Deuteronomio 24 - Q'eqchi BibleChirix li jachok ib' 1 “Wi junaq winq tixk'am junaq ixq ut taasumlaaq rik'in, ab'anan moqon ink'a' tixtaw li usilal rik'in, xb'aan naq tixk'e reetal naq wank k'aru ink'a' nawulak chiru li naxb'aanu li rixaqil, li winq a'an naru tixtz'iib'a xhuhil li jachok ib', tixq'axtesi sa' ruq' li ixq ut taarisi sa' li rochoch. 2 Ut chirix naq ak x'elk li ixq sa' rochoch li winq, naru taasumlaaq rik'in jalan chik winq. 3 Ab'an wi li xkab' b'eelomej ajwi' xik' taaril li ixq, tixtz'iib'a junaq xhu re xjachb'al rib' rik'in ut tixq'axtesi sa' ruq' ut taarisi sa' li rochoch (malaj ut taakamq li xkab' b'eelomej), 4 li xb'een b'eelomej li kikanab'ank li ixaqilb'ej, moko truuq ta chik tixk'am cho'q rixaqil, xb'aan naq ak xtz'ajni rib' li ixq a'an. A'an tz'i'b'eetal chiru li Qaawa', ut laa'at ink'a' naru taasach xloq'al li ch'och' tixk'e aawe li Qaawa' laaYos chaweechani. Naab'aleb' chik chaq'rab' 5 “Junaq winq toj ak' xsumlajik moko truuq ta taaxik chi yalok chi moko taaminmanq ru chi xb'aanunkil junaq li xtaqlankil, taakanaaq b'an jun chihab'aq chi hilank sa' rochoch re xk'ojob'ankil xch'ool li rixaqil. 6 “Ink'a' taachapmanq li ke'leb' malaj li ruq' ka', cho'q reeqaj li to', xb'aan naq chanchan ajwi' xchapb'al li yu'am cho'q reeqaj li to'. 7 “Wi junaq winq taarelq'a li ras riitz'in rech aj Israelil ut tixk'e cho'q xmun malaj ut tixk'ayi, laj elq' a'an tento taakamq, re naq taasachq chi junajwa li ink'a' us sa' eeyanq. 8 “K'e reetal li yajel saqlep; chapaab' ut chab'aanu chixjunil li k'aru neke'xye eb' laj tij aj Leví. Chak'e aach'ool chi xk'anjelankil jo'ch'inal jo'nimal xinye reheb'. 9 Chijultiko'q eere li k'aru kixb'aanu li Qaawa' laaYos rik'in lix María naq wankex chaq chiru b'e, sa' leerelik chaq Ejiipt. 10 “Wi taak'e chixto'oni laawas aawiitz'in yalaq k'a' re ru, mat-ok sa' rochoch chi xpatz'b'al reeqaj li to'; 11 tatkanaaq b'an chirix kab'l, ut li winq li xak'e xto' tixk'am chaq aawe chirix ochoch li reeqaj li xto'. 12 Ut wi neb'a' li winq li xto'onink aawik'in, matyoklaak chi wank aawik'in li k'aru xaxok cho'q reeqaj li to'; 13 taaq'ajsi b'an re, naq yooq chi muqunk li saq'e, re naq taaruuq chi yoklaak sa' li xt'ikr. Chi jo'kan tixb'anyoxi chawu, ut k'ajo' naq taawulaq laab'aanuhom chiru li Qaawa' laaYos. 14 “Ink'a' taatawasi li neb'a' nak'anjelak yal sa' kutan ut tenq'aak naraj, us ta aawech Israelil malaj ut yal aj numel li wank rochoch sa' laana'aj, sa'atqeb' laatenamit. 15 Sa' ajwi' li kutan a'an taatoj li xkutan; mimuqunk li saq'e chi toj wanq aak'as, xb'aan naq a'an neb'a' ut naraj ru li xtojb'al re xnumsinkil li kutan. Chi jo'kan ink'a' tatxjit chiru li Qaawa' ut ink'a' ajwi' taawiiqa junaq maak. 16 “Ink'a' te'kamsimanq li na'b'ej yuwa'b'ej sa' xk'ab'a' xmaakeb' li ralal xk'ajol, chi moko li alalb'ej sa' xk'ab'a' xmaakeb' li na'b'ej yuwa'b'ej. Ak xmaak xmaak tixtoj rix li junjunq naq taakamsimanq. 17 “Ink'a' taajal ru li xk'ulub' laj ab'l tenamit chi moko li neb'a'yox; ink'a' taaxok li xt'ikr li xmalka'an cho'q reeqaj li to'. 18 Chijultiko'q aawe naq katwank chaq chi munil sa' li tenamit Ejiipt ut li Qaawa' laaYos ki'isink chaq aawe aran. Jo'kan naq yookin chi xk'eeb'al aawe li chaq'rab' a'in. 19 “Naq taaxok ru laawawimq sa' laach'och', wi xsachk chaq sa' aach'ool jun joob'aq laatriiw, matsutq'iik chi xsik'b'al. Rehaq chik laj ab'l tenamit, li neb'a'yox ut li xmalka'an, re naq li Qaawa' laaYos tatrosob'tesi sa' chixjunil laak'anjel. 20 “Naq taatich ru laa'oliiw, ink'a' taasakona li ru; kanaaq cho'q re laj ab'l tenamit, cho'q re li neb'a'yox ut li xmalka'an. 21 “Naq taaxok ru laa'uub', moko taasakona ta chaq; kanaaq b'ayaq cho'q re laj ab'l tenamit, cho'q re li neb'a'yox ut li xmalka'an. 22 Chijultiko'q aawe naq katwank chaq chi munil sa' li tenamit Ejiipt. Jo'kan naq yookin chi xk'eeb'al aawe li chaq'rab' a'in. |
Q'eqchi DC Bible © Bible Society in Guatemala, 2005.
Bible Society in Guatemala