Deuteronomio 23 - Q'eqchi Bible

Li ink'a' k'ulb'ileb' sa' xkomonil li Qaawa'

¹ “Li winq puk'ul xnaq' li xtz'ejwal malaj setb'il li xtz'ejwal, moko k'ulb'ilaq ta sa' li xkomonil li Qaawa'.

² “Li yal sik'b'il al ink'a' k'ulb'ilaq sa' li xkomonil li Qaawa'; chi moko sa' li xlaje xteepal riyajil li tenamit taak'ule'q sa' li xkomonil li Qaawa'.

³ “Eb' laj Amón ut eb' laj Mohab ink'a' k'ulb'ilaqeb' sa' li xkomonil li Qaawa', chi moko sa' li xlaje xteepal riyajil. Maajun wa te'k'ule'q sa' li xkomonil li Qaawa',

⁴ xb'aan naq ink'a' ke'chalk chek'ulb'al rik'in wa ut ha' chiru b'e, naq laa'ex kex'elk chaq Ejiipt; ke'xtoj ajwi' laj Balaham re eemajewankil, a' li ralal laj Pehor, li kichalk chaq Petor, Aram-Naharáhin.

⁵ Ab'anan li Qaawa' laaYos ink'a' kiraj rab'inkil laj Balaham ut kixjal laamajewankil chi aawosob'tesinkil, xb'aan naq li Qaawa' laaYos nakatxra.

⁶ Maajun wa taasik' li tuqtuukil usilal rik'ineb' li tenamit a'an chi moko taawusilaheb', jo' najtil yo'yooqat.

⁷ “Maatz'eqtaana laj Edom, xb'aan naq aawas aawiitz'in. Maatz'eqtaanaheb' laj Ejiipt, xb'aan naq katwank chaq sa' li xtenamiteb'.

⁸ Eb' li ralal xk'ajoleb' a'an li te'yo'laaq sa' li rox xteepal riyajil truuq te'k'ule'q sa' li xkomonil li Qaawa'.

⁹ “Naq tatxik chi yalok rik'ineb' li xik' neke'ilok aawe, chakol aawib' chiru chixjunil li ink'a' us.

¹⁰ Wi wank sa' eeyanq junaq winq li xmux rib' xb'aan naq xhoy li riyajil chiru q'oqyink, li jun a'an taa'elq sa' li muheb'aal ut ink'a' chik taaruuq taa'ok sa' eeyanq chiru chixjunil li kutan.

¹¹ Ab'anan, naq taa'ewuuq, taa'atinq ut taa'ok wi' chik sa' li na'ajej wankex wi', naq taamoyq li saq'e.

¹² “Tento taawanq junaq na'ajej chirix li muheb'aal re k'otak, ut aran tatxik.

¹³ Sa' xyanqeb' laak'anjelob'aal taak'am junaq aache' q'es ru'uj ut, naq tatxik chi k'otak chirix li muheb'aal, taapik junaq jul rik'in li che' a'an, taasutq'isi aawib' ut chirix a'an taatz'ap xb'een laak'ot.

¹⁴ Li Qaawa' laaYos nab'eek wan wi' li muheb'aal re aakolb'al ut re xq'axtesinkil sa' laawuq' eb' li xik' neke'ilok aawe. Jo'kan naq laamuheb'aal tento naq oxloq'inb'ilaq; li Qaawa' ink'a' naru taaril li ink'a' us aran. Wi taaril li ink'a' us, taarisi rib' aawik'in.

¹⁵ “Ink'a' taaq'axtesi re laj eechal re, laj mun li x'elelik ut xol'okaq aawik'in;

¹⁶ taakanaaq b'an sa' xyanqeb' laakomon, sa' li na'ajej b'arwi' taawulaq chiru wank, sa' junaq reheb' laatenamit b'arwi' tixk'ul ru; ut maach'i'ch'i'i.

¹⁷ “Ink'a' te'wanq ixq malaj ut winq sa' xyanqeb' laj Israel li te'xk'ayi li xtib'eleb' sa' rochoch li Qaawa'.

¹⁸ Maak'am sa' rochoch li Qaawa' laaYos li tumin neke'xk'ul li neke'xk'ayi rib'eb', a' yaal chanru xayeechi'i re li Qaawa'. Xb'aan naq li na'leb' a'an tz'i'b'eetal chiru li Qaawa' laaYos.

¹⁹ “Mik'a' aapatz' cho'q reeqaj li to' xak'e re laawas aawiitz'in, mare tumin, mare tzekemq malaj junaq chik k'a' re ru; ink'a' naru taapatz' ral.

²⁰ Cho'q re laj ab'l tenamit tatruuq chi xk'eeb'al xto' ut xpatz'b'al ral; ab'an laawas aawiitz'in ink'a' taak'e xto' chi wanq aawoyb'enihom chirix, re naq li Qaawa' laaYos tatrosob'tesi sa' chixjunil laak'anjel li taab'aanu sa' li ch'och' tixk'e chaweechani.

²¹ “Wi taaye junaq aawaatin chiru li Qaawa' laaYos rik'in jurament, matb'ayk chi xb'aanunkil, xb'aan naq wi ink'a' taab'aanu chi junpaat, li Qaawa' laaYos tixkanab' sa' aab'een xtojb'al, ut wanq aamaak.

²² Ab'anan maak'a'aq maak sa' aab'een wi ink'a' nakayeechi'i xb'aanunkil junaq k'a' re ru re li Qaawa' rik'in jurament.

²³ Li k'aru x'elk chi xtz'uumal aawe, wanq sa' aach'ool ut b'aanu kama' xayeechi'i re li Qaawa' laaYos, jo' jun maatan yal rajom aach'ool li xayeechi'i rik'in xtz'uumal aawe.

²⁴ “Wi tat-ok sa' li rawimq laawas aawiitz'in, truuq taatzeka chixjunil li uub' li jo'k'ihal taawaj toj taak'ojlaaq aach'ool, ab'an maak'a' taak'am sa' laachakach.

²⁵ Wi tatnume'q sa' li rawimq laawas aawiitz'in, tatruuq chi xxokb'al li ru li triiw rik'in aawuq'; ab'an ink'a' taawoksi li setleb' ch'iich' sa' li rawimq laawas aawiitz'in.