Deuteronomio 22 - Q'eqchi Bible

¹ “Wi taawil junaq wakax malaj karneer li xsachk chiru laawas laawiitz'in, mayalaawil, taak'am b'an rik'in laawas aawiitz'in aj eechal re.

² Ab'an wi laawas aawiitz'in moko aawechkab'al ta malaj ut ink'a' nakanaw ru, taak'am li xul sa' laawochoch ut aran taakanaaq toj reetal taak'ulunq laawas aawiitz'in chi xsik'b'al; toja' naq taaq'axtesi re.

³ Kama'an ajwi' taab'aanu rik'in li xb'uur, li xb'aatal ut rik'in yalaq k'aru taasachq chiru laawas aawiitz'in. Wi taataw laa'at, moko truuq ta naq yal taawil.

⁴ “Wi taawil chi t'ant'o li xb'uur malaj ut li xb'ooyx laawas aawiitz'in, mayalaawileb', taatenq'a b'an chi xwaklesinkileb'.

⁵ “Li ixq ink'a' naru tixk'am raq' winq chirix, chi moko li winq tixk'e raq' ixq chirix, xb'aan naq a'an tz'i'b'eetal chiru li Qaawa' laaYos.

⁶ “Naq taataw sa' b'e junaq xsukeb' li tz'ik, mare sa' ru'uj jun toon chi che' malaj ut sa' ch'och', wi wanq li ral chisa' malaj ut mol, ut li na'b'ej hupuuq sa' xb'eeneb' li ral malaj sa' xb'eeneb' li xmol, ink'a' naru taaxok li na'b'ej rochb'eeneb' li ral.

⁷ Taakanab' chi xik li na'b'ej ut taak'am eb' li ral sa' laawochoch. Chi kama' a'an sa tatwanq ut taanajto'q roq laayu'am.

⁸ “Naq taakab'la junaq ak'il ochoch, tento naq taak'e li ramleb' sa' xmu aran taqe'q. Chi jo'kan ink'a' taateneb' sa' xb'een laajunkab'al li xkamik li ani taat'ane'q chaq aran.

⁹ “Maawaw li xna'aj li uub' chi ka'paay ru riyajil. Mare anchal taaq'axtesimanq chixjunil re li Qaawa': li iyaj xawaw ut li taaruuchini laawawimq.

¹⁰ “Maapik ru li ch'och' rik'in b'ooyx rochb'een junaq b'uur.

¹¹ “Maatiqib' aawib' rik'in kemb'il t'ikr: jun toqol rik'in tuuxnoq' ut jun toqol rik'in liin.

¹² “Taab'ol li re xkaaxukuutil li t'ikr taab'at wi' aawib'.

¹³ “Mare junaq winq taasumlaaq rik'in junaq ixq ut moqon, naq ak xwank rik'in, tixtz'eqtaana,

¹⁴ tixyoob' aatin chirix ut tixq'ab'a chiruheb' li tenamit rik'in xyeeb'al: «Xinsumlaak rik'in li ixq a'in ut xinwank rik'in, ab'anan moko tz'aqal tuq'ixq ta chik naq xintaw», cha'aq.

¹⁵ Toja' naq li xna' xyuwa' li saaj ixq te'xk'am chaq reetalil li xtuq'ixqilal ut te'xk'e che'xnaw li xcheekal winqul li tenamit;

¹⁶ ut li xyuwa' li saaj ixq tixye reheb' li cheekel winq: «Laa'in xink'e linrab'in cho'q rixaqil li winq a'in, ab'an xik' chik naril anaqwan,

¹⁷ ut naxyoob' aatin chirix rik'in xyeeb'al: Moko tuq'ixq ta naq xintaw laarab'in. Ab'anan waayi' li reetalil li xtuq'ixqilal linrab'in». Ut li na'b'ej yuwa'b'ej te'xhel li t'ikr chiruheb' li xcheekal winqul li tenamit.

¹⁸ Li winq a'an wank xmaak. Jo'kan naq eb' li cheekel winq te'xchap li winq ut te'xrahob'tesi.

¹⁹ Tento naq li winq tixtoj o'k'aal chi tumin plaat li taaq'axtesimanq re li xyuwa' li saaj ixq, xb'aan naq xyoob' tik'ti' chirix jun li tuq'ixq aj Israel. Tento ajwi' naq tixk'ul li ixq cho'q rixaqil ut ink'a' taaruuq chi xkanab'ankil chiru chixjunil li xyu'am.

²⁰ “Ab'anan wi yaal li naxye li winq ut maak'a' junaq reetalil li xtuq'ixqilal li saaj ixq,

²¹ taa'isiiq li ixq chire rochoch li xyuwa' ut taateniiq chi pek xb'aaneb' li winq wankeb' sa' li tenamit, toj reetal taakamq, xb'aan naq xutaanal li xb'aanu arin Israel: xb'aanu li maa'usilal sa' rochoch li xyuwa'. Chi jo'ka'in taawisi li ink'a' us sa' eeyanq.

²² “Wi taatawmanq junaq winq yokyooq rik'in junaq sumsuukil ixq, te'kamq chi xkab'ichaleb': taakamq li winq xyoklaak rik'in li ixq ut jo'kan ajwi' li ixq. Chi jo'ka'in taawisi li ink'a' us sa' xyanqeb' laj Israel.

²³ “Wi wank junaq saaj ixq, tuq'ixq, ak xsumehom raatin junaq winq, ut taatawe'q xb'aan jalan chik winq sa' li tenamit ut li winq taayoklaaq rik'in li ixq,

²⁴ te'isiiq chi xkab'ichaleb', te'k'ame'q toj sa' xmaril li tenamit ut te'teniiq chi pek toj reetal te'kamq: li tuq'ixq, xb'aan naq ink'a' xpatz' xtenq'ankil sa' li tenamit, ut li winq, xb'aan naq xmux li rixaqil li ras riitz'in. Chi jo'ka'in taawisi li ink'a' us sa' eeyanq.

²⁵ “Ab'anan wi li winq xtaw chaq li tz'aamanb'il saaj ixq sa' k'aleb'aal ut xmin ru ut xyoklaak rik'in, ka'ajwi' li winq a'an taakamq;

²⁶ maak'a' taab'aanu re li saaj ixq, xb'aan naq maak'a' xmaak ut moko xk'ulub' ta naq taakamsiiq. Li xk'ulmank aran chanchan junaq winq tixkut rib' sa' xb'een li ras riitz'in ut tixkamsi.

²⁷ Xb'aan naq sa' k'aleb'aal xtawe'k chaq li tz'aamanb'il saaj ixq: li ixq xjap re, ab'anan maajun wank aran re xtenq'ankil.

²⁸ “Wi junaq winq tixtaw junaq saaj ixq toj tuq'ixq ut ink'a' tz'aamanb'il, tixchap ut taayoklaaq rik'in, ut te'tawe'q chi xkab'ichaleb',

²⁹ li winq li xyoklaak rik'in li ixq tento tixk'e lajeeb' roxk'aal chi tumin plaat re li xyuwa' li saaj ixq ut tixk'am cho'q rixaqil, xb'aan naq ak xb'atz'unle chik, ut ink'a' naru tixjach rib' rik'in chiru chixjunil li xyu'am.

³⁰ “Maajun truuq tixmaq' rixaqil li xyuwa', chi moko tixk'ut xxutaan li xyuwa'.