Deuteronomio 26 - Q'eqchi Bible

Li mayej re li xb'een ru li awimq

¹ “Naq toxat-okaq sa' li ch'och' tixk'e aawe li Qaawa' laaYos, ut toxaaweechani ut wanqat chisa',

² taaxok li xb'een ru chixjunil li awimq na'elk chiru li ch'och', taak'e sa' junaq chakach ut taak'am sa' li na'ajej sik'b'il ru xb'aan li Qaawa' laaYos cho'q xmuheb'aal li xk'ab'a'.

³ Toxaak'ut aawib' chiru laj tij wanq aran ut taaye re: «Sa' li kutan a'in tinch'olob' chiru li Qaawa' linYos naq ak xin'ok sa' li ch'och' kixyeechi'i li Qaawa' reheb' li qana' qayuwa' naq tixk'e qe».

⁴ Toja' naq laj tij tixk'ul laachakach ut tixk'e chaq chiru li x'artal li Qaawa' laaYos.

⁵ Ut laa'at tat-ok chi aatinak, taaye a'in re li Qaawa' laaYos: «Linxe'toonil yuwa' a'an chaq jun aj Aram, aj b'eenihom rib'. Kikub'eek sa' li tenamit Ejiipt ut aran kiwank chi yal ink'a' k'iheb'; ab'anan ke'tamk, ke'xtaw xwankil ut ke'nimlatenamito'k.

⁶ Eb' laj Ejiipt koohe'xrahob'tesi, koohe'xtawasi ut koohe'xk'e chi kawil k'anjelak.

⁷ Toja' naq laa'o kiqapatz' xk'ab'a' li Qaawa', li xYos eb' li qana' qayuwa', ut li Qaawa' kirab'i li xyaab' qakux; kiril xtoq'ob'aal qu ut kixk'e reetal li qarahob'tesinkil ut li qatawasinkil.

⁸ Li Qaawa' koorisi chaq Ejiipt rik'in xnimal xwankil, rik'ineb' xiwajel eetalil ut sachb'ach'oolej;

⁹ kooxk'am chaq sa' li na'ajej a'in ut kixk'e qe li ch'och' a'in k'ajo' xq'emal.

¹⁰ Ut anaqwan laa'in xink'am chaq li xb'een ru li awimq x'elk sa' li ch'och' aak'ehom we, at Qaawa'». “Chirix chik a'an taaq'axtesi chixjunil a'an re li Qaawa' laaYos ut taawiq'ib' aawib' chiru.

¹¹ Toja' naq taasaho'q aach'ool rik'in chixjunil li xk'ehom aawe li Qaawa' laaYos ut cho'q re laajunkab'al. Jo'kan ajwi' te'saho'q xch'ooleb' laj Leví ut eb' laj ab'l tenamit li wanqeb' sa' eeyanq.

Li xlajeetqil ru li awimq sa' li rox chihab'

¹² “Naq akaq xachoy xjek'inkil li xlajeetqil ru laawawimq sa' li rox chihab', a' li chihab' naq namayejamank li xlajeetqil ru chixjunil li awimq, taak'e re laj Leví jo'wi' re laj ab'l tenamit, li neb'a'yox ut li xmalka'an, re naq te'xtzeka sa'eb' laatenamit toj reetal taak'ojlaaq xch'ooleb'.

¹³ Toja' naq taaye chiru li Qaawa' laaYos: «Ak xwisi sa' li wochoch li k'aru tento taamayejamanq ut xink'e re laj Leví, laj ab'l tenamit, li neb'a'yox ut li xmalka'an. Xinb'aanu jo' chanru linchaq'rab'inkil aab'aan, ut maajun reheb' laachaq'rab' xinq'et chi moko xsachk sa' inch'ool.

¹⁴ Ink'a' xintzeka a'an naq wankin sa' rahil ch'oolejil, maak'a' xinxok naq muxb'ilin, maak'a' xinyeechi'i re junaq kamenaq. Xwab'i xyaab' xkux li Qaawa' linYos ut xinb'aanu chixjunil jo' chanru lintaqlankil aab'aan.

¹⁵ Chalen chaq sa' laaloq'laj muheb'aal, toj sa' xb'een li choxa, chawil ut chawosob'tesi chaq laatenamit Israel, jo' ajwi' li ch'och' k'ajo' xq'emal xak'e qe, jo' chanru xayeechi'i chaq reheb' li qana' qayuwa'».

Laj Israel, xtenamit li Qaawa'

¹⁶ “Sa' li kutan a'in li Qaawa' laaYos yo chi xyeeb'al aawe naq taapaab' li chaq'rab' ut eb' li aatin a'in. Chapaab' ut chak'anjelaheb' ru chi anchal aach'ool ut chi anchal aawaanm.

¹⁷ Anaqwan xach'olob' naq li Qaawa' a'an laaYos ut xayeechi'i xtaaqenkil li xb'e. Xaye naq taapaab' li xtaqlahom, li xchaq'rab', eb' li raatin jo' ajwi' taawab'i li xyaab' xkux.

¹⁸ Jo'kan ajwi', sa' li kutan a'in, li Qaawa' xye naq laa'at tz'aqal li xtenamit, jo' chanru kixyeechi'i aawe junxil, ut laa'at tento taak'uula sa' aach'ool chixjunil li xchaq'rab'.

¹⁹ A'an tixterq'usi laaloq'al, laak'ab'a' ut laawankil sa' xb'een chixjunileb' li tenamit li kixyoob'tesi, ut laa'ataq jun tenamit q'axtesinb'ilaq cho'q re li Qaawa' laaYos, jo' chanru kixye aawe A'an”.