool, kama' naq kisaho'k xch'ool chi rusilankileb' laana' laayuwa',

¹⁰ wi relik chi yaal taawab'i li xyaab' xkux li Qaawa' laaYos, wi taapaab' li xchaq'rab' ut li xtaqlahom tz'iib'anb'il sa' li Hu a'in, ut tatsutq'iiq rik'in li Qaawa' laaYos, chi anchal aach'ool ut chi anchal aawaanm.

¹¹ “Li chaq'rab' nakatintaqla wi' anaqwan moko ch'a'aj ta xpaab'ankil chi moko najt wank aawik'in.

¹² Moko sa' choxa ta wan chaq, ut ink'a' naru taaye: «Ani taataqe'q sa' choxa sa' qak'ab'a' laa'o, re naq tixk'am chaq ut taaqab'i ut taaqak'anjela ru?».

¹³ Chi moko wank ta chaq toj junpak'al li palaw, re naq taaye: «Ani qe taaxik junpak'al li palaw, re naq tixk'am chaq ut tqab'i ut tqak'anjela ru?».

¹⁴ Li aatin nach' wank aawik'in, wank sa' xtz'uumal aawe ut sa' laach'ool, re naq taak'anjela ru.

Li wiib' chi b'e

¹⁵ “K'e reetal, anaqwan tink'e chawu li yu'am ut li usilal, li kamk ut li maa'usilal.

¹⁶ Wi taapaab' li nakatintaqla wi' anaqwan, wi taara li Qaawa' laaYos ut taataaqe li xb'e, wi taak'anjela ru li xchaq'rab' jo'wi' li xtaqlahom ut eb' li raatin, wanq aayu'am ut textamq; ut li Qaawa' laaYos tatrosob'tesi sa' li ch'och' toxaaweechani.

¹⁷ Ab'anan wi taajal aak'a'uxl ut ink'a' tat-ab'inq, wi taapaab' xwiq'ib'ankil aawib' chiruheb' jalanil yos ut taaloq'oniheb' ru,

¹⁸ relik chi yaal ninye aawe anaqwan naq tatkamq ut ink'a' chik najt tatwanq sa' li ch'och' toxaaweechani junpak'al li nima' Jordán.

¹⁹ Sa' li kutan a'in ninye aawe chiru li choxa ut li ruuchich'och': xinyeechi'i aawe yu'am ut kamk, osob'tesiik ut majewaak. Sik' ru li yu'am re naq yo'yooqat laa'at jo'wi' eb' laawalal aak'ajol.

²⁰ Chara li Qaawa' laaYos, chawab'i li xyaab' xkux ut chapchooqat rik'in, xb'aan naq aran wank laayu'am. Chi jo'kan taanajto'q roq laayu'am sa' li ch'och' kixyeechi'i li Qaawa' reheb' laaxe'toonil yuwa', laj Abrahán, laj Isahak ut laj Jakob”, chan laj Moisés.