Deuteronomio 17 - Q'eqchi Bible

¹ “Ink'a' taamayeja chiru li Qaawa' laaYos junaq wakax malaj karneer li wank xyajel malaj k'a' chik reek', xb'aan naq a'an tz'i'b'eetal chiru li Qaawa' laaYos.

² “Mare wanq junaq winq malaj ixq sa'eb' li tenamit tixk'e aawe li Qaawa' laaYos, li tixb'aanu li ink'a' nawulak chiru li Qaawa', tixq'et li Sumwank,

³ tixloq'oni ruheb' li jalanil yos ut tixwiq'ib' rib' chiruheb', a' yaal ma chiru li saq'e, li po malaj chiruheb' li chahim, ut chi jo'kan tixq'et rib' chiru linchaq'rab'.

⁴ Naq taajitmanq chawu, tento taatz'il rix chi us, ut wi xch'olaak naq yaal li xyeemank, naraj naxye naq xb'aanumank li yib'eetal a'an sa' li tenamit Israel,

⁵ taawisi chirix li tenamit li winq malaj li ixq a'an li xe'maakob'k ut taateniheb' chi pek toj reetal te'kamq.

⁶ “Rik'in raatineb' wiib' malaj oxib' chi testiiw, truuq xk'eeb'al junaq aj maak chi kamk, ab'an moko truuq ta xkamsinkil rik'in raatin yal junaq chi testiiw.

⁷ Li ruq'eb' li testiiw, a'an li xb'enwa te'naq sa' xb'een re xkamsinkil; chirix chik a'an te'okenq chixjunileb' li tenamit. Chi jo'kan taawisi chi junajwa li maa'usilal sa' eeyanq.

⁸ “Wi jwal ch'a'aj cho'q aawe xraqb'al aatin chirixeb' li ch'a'ajkilal, jo' li kamsij ib', li wech'ink ib', li tenok ib', li raaxiik' sa' laatenamit, tento tatxik sa' li na'ajej tixsik' ru li Qaawa' laaYos.

⁹ Aran toxaapatz' aatenq'ankil reheb' laj tij aj Leví ut re laj raqol aatin wank sa' xk'anjel. Eb' a'an te'xtz'ili rix chi us ut te'xye aawe k'aru tkanaaq wi' li ch'a'ajkilal a'an.

¹⁰ Laa'at taak'ulub'a li k'aru te'xye aawe toj sa' chaq li na'ajej tixsik' ru li Qaawa', ut taab'aanu jo' chanru tz'aqal yeeb'il aawe.

¹¹ B'aanu jo' chanru laataqlankil ut li xyeemank aawe sa' li raqb'a aatin: ink'a' taajal xb'ehil li raqb'a aatin te'xk'ut chawu, chi moko sa' laanim chi moko sa' laatz'e.

¹² Ut wi junaq winq naxjipi rib' ut ink'a' tixpaab' laj tij li wan chaq aran chi k'anjelak chiru li Qaawa' laaYos malaj ut laj raqol aatin, li winq a'an taakamsiiq. Chi jo'kan taasach li ink'a' us sa' xyanqeb' laj Israel,

¹³ ut naq eb' li tenamit te'rab'i resil a'an, te'xiwaq ut ink'a' chik te'xjipi rib'eb'.

Eb' li awab'ej

¹⁴ “Naq akaq xat-ok sa' li ch'och' tixk'e aawe li Qaawa' laaYos, ut ak xachap cho'q aawe laana'aj ut wankat chik chisa', wi taaye: «Twaj raj xxaqab'ankil junaq awab'ej sa' inb'een, kama' wankeb' re li tenamit wankeb' chinsutam», cha'qat,

¹⁵ tatruuq xxaqab'ankil junaq awab'ej sa' aab'een, a' li tixsik' ru li Qaawa' laaYos sa' xyanqeb' laawas laawiitz'in; moko tatruuq ta xxaqab'ankil cho'q awab'ej sa' aab'een junaq aj ab'l tenamit, li moko aakomon ta.

¹⁶ Ab'anan li awab'ej a'an ink'a' tixloq' naab'aleb' li xkawaay, chi moko tixtaqlaheb' li rech tenamitul aran Ejiipt re xk'ihob'resinkileb' li xkawaay, xb'aan naq li Qaawa' ak xyehom eere: «Maajun wa chik texsutq'iiq sa' li b'e a'in», chan.

¹⁷ Chi moko naru te'wanq naab'alaq li rixaqil, re naq ink'a' tixkanab' li xb'e li Qaawa'. Mixtamresi ajwi' li xplaat ut li x'oor chi numtajenaq.

¹⁸ “Naq taa'ok chi awab'ejil, tento tixtz'iib'a reetalil li Chaq'rab' a'in li wank rik'ineb' laj tij aj Leví.

¹⁹ Junelik wanq rik'in li awab'ej, ut a'in taaril xsa' rajlal kutan chiru chixjunil li xyu'am, re naq tixtzol rib' roxloq'inkil li Qaawa' li xYos, jo' ajwi' xpaab'ankil ut xk'anjelankil ru chixjunil li aatin ut taqlahom wank sa' li Chaq'rab' a'in.

²⁰ Chi jo'kan ink'a' tixnimob'resi xwankil sa' xb'eeneb' li ras riitz'in, ut ink'a' tixjal xb'e chiru li chaq'rab' a'in, chi moko sa' xseeb'al chi moko sa' xtz'e, re naq tixnajtob'resi xchihab'il li x'awab'ejihom, a'an ut eb' li ralal xk'ajol, sa' xyanqeb' laj Israel.