Deuteronomio 29 - Q'eqchi Bible

V. LI ROX XSEERAQ' LAJ MOISÉS (29-30) Li xSumwank li Yos rik'ineb' laj Israel aran Mohab

¹ A'aneb' a'in li aatin chirix li Sumwank li kitaqlaak wi' laj Moisés xb'aan li Qaawa' chi xk'ojob'ankil rik'ineb' laj Israel sa' li na'ajej Mohab. A'an a'in li xkomon li Sumwank kixk'ojob' rik'ineb' a'an, sa' li tzuul Horeb.

² Laj Moisés kixb'oqeb' ut kixch'utub'eb' chixjunileb' laj Israel, ut kixye reheb' chi jo'ka'in: “Laa'ex ak keril chixjunil li kixb'aanu li Qaawa' aran Ejiipt re laj Parahón, reheb' laj k'anjel chiru ut reheb' chixjunil li xtenamit.

³ Laa'ex keril rik'in eeru li xninqal yalb'a ix, li xninqal eetalil ut sachb'ach'oolej li kixb'aanu chaq li Qaawa'.

⁴ Ab'anan toj chiru li kutan a'in, li Qaawa' toj maji' kexk'e chi xtawb'al ru ut chi xnawb'al xyaalalil chixjunil a'in.

⁵ Chiru ka'k'aal chihab' kexink'e chi b'eek sa' li chaqich'och', toj maji' na'oso'k leetiqib'ankil wan chaq cherix ut toj maji' ajwi' na'oso'k leeperxaab' cheroq.

⁶ Ink'a' kexwa'ak wa chi moko kex'uk'ak b'iin malaj k'ahil ha', re naq teenaw naq laa'in li Qaawa', laa'in leeYos.

⁷ “Ut naq kook'ulunk sa' li na'ajej a'in, laj Sijón, awab'ej re Jesbón, ut laj Og, awab'ej re Basán, ke'chalk chi yalok qik'in, ab'anan laa'o kiqaq'ax ruheb'.

⁸ Kiqeechani li xtenamiteb' ut laa'in kink'e chi reechanihomeb' laj Rubén, laj Gad ut jun xyiijacheb' xteepal laj Manasés.

⁹ Chepaab' b'i' chi tz'aqal re ru chixjunileb' li raatinul li Sumwank a'in ut chek'anjela ru, re naq us wanqex sa' chixjunil leek'anjel.

¹⁰ “Arin wankex sa' li kutan a'in, xaqxookex chejunilex chiru li Qaawa' leeYos: eb' li xjolomil li kab'laju chi teep, eb' leecheekelal, eb' leenawonel chaq'rab' ut chixjunileb' laj Israel,

¹¹ eerochb'eeneb' leeralal eek'ajol, leerixaqil ut eb' laj ab'l tenamit li wankeb' sa' eeyanq (jo'eb' laj si'inel ut laj b'eelahom ha').

¹² Wankex arin chejunilex re xk'ojob'ankil sa' jurament jun li Sumwank rik'in li Qaawa' leeYos sa' li kutan a'in,

¹³ re naq A'an texxaqab' anaqwan cho'q xtenamit: laa'exaq li xtenamit ut A'anaq leeYos, kama' xyehom aawe ut kama' ajwi' xyehom reheb' leexe'toonil yuwa' laj Abrahán, laj Isahak ut laj Jakob.

¹⁴ Ut moko ka'aj ta wi' eerik'in laa'ex tixb'aanu li Sumwank ut li jurament a'in anaqwan,

¹⁵ tixb'aanu aj b'an wi' rik'ineb' li maak'a'eb' qik'in sa' li kutan a'in.

¹⁶ Xb'aan naq laa'ex nekenaw chanru koowank chaq Ejiipt ut chanru koonume'k chaq sa'eb' li tenamit kiqataw sa' li qab'e.

¹⁷ Ak eerilom li tz'i'b'eetalil maa'usilal ut eb' li xyoseb' yiib'anb'il rik'in che', pek, rik'in plaat ut oor, li wankeb' sa' xyanqeb'.

¹⁸ Miwank sa' eeyanq winq malaj ixq, junkab'al malaj teep, li tixkanab' li Qaawa' leeYos ut tixloq'oni ru li xyoseb' li tenamit a'an. Miwank sa' eeyanq xtoonal li k'ahil pim li wank xmay nakamsink.

¹⁹ “Wi ani sa' eeyanq taarab'i li teneb'anb'il sa' qab'een sa' xk'ab'a' li jurament a'in ut ink'a' tixk'e xwankil, tixye b'an sa' xch'ool xjunes rib': «Laa'in us tin'elq sa' chixjunil, us ta tinb'aanu jo' naxye linjipilal», xmaak li winq a'an te'sache'q chixjunileb'.

²⁰ Li Qaawa' moko taaraj ta xkuyb'al li xmaak, taajosq'o'q b'an ut taaraho'q xch'ool chirix li winq a'an; chixjunil li rahilal tz'iib'anb'il sa' li hu a'in taanaq sa' xb'een li winq a'an ut li Qaawa' tixsach li xk'ab'a' chi junajwa yalaq b'ar sa' ruuchich'och'.

²¹ Li Qaawa' taarisi sa' xyanqeb' chixjunil li xteepal laj Israel, re xrahob'tesinkil jo' naxye li Sumwank ut tz'iib'anb'il ajwi' sa' li xhuhil li Chaq'rab' a'in.

²² Eb' li toj te'yo'laaq, a'eb' leeralal eek'ajol li te'chalq cherix laa'ex, jo' ajwi' eb' li jalan xtenamiteb' chalenaqeb' chaq chi najt, naq te'ril li xninqal rahilal ut yajel taarahob'tesiiq wi' li na'ajej a'in xb'aan li Qaawa', te'xjap re chi xyeeb'al:

²³ «Junes asuupr ut atz'am wank chik aran, ut li ch'och' k'atalkaq aj chik ru: a'an a'in chixjunil leena'aj. Ink'a' chik taaruuq awk arin, maak'a' taamoq chiru, chi moko li pim taak'iiq sa' li na'ajej a'in, kama' li rahilal kixk'ul Sodoom ut Gomoor, Admá ut Seboín naq ke'sache'k ru xb'aan xnimal xjosq'il li Qaawa'», cha'qeb'.

²⁴ “Toja' naq chixjunileb' li poyanam te'patz'oq: «K'a'ut naq jo'kan kixb'aanu li Qaawa' rik'in li ch'och' a'an? K'a'ut naq kichalk li xnimal xjosq'il li Qaawa'?», cha'qeb'.

²⁵ Ut taayeemanq reheb': «Xb'aan naq ke'xq'et li Sumwank kixb'aanu li Qaawa', a' li xYos eb' li xxe'toonil yuwa'eb', naq kirisiheb' chaq sa' li tenamit Ejiipt.

²⁶ Koheb' chi xk'anjelankil ru eb' li jalanil yos ut ke'xwiq'ib' rib' chiruheb': a'eb' li yos ink'a' xnawomeb' ru ut ink'a' k'eeb'ileb' reheb' xb'aan li Qaawa'.

²⁷ Jo'kan naq kilochk li xjosq'il li Qaawa' rik'in li tenamit a'in ut kichalk chaq sa' xb'een chixjunil li majewaak ut li tz'eqtaanaak tz'iib'anb'il sa' li hu a'in.

²⁸ Li Qaawa' ki'isink chaq reheb' sa' li xna'ajeb' rik'in xnimal xjosq'il ut kixtaqlaheb' sa' jalan chik tenamit, b'arwi' wankeb' anaqwan», cha'qeb'.

²⁹ “Wank li na'leb' li ink'a' k'utb'esinb'il chiqu xb'aan li Qaawa' li qaYos, ut ka'ajwi' A'an nanawok re; ab'an li k'aru k'utb'esinb'il chiqu, a'an qe laa'o ut reheb' li qalal qak'ajol chi junelik, re naq tqak'anjela ru chixjunil li raatinul li Chaq'rab' a'in.