Deuteronomio 28 - Q'eqchi Bible

Li osob'tesiik ut li majewaak yeechi'inb'il xb'aan li Qaawa'

¹ “Wi relik chi yaal naq laa'at taapaab' xyaab' xkux li Qaawa' laaYos ut taak'anjela ru chi chaab'il chixjunil li chaq'rab' ok we chi xyeeb'al aawe sa' li kutan a'in, li Qaawa' laaYos tixterq'usi laawankil sa' xb'een chixjunileb' li tenamit li wankeb' sa' ruuchich'och',

² ut te'chalq sa' aab'een ut tulate'xtaw chixjunileb' li rosob'tesihom li Yos, sa' xk'ab'a' rab'inkil xyaab' xkux li Qaawa' laaYos.

³ Osob'tesinb'ilaqat sa' li tenamit ut osob'tesinb'ilaqat sa' li k'aleb'aal.

⁴ Osob'tesinb'ilaq laawalal jo' ajwi' li taaruuchini laach'och' ut eb' li ral laaketomq, li ral laawakax ut li ral laakarneer.

⁵ Osob'tesinb'ilaq laachakach ut laak'uuleb'aal.

⁶ Osob'tesinb'ilaqat naq tat-ok ut osob'tesinb'ilaqat naq tat-elq.

⁷ “Naq eb' li xik' neke'ilok aawe te'wakliiq chaq sa' aab'een, li Qaawa' tixsacheb' ru: sa' jun ruq'b'e te'elq chaq chak'ulb'al, ut sa' wuqub' chik ruq'b'e te'eleliq chawu.

⁸ “Li Qaawa' tixtaqla chaq li rosob'tesihom aawik'in, sa' xb'eeneb' laak'uuleb'aal ixim ut sa'atqeb' chixjunil li k'anjel taab'aanu, ut tatrosob'tesi sa' li ch'och' tixk'e aawe li Qaawa' laaYos.

⁹ “Li Qaawa' tatxxaqab' cho'q loq'laj tenamit, kama' xyehom aawe sa' jurament, wi taapaab' li xchaq'rab' li Qaawa' laaYos ut taataaqe li xb'e.

¹⁰ Toja' naq chixjunileb' li tenamit li wankatqeb' sa' ruuchich'och' te'ril naq sa' aab'een laa'at yaab'anb'il li xk'ab'a' li Qaawa', ut tate'xxiwa.

¹¹ Li Qaawa' tixk'e aawe li chaab'il eechej chi numtajenaq: tixk'e naab'al laawalal laak'ajol, jo'wi' laawakax ut laawawimq, chiru li ch'och' kixyeechi'i reheb' laana' laayuwa' chaweechani laa'at.

¹² Li Qaawa' tixte chawu li choxa b'arwi' k'uulanb'il li xb'ihomal, ut naq taawulaq xkutankil, tixk'e chaq li hab' sa' xb'een li ruuchich'och' re rosob'tesinkil chixjunil laak'anjel. Taak'eheb' xto' naab'al chi tenamit ut laa'at ink'a' tatpatz'oq to'.

¹³ Li Qaawa' tatxk'e chi uub'ej, moko tatxk'e ta chi ixb'ej. Junelik tatk'amoq b'e ut maajun wa k'amb'ilaq aab'e, wi nakapaab' li xchaq'rab' li Qaawa' laaYos rik'in xk'uulankil sa' aach'ool ut xk'anjelankil ru li yookin chi xyeeb'al aawe anaqwan,

¹⁴ wi ink'a' taajach aawib' rik'ineb' li aatin nakatintaqla wi' anaqwan, chi moko sa' aaseeb'al chi moko sa' aatz'e. Matxik chirixeb' li jalanil yos re xk'anjelankil ruheb'.

¹⁵ “Ab'anan wi ink'a' taawab'i xyaab' xkux li Qaawa' laaYos ut wi ink'a' taapaab' ut taak'anjela ru chixjunil li xchaq'rab' li yookin chi xyeeb'al aawe anaqwan, te'chalq sa' aab'een chi numtajenaq chixjunileb' li rahilal a'in:

¹⁶ Tz'eqtaananb'ilaqat sa' li tenamit ut tz'eqtaananb'ilaqat ajwi' sa' li k'aleb'aal.

¹⁷ Tz'eqtaananb'ilaq laachakach ut laak'uuleb'aal.

¹⁸ Tz'eqtaananb'ilaqeb' ajwi' laawalal aak'ajol ut li ru rawimq laach'och', eb' li ral laawakax ut eb' li ral laakarneer.

¹⁹ Tz'eqtaananb'ilaqat naq toxat-okaq ut tz'eqtaananb'ilaqat naq tat-elq chaq.

²⁰ “Li Qaawa' tixtaqla chaq sa' aab'een li ink'a' us, li juk'leek ut chixjunil li yot'ik ch'oolej sa' chixjunil laak'anjel toj reetal tat-oso'q ut tatkamq chi junpaat xb'aan li maa'usilal xab'aanu naq xinaakanab'.

²¹ Li Qaawa' tixtaqla chaq li raxkamk sa' aab'een toj reetal tatsache'q sa' li ch'och' toxat-okaq wi'.

²² Li Qaawa' tatxrahob'tesi rik'in jiq', tiq, sipook, sankil xox, chaqi'eel ut rik'in jun nimla yajel sa' xb'een laatriiw: chixjunileb' li rahilal a'in tate'xtaaqi toj reetal tat-oso'q.

²³ Sa' xb'een laajolom q'anch'iich'aq li choxa, ut li ch'och' chawub'el a'an raxch'iich'aq.

²⁴ Li Qaawa' tixhoy chaq pojtz' ut samahib' sa' xb'een laach'och' cho'q reeqaj li hab'; ut te'chalq sa' aab'een toj reetal tat-oso'q.

²⁵ Li Qaawa' tixk'e naq eb' li xik' neke'ilok aawe te'xq'ax aawu: sa' jun ruq'b'e toxaak'uleb' ut sa' wuqub' chik ruq'b'e tat-eleliq chiruheb', ut laa'at xiwajelaqat chiruheb' chixjunil li awab'ejilal sa' ruuchich'och'.

²⁶ Laatib'el a'anaqeb' xwa chixjunileb' li xik'anel xul neke'rupupik chiru choxa; xwahaqeb' ajwi' chixjunileb' li xul sa' ruuchich'och' chi maajun taaxib'enq reheb'.

²⁷ “Li Qaawa' tatxrahob'tesi rik'in xxoxel Ejiipt, rik'in saqijoj, rik'in tuuxn ut saqlep; ut chiruheb' li yajel a'in ink'a' tatk'iraaq.

²⁸ Li Qaawa' tatxrahob'tesi rik'in naq twaxinq aawu, tatmutz'irq ut taasachq aana'leb';

²⁹ tatb'eeq chi yal taamaayusi aj chik laab'e tuqtu wa'leb' re li kutan, kama' li mutz' yal naxmaayusi li xb'e sa' q'oqyink, ut moko tatwulaq ta b'arwi' xik taawaj. Wanqat chi yal k'uul aj chik aawu ut maq'b'ilaq chixjunil li k'aru aawe chiru chixjunil laayu'am, chi maajun taakoloq malaj taatenq'anq aawe.

³⁰ Tatsumlaaq rik'in junaq ixq ut jalan chik li winq taa'eechaninq re; taayiib' junaq ochoch ut ink'a' tatwanq chisa'; tat-awq, ab'anan ink'a' taayal xsahil ru laawawimq.

³¹ Sa' xnaq' ajwi' aawu taakamsiiq laab'ooyx ut maak'a' taatiw re a'an. Jo'kan ajwi' laab'uur taa'elq'aaq chawu laa'at ut ink'a' chik taaq'ajsiiq aawe; eb' laakarneer te'q'axtesimanq reheb' li xik' neke'ilok aawe ut maajun taatenq'anq aawe.

³² Eb' laawalal ut eb' laarab'in te'q'axtesiiq re jalan chik tenamit, ut taawil rik'in xnaq' aawu: wulaj wulaj taawaj raj rilb'aleb' wi' chik ru, ab'an maak'a' chik truuq taab'aanu.

³³ Li ru rawimq laach'och' ut chixjunil li aatawasihom wi' aawib', te'xtzeka jun tenamit li ink'a' nakanaw ruheb'. Tawasinb'ilaqat ut taqlanb'ilaqat chi kaw chiru chixjunil laayu'am,

³⁴ ut taakaano'q aawu chi rilb'al li yooq chi k'ulmank.

³⁵ Li Qaawa' tatxrahob'tesi rik'in xox li naxwa' li tib'elej, sa' xb'een aawaq ut chiru laawa', chalen xtiklaak chaq sa' laawoq toj sa' xsuutut laajolom, ut ink'a' tatk'iraaq.

³⁶ “Li Qaawa' tatxk'am laa'at ut laa'awab'ej sa' jun li tenamit b'arwi' laa'at chi moko laana' laayuwa' nanawok re, ut aran tatk'anjelaq chiruheb' jalanil yos, yiib'anb'ileb' rik'in che' ut pek.

³⁷ Ut chixjunileb' li tenamit te'sachq xch'ool chawilb'al; laa'ataq jun jaljookil aatin chiruheb' ut xse'eelaqeb' chixjunileb' li tenamit b'arwi' tatxk'am li Qaawa'.

³⁸ Naab'al li iyaj taawaw chaq sa' laak'aleb'aal ut b'a'b'ay ajwi' li ru taaxok, xb'aan naq laj saak' tixchoy chixjunil.

³⁹ Taawaw li uub' ut taak'anjela chi us, ab'an ink'a' taawuk' li b'iin ut maak'a' ajwi' taaxok, xb'aan naq li motzo' taasachoq re.

⁴⁰ Taawanq aa'oliiw sa' chixjunil laach'och', ab'an ink'a' taayul aawib' rik'in aseeyt, xb'aan naq taat'ane'q li ru.

⁴¹ Te'wanq aawalal ut aarab'in, ab'an moko aawehaqeb' ta, xb'aan naq te'xik chi preexil.

⁴² Chixjunileb' laaninqi che' ut li ru rawimq laach'och' ink'a' te'kanab'aaq xb'aaneb' li k'ams, li motzo' ut li teken.

⁴³ Laj ab'l tenamit li wank sa' eeyanq taanimanq xwankil sa' aab'een ut laa'at t'ane'k chik taab'aanu.

⁴⁴ A'an tixk'e aato' ut laa'at ink'a' taak'e xto' a'an; a'an wanq chi uub'ej ut laa'at toj chi ixb'ej.

⁴⁵ “Chixjunil li ink'a' us a'in taat'ane'q sa' aab'een, tatxtaaqi ut toxatxtaw toj reetal tat-oso'q, xb'aan naq ink'a' xawab'i xyaab' xkux li Qaawa' laaYos ut ink'a' xak'uula sa' laach'ool eb' li xchaq'rab' ut li xtaqlahom xyehom aawe A'an.

⁴⁶ A'anaq jun eetalil ut sachb'ach'oolej cho'q aawe ut cho'q reheb' laawalal aak'ajol jo'wi' laawi aamam chi junelik.

⁴⁷ Sa' xk'ab'a' naq ink'a' xatk'anjelak chiru li Qaawa' laaYos sa' xsahil aach'ool ut sa' xsahil aawaanm, naq wan chaq chixjunil k'aru aawe,

⁴⁸ tatk'anjelaq chiruheb' li xik' neke'ilok aawe, li tixtaqlaheb' li Qaawa' aawik'in. Tattz'okaaq ut taachaqiq aawe, maak'a'aq aab'aatal ut wanqat sa' rajb'al ru chi junajwa. Li Qaawa' tixk'e chakux jun b'itch'iich' toj reetal tat-oso'q.

⁴⁹ Li Qaawa' tixwaklesi chaq sa' aab'een jun li tenamit chalenaq chi najt, toj sa' xmaril chaq li ruuchich'och', kama' naq nachalk li t'iw. Taachalq jun tenamit jalan chik raatinob'aaleb',

⁵⁰ jun tenamit q'axal josq'eb' li ink'a' te'roxloq'i li cheekel winq li cheekel ixq, chi moko te'ril xtoq'ob'aal ruheb' li kok'al.

⁵¹ Eb' a'an te'xtzeka ral laawakax ut li ru rawimq laach'och', toj reetal tat-oso'q. Moko te'xkanab' ta b'ayaq aatriiw chi moko aab'iin chi moko aa'aseeyt, chi moko raleb' laawakax, chi moko raleb' laakarneer, toj reetal tat-oso'q chi junajwa.

⁵² “Te'xsut aawix sa' chixjunileb' laatenamit toj reetal te't'ane'q eb' li tz'ak najt xterameb' ut yiib'anb'ileb' chi chaab'il, a' li kaw wi' aach'ool. Te'xsut aawix sa' chixjunileb' laatenamit ut sa' li na'ajej xk'ehom aawe li Qaawa' laaYos.

⁵³ Ut aran, sa' li rahilal wanqat wi' xb'aaneb' li xik' neke'ilok aawe, taatzeka eb' laawalal aak'ajol, a' li xtib'eleb' laawalal ut eb' laarab'in li kixk'e aawe li Qaawa' laaYos.

⁵⁴ Li winq q'axal q'un xch'ool ut tuulan sa' eeyanq, xik' taaril li ras riitz'in, xik' taaril li rixaqil ut eb' li ralal xk'ajol toj wanqeb' rik'in,

⁵⁵ re naq ink'a' tixwotz rik'ineb' li xtib'eleb' li ralal xk'ajol li tixtzeka a'an. Maak'a' chik wanq re, naq taasutmanq rix chixjunileb' laatenamit xb'aaneb' li xik' neke'ilok aawe: k'ajo'aq li rahil ch'oolej yalaq b'ar!

⁵⁶ Li ixq jwal q'un xch'ool ut tuulan sa' laatenamit, li maajun sut xyalom b'eek chi maak'a' xxaab', xik' taaril li xb'eelom, li xyum, li xko',

⁵⁷ jo' ajwi' li xsok k'uula'al li na'elk chaq sa' xyanq li ra', ut eb' li k'uula'al tixyoob'tesiheb'; tixtiw malaj tixtzeka sa' muqmu chixjunil a'an. Maak'a' chik wanq re li ixq a'an, naq taasutmanq rix chixjunileb' laatenamit xb'aaneb' li xik' neke'ilok aawe: k'ajo'aq li rahil ch'oolej yalaq b'ar!

⁵⁸ “Wi ink'a' taak'e aach'ool chi xk'anjelankil chixjunil li raatinul li chaq'rab' a'in, li tz'iib'anb'il sa' li tasb'il hu a'in, ut wi ink'a' taawoxloq'i li xloq'laj k'ab'a' li Qaawa' laaYos, li Nimajwal,

⁵⁹ li Qaawa' tixk'e chi numtajenaq li rahilal sa' aab'een ut sa' xb'eeneb' laawalal aak'ajol te'yo'laaq moqon. Q'axal yib'ru li yajel tixk'e sa' aab'een, k'ajo'aq xnimal laarahilal, ut maajaruj tatk'iraaq.

⁶⁰ Tixk'e wi' chik chi t'ane'k sa' aab'een chixjunileb' li yajel li q'axal xiw xiw, li ke'xk'ul chaq eb' laj Ejiipt, ut relik chi yaal naq te'xletz rib' aawik'in.

⁶¹ Toj wank xkomon li yajel ut maak'a' reetalil sa' li xtasal huhil li chaq'rab' a'in: a'aneb' ajwi' tixtaqla sa' aab'een li Qaawa' toj reetal tat-oso'q.

⁶² Laa'ex numtajenaqex naq kexwank chaq, jo' xk'ihaleb' li chahim chiru li choxa, ab'anan ink'a' chik k'ihex texkanaaq, xb'aan naq ink'a' xerab'i li xyaab' xkux li Qaawa' leeYos.

⁶³ Jo' chanru naq li Qaawa' xsaho'k xch'ool cherusilankil ut chetamresinkil, kama' a'an ajwi' naq taasaho'q xch'ool chetz'eqtaanankil ut eesachb'al. Tex'isiiq chaq sa' li ch'och' ok eere chi reechaninkil.

⁶⁴ Li Qaawa' tatxcha'cha'i yalaq b'ar sa' chixjunileb' li tenamit, chalen chaq sa' jun xmaril li ruuchich'och' toj sa' xraqik junpak'al, ut aran tatk'anjelaq chiruheb' jalanil yos, yiib'anb'ileb' rik'in che' ut pek, eb' li ink'a' aanawom ru laa'at chi moko laana' laayuwa'.

⁶⁵ Moko taataw ta xsahil aach'ool sa'eb' li tenamit a'an chi moko wanq xhilaal laawoq, xb'aan naq li Qaawa' taab'aanunq re naq xiw xiw wanqat ut lumluuqat. Tixk'e chi lub'k laawaanm.

⁶⁶ Laayu'am wanq chawu, chanchan tawi' jun jisil ru chi noq' nachapok re; tatxiwaq chiru q'oqyink jo'wi' chi kutan, maak'a' k'aru taakoloq re laayu'am.

⁶⁷ Naq taasaqewq, taaye: «Ani taxaq taak'ehoq we chi ewuuk?» ut naq taa'ewuuq, taaye: «Ani taxaq taak'ehoq we chi saqewk?», cha'qat, xb'aan laaxiw li taasiksikinq laach'ool ut xb'aan li rahilal taawil laa'at.

⁶⁸ Li Qaawa' tatxk'am wi' chik Ejiipt, sa' jukub', sa' li b'e b'arwi' xyehom aawe: «Ink'a' chik taawil ru». Ut aran laa'ex teek'ayi eerib' reheb' li xik' neke'ilok eere, re naq texkanaaq cho'q aj mun winq ut aj mun ixq. Ab'anan maajun taaloq'oq eere”.