Deuteronomio 15 - Q'eqchi Bible

Li xwuq chihab'

¹ “Rajlal wuqutq chihab' taakuyeb' xmaak li wankeb' xk'as aawik'in.

² “Kama'in li kuyuk maak. Chixjunil li xk'ehok xto' li ras riitz'in, tento tixkuy xmaak ut ink'a' tixtitz' li xk'as li xkomon malaj li ras riitz'in, xb'aan naq ak xpuktesimank resil li kuyuk maak sa' xk'ab'a' li Qaawa'.

³ Truuq taatitz' laj ab'l tenamit; ab'anan laawech tenamitul taakuy xmaak: ink'a' tixtoj li xk'as.

⁴ Chi jo'kan maajunaq neb'a' sa' eeyanq, xb'aan naq li Qaawa' laaYos tatrosob'tesi chi numtajenaq sa' li ch'och' tixk'e chaweechani,

⁵ wi relik chi yaal taawab'i li xyaab' xkux ut taab'aanu jo' naxye chixjunil li chaq'rab' a'in, li xink'e chanaw anaqwan.

⁶ Li Qaawa' laaYos tatrosob'tesi, kama' xyehom aawe: jo'kan naq laa'at taak'e xto' naab'aleb' li tenamit, ab'anan ink'a' tatpatz'oq chi to'ninb'il; laa'at tattaqlanq sa' xb'eeneb' naab'al chi tenamit, ab'an laa'at ink'a' tate'xtaqla.

⁷ “Wi wank junaq neb'a' sa' xyanqeb' laawech tenamitul, sa' junaq reheb' li tenamit tixk'e aawe li Qaawa' laaYos, maakawub'resi laach'ool chi moko taamoq'ob' aawib' chiru laawas aawiitz'in neb'a',

⁸ taatenq'a b'an ut taak'e re chi to' li k'aru taak'anjelaq chiru, re naq taa'elq sa' li xch'a'ajkilal.

⁹ Michalk sa' laach'ool li yib' aj na'leb' a'in: «Maak'a' tink'e re, xb'aan naq wulak re li xwuq chihab', a' li xchihab'il xkuyb'al xmaakeb' laj k'as», ut chi jo'kan taapixun aawib' chiru laawas aawiitz'in neb'a' chi maak'a' taatenq'a wi'. Xb'aan naq a'an tixyaab'a xk'ab'a' li Qaawa' sa' aab'een ut laa'at tat-iiqanq re li maak.

¹⁰ Tento taak'e k'aru re chi ink'a' taaraho'q aach'ool, xb'aan naq rik'in xb'aanunkil a'an tatrosob'tesi li Qaawa' laaYos sa' chixjunil li k'anjel taab'aanu.

¹¹ Maajoq'e te'lajq eb' li neb'a' sa' li ruuchich'och' a'in. Jo'kan naq nink'e aawe li chaq'rab' a'in: Tento taaye' laawuq' re laawas ut laawiitz'in, chatenq'a laakomon neb'a' li wank sa' rajb'al ru sa' laatenamit.

Eb' laj mun

¹² “Wi laawas aawiitz'in aj hebreo, winq malaj ut ixq, tixk'ayi rib' aawe, waqib' chihab' ajwi' taak'anjelaq chawu; ab'an sa' xwuq li chihab' taakanab' chi ach'ab'anb'il.

¹³ Ut naq taakanab' chi ach'ab'anb'il, moko taataqla ta chi maak'a' taasi re,

¹⁴ tento b'an naq taak'e xketomq, naab'al li xtriiw ut xb'iin; naraj naxye taawotz li k'aru xatrosob'tesi wi' li Qaawa' laaYos.

¹⁵ Jultikaq aawe naq laa'at katwank chaq chi munil sa' li tenamit Ejiipt ut li Qaawa' laaYos ki'ach'ab'ank aawe. Jo'kan naq laa'in nink'e aawe li chaq'rab' a'in anaqwan.

¹⁶ “Ab'an mare laamoos tixye aawe: «Ink'a' nawaj elk aawik'in», cha'aq, xb'aan naq nakatxra laa'at jo' ajwi' laajunkab'al ut sa nawank aawik'in.

¹⁷ Wi naxye chi jo'kan, taachap junaq kuux, taahop junaq xxik chiru li xtz'apb'al li okeb'aal, ut a'anaq aamoos chi junelik. Jo'kan ajwi' taab'aanu rik'in laamoos ixq.

¹⁸ Mich'a'ajko' chawu xkanab'ankil chi ach'ab'anb'il, xb'aan naq waqib' chihab' xk'anjelak chawu ut, rik'in li k'anjel xb'aanu a'an, ka'wa xat-eechanink chiru junaq poyanam li yal tojb'il sa' kutan. Ut li Qaawa' laaYos tatrosob'tesi sa' chixjunil li k'aru taab'aanu.

Eb' li xb'een ral li ketomq

¹⁹ “Chixjunileb' li xb'een ral eb' laawakax malaj eb' laakarneer, wi teelomeb', taaq'axtesiheb' re li Qaawa' laaYos. “Maak'e chi k'anjelak li xb'een ral laawakax chi moko taab'es li rismal li xb'een ral laakarneer.

²⁰ Rajlal chihab' taatzeka laa'at ut laajunkab'al chiru li Qaawa' laaYos, sa' li na'ajej sik'b'il ru xb'aan A'an.

²¹ Ut wi wank junaq xyajel, wi yeq roq malaj mutz' malaj wank junaq chik xyib'al ru, ink'a' taamayeja re li Qaara' laaYos.

²² Taatzeka sa' laatenamit. Us ta muxb'il aawu, us ta ink'a' muxb'il aawu, naru taatzeka, kama' natzekamank li kej ut li yuk.

²³ Ab'anan ink'a' naru taatzeka xkik'el, taahoy b'an chi ch'och' kama' li ha'.