Deuteronomio 25 - Q'eqchi Bible

¹ “Naq wanq raaxiik' sa' xyanqeb' wiib'aq winq, xikaqeb' sa' raqb'a aatin ut taaraqmanq aatin chirixeb': chi jo'kan taach'olaaq ru naq tiik xch'ool li ani tiik xch'ool ut taach'olaaq ajwi' naq wank xmaak li ani wank xmaak.

² Wi li ani wank xmaak xk'ulub' rape'k, laj raqol aatin tixtaqla chi xhupub'ankil rib' sa' ch'och' ut, chirix a'an, taarape'q, ab'an ajlanb'il li xlob' te'xk'e, a' yaal naxye xnimal li xmaak.

³ Ka'k'aal ajwi' naru taak'eemanq re; ka'ajwi' a'an, xb'aan naq wi tixk'ul numenaq ka'k'aal chi tz'uum, jwal naab'al li xtojb'al xmaak tixk'ul, naraj naxye naq tz'eqtaananb'il taakanaaq laawas aawiitz'in sa' xnaq' aawu.

⁴ “Maatz'ap ru'uj li b'ooyx naq yo chi k'anjelak re risinkil rix li triiw.

Li teneb'anb'il sa' xb'een li b'alkej

⁵ “Wi wiib'aq li qas qiitz'in wankeb' sa' jun chi kab'l ut jun reheb' a'an taakamq chi ink'a' tixkanab' ralal xk'ajol, li rixaqil li kamenaq ink'a' truuq taasumlaaq rik'in junaq maawa' xkomon li kamenaq. Li riitz'in li kamenaq tento tixk'am cho'q rixaqil ut tixb'aanu li teneb'anb'il sa' xb'een jo' b'alkej.

⁶ Li xb'een xkach'in taawanq, tento tixk'am junelik xk'ab'a' li kamenaq, re naq chi jo'kan ink'a' taasachq li xk'ab'a' sa' xyanqeb' laj Israel.

⁷ Ab'anan wi li winq ink'a' taaraj xk'amb'al li xb'alk cho'q rixaqil, taaxik li ixq sa' rokeb'aal li tenamit rik'ineb' li cheekel winq ut tixye: «Linb'alk ink'a' naraj naq yo'yooq junelik li xk'ab'a' li ras, sa' xyanqeb' laj Israel; ink'a' naraj xb'aanunkil wik'in li teneb'anb'il sa' xb'een jo' b'alkej», cha'aq.

⁸ Toja' naq eb' li xcheekal winqul li tenamit te'xb'oq li winq ut te'raatina. Ut wi a'in toj tixye naq ink'a' taaraj xk'amb'al li ixq cho'q rixaqil,

⁹ toja' naq li xb'alk taanach'oq chi xk'atq chiruheb' li cheekel winq, taarisi li xperxaab' chi roq, tixchuub'a sa' xnaq' ru ut tixye eb' li aatin a'in: «Kama'in nab'aanumank re li winq li ink'a' naraj xk'eeb'al ralal xk'ajol li ras kamenaq», cha'aq.

¹⁰ Ut li rochoch «Rochochil li maq'b'il xxaab'» taak'eemanq cho'q xk'ab'a' aran Israel.

Naab'aleb' chik chaq'rab'

¹¹ “Wi wiib'aq chi winq yookeb' chi xsak'b'al rib' chirib'ileb' rib' ut li rixaqil li jun taaxik chi xkolb'al li xb'eelom, ut tixye' li ruq' ut tixchap li xtz'ejwal li jun chik,

¹² laa'at taayok' li ruq' chi ink'a' taawil xtoq'ob'aal ru.

¹³ “Miwank sa' laajelool wiib'aq li xpekul li peex, junaq ta nim ut junaq ta kach'in.

¹⁴ Miwank sa' laawochoch wiib'aq li b'isleb' chi moqoj, junaq ta nim ut junaq ta kach'in.

¹⁵ Tento naq taawanq junaq xpekul laapeex tz'aqal tb'iso'q: taawanq junaq aab'isleb' chi moqoj, tz'aqal tb'iso'q, re naq taanajto'q roq laayu'am sa' li ch'och' tixk'e aawe li Qaawa' laaYos.

¹⁶ Xb'aan naq li Qaawa' laaYos xik' naril eb' li neke'b'aanunk re a'in ut ink'a' neke'wank chi tiikeb' ru li xch'ool.

¹⁷ “Chijultiko'q aawe li kixb'aanu aawe laj Amalek, naq wankex chaq chiru b'e, sa' leerelik chaq Ejiipt.

¹⁸ Chijultiko'q aawe chanru naq kichalk chak'ulb'al sa' b'e. Laa'at tawajenaqat chaq ut maak'a' chik aametz'ew, ut a'an kixyoolesiheb' chixjunileb' li lub'luukeb' li yookeb' chaq chi taaqink aawe: ink'a' kixiwak chiru li Yos!

¹⁹ Jo'kan naq chiwanq sa' aach'ool a'in: naq li Qaawa' laaYos akaq xsacheb' ru chixjunileb' li xik' neke'ilok aawe chasutam ut xatroksi sa' li na'ajej tixk'e chaweechani, tento taasachq xk'ab'a' laj Amalek chi junajwa, junsut junrub'el choxa. Misachk sa' aach'ool a'in!