Deuteronomio 3 - Q'eqchi Bible

Kiq'axe'k ru laj Og

¹ “Chirix chik a'an koosutq'iik chaq ut kootaqe'k sa' xb'ehil Basán. Laj Og, awab'ej re Basán, ki'elk chaq chi qak'ulb'al rochb'een chixjunileb' li xpoyanam, ut aran Edreí kooyalok rik'ineb'.

² “Toja' naq li Qaawa' kixye we: «Maaxiwa ru, xb'aan naq xinq'axtesi sa' laawuq' rochb'een chixjunileb' li xpoyanam ut li xna'aj. Taab'aanu rik'in jo' xab'aanu chaq re laj Sijón, awab'ej re Amor, li xwank aran Jesbón», chan.

³ “Jo'ka'in naq li Qaawa' li qaYos kixq'axtesi sa' quq' laj Og, awab'ej re Basán, rochb'een chixjunil li xtenamit. Kiqaq'ax ruheb' toj reetal maajun kikanaak chi yo'yo.

⁴ Toja' naq kiqeechani chixjunileb' li xtenamit: maajun tenamit ink'a' ta kiqachap. Oxk'aaleb' chi tenamit kiqeechani, chixjunil li xteepal Argob, sa' li x'awab'ejihom laj Og aran Basán.

⁵ Chixjunileb' a'an junes xninqal tenamit, najt xteram li xsuttz'akeb', kaw tz'apinkeb' rik'in ch'iich' li rokeb'aaleb', chi ink'a' k'eeb'ileb' sa' ajl li xtenamiteb' laj Perés li k'ajo' xk'ihaleb'.

⁶ Kiqateneb' kamk sa' xb'eeneb' jo' kiqab'aanu rik'in laj Sijón, awab'ej re Jesbón; kiqaq'axtesi chi oso'k chixjunileb' li tenamit: jo' winq, ixq ut kok'al.

⁷ Ab'anan kiqak'uula cho'q qeechanihom chixjunil li ketomq ut li k'a'aq ru kiqataw sa'eb' li tenamit.

⁸ “Jo'ka'in naq kiqachap li xch'och'eb' li wiib' chi awab'ej re Amor, a' li na'ajej li wank junpak'al li nima' Jordán, chalen chaq chire li nima' Arnón toj sa' li tzuul Hermón.

⁹ (Eb' laj Sidón Sirión neke'xye re li tzuul Hermón, ut eb' laj Amor Senir neke'xye re.)

¹⁰ Chixjunileb' li tenamit li wankeb' chiru tzuul, chixjunil Galahad ut chixjunil Basán toj Salká ut Edreí, tenamiteb' li wankeb' chaq rub'el x'awab'ejihom laj Og aran Basán.

¹¹ (Laj Og, awab'ej re Basán, a'an chaq rosob'leb' li ke'kanaak chi yo'yo sa' xyanqeb' laj Refait. Aran Rabá, tenamit re Amón, natawmank li xch'aat ch'iich', wan rox moqoj li roq ut numenaq jun moqoj li ru, jo' li xb'isleb' a'an.)

Kijek'iik li ch'och'

¹² “Kiqeechani li tenamit a'in: chalen chaq Aroher, li wank chire li nima' Arnón, li xyiijachileb' li tzuul Galahad rochb'eeneb' li xtenamitul laa'in kink'e reheb' laj Rubén ut reheb' laj Gad.

¹³ Li rela'eb' laj Galahad, chixjunil Basán li kiwank rub'el x'awab'ejihom laj Og, ut chixjunil li na'ajej re Argob kinq'axtesi re li xyiijachil xteepal laj Manasés. (Chixjunil li tenamit a'in re Basán, xtenamiteb' laj Refait nayeemank re.

¹⁴ Laj Yaír, ralal laj Manasés, a'an li kikanaak wi' chixjunil li na'ajej re Argob, toj sa' xnub'ajleb' laj Jesur ut eb' laj Mahaká; a'an li kik'ehok re Basán li k'ab'a'ej li nayeemank toj sa' li kutan a'in: Xk'aleb'aaleb' laj Yaír.)

¹⁵ Laj Makir kink'e wi' Galahad.

¹⁶ Reheb' laj Rubén ut eb' laj Gad kinq'axtesi xna'ajeb' chalen chaq Galahad toj wan wi' li nima' Arnón (li xyi li nima' a'an li nub'ajl), ut toj sa' li nima' Yabok, sa' xnub'ajleb' laj Amón.

¹⁷ Eb' li nima' Arabá ut Jordán wankeb' chaq cho'q nub'ajl chalen Kinéret toj wan wi' li palaw re Arabá (a'an li Atz'aminb'il Palaw), li wank chi xtoon li tzuul Piská, sa' xjayal releb'l saq'e.

Ramro chiru laj Moisés nume'k junpak'al li nima' Jordán

¹⁸ “Toja' naq laa'in kinye eere: «Li Qaawa' leeYos xk'ehok chereechani li ch'och' a'in. Chejunilex laa'ex li kawil winqex texnume'q chiruheb' leeras eeriitz'in aj Israel chi wanq eech'iich'.

¹⁹ Ka'ajeb' wi' leerixaqil, eb' leeralal eek'ajol ut eb' leeketomq (xb'aan naq ninnaw naq wank naab'al eeketomq) te'kanaaq sa'eb' li tenamit ink'ehom eere,

²⁰ toja' yaal re li Qaawa' xk'eeb'al junaq eena'aj b'arwi' texhilanq laa'ex ut eb' leeras eeriitz'in. Naq eb' a'an ajwi' ak xe'reechani li na'ajej li xk'ehom li Qaawa' leeYos junpak'al li nima' Jordán, toja' naq chejunjunqal texsutq'iiq chaq sa' leena'aj ink'ehom eere», chankin.

²¹ “Kink'e ajwi' li chaq'rab' a'in re laj Josué: «Xawil rik'in laawu li k'aru xb'aanu li Qaawa' leeYos rik'ineb' li wiib' chi awab'ej a'in. Jo'kan ajwi' tixb'aanu li Qaawa' rik'in chixjunileb' li awab'ejihom b'arwi' toxatnume'q.

²² Maaxiwaheb' ru, xb'aan naq a' ajwi' li Qaawa' leeYos taayaloq sa' eek'ab'a'», chankin.

²³ “Toja' naq kintz'aamank kin'elajink chiru li Qaawa' chi jo'ka'in:

²⁴ «At Qaawa', at inYos, laa'at xatikib' xk'utb'al chiru laj k'anjel chawu laanimal aawankilal ut li xkawilal laawuq'. Ani ta chik chi Yosil wank sa' choxa malaj sa' ruuchich'och' li taaruhanq xb'aanunkil xninqal b'aanuhom ut sachb'ach'oolej jo' nakab'aanu laa'at?

²⁵ B'aanu usilal, kanab'in chi nume'k re rilb'al li chaab'il ch'och' li wank junpak'al li nima' Jordán, li chaab'il tzuul a'an jo' ajwi' Líbano», chankin.

²⁶ Ab'anan, eemaak laa'ex naq kijosq'o'k wik'in li Qaawa' ut ink'a' kiraj wab'inkil; kixye b'an chik we: «Tz'aqalaq li xaye! Minaawaatina chik chirix a'in.

²⁷ Taqen sa' xb'een li tzuul Piská, taqsi laawu sa' rokeb'l saq'e, sa' releb'l iq', sa' rokeb'l iq' ut sa' releb'l saq'e. Taawil li na'ajej, xb'aan naq ink'a' toxaaq'ax li nima' Jordán.

²⁸ K'e xchaq'rab'inkil laj Josué, ch'olob' chiru ut k'e xkawub' li xch'ool, xb'aan naq a' chik a'an taak'amoq xb'e li tenamit a'in: a'an li taak'ehoq chireechani li ch'och' a'in li yookat chi rilb'al», chan li Qaawa'.

²⁹ “Ut kookanaak chiru li taq'a, chi xjayal li na'ajej Bet-Pehor.