Deuteronomio 13 - Q'eqchi Bible

“Meeloq'oni ru eb' li jalanil yos”

¹ “Mare sa' eeyanq taawakliiq junaq propeet malaj junaq aj matk' ut tixye resil naq xril jun nimla eetalil malaj sachb'ach'oolej.

² Wi taak'ulmanq li k'aru xyehom ut tixye ajwi': «Yo'qeb' chirixeb' li yos toj maji' aanawom ruheb', yo'qeb' chi xloq'oninkileb' ru», cha'aq,

³ maapaab' li propeet a'an malaj li xyehom laj matk'. Xb'aan naq li Qaawa' leeYos yooq chi xyalb'al eerix, re xnawb'al ma relik chi yaal naq nekera li Qaawa' leeYos chi anchal eech'ool ut chi anchal eeraanm.

⁴ A' li Qaawa' leeYos teetaaqe ut ka'ajwi' A'an teeroxloq'i; teepaab' li xchaq'rab' ut teerab'i li xyaab' xkux, texk'anjelaq chiru ut wanqex rik'in chi junelik.

⁵ Ut li propeet malaj laj matk' a'an tento taakamq xb'aan naq xatxtakchi'i chi xq'etq'etinkil aawib' chiru li Qaawa' laaYos li ki'isink chaq aawe sa' li tenamit Ejiipt, b'arwi' katwank chaq chi munil. Tento taakamq xb'aan naq kiraj raj aawisinkil sa' li b'e xk'ehom chab'eeni li Qaawa' laaYos. Jo'ka'in taak'e chi oso'k chi junajwa li ink'a' us sa' eeyanq.

⁶ “Wi laawas aawiitz'in, li ralal laana' laayuwa', laawalal malaj ut laarab'in, laaraarookil ixaqil malaj ut laawamiiw li chanchan tz'aqal aawaanm, taaraj aab'alaq'inkil chi muqmu rik'in xyeeb'al aawe: «Yo'o, qaloq'oniiq ruheb' li jalanil yos», cha'aq, li ink'a' nakanaw ru laa'at chi moko eb' laana' ut laayuwa' xnawomeb' ru,

⁷ a'eb' li yos li wankeb' sa' xyanqeb' li tenamit li nach' wankeb' jo'wi' li wankeb' chi najt, eb' li neke'sutuk eere sa' xb'een li ruuchich'och',

⁸ maapaab' chi moko chawab'i; maawil xtoq'ob'aal ru, maakuy xmaak chi moko taakol rix,

⁹ taateneb' b'an li kamk sa' xb'een: laa'at li xb'enwa taanaq aawuq' sa' xb'een re xkamsinkil, chirix a'an taanaq li ruq'eb' chixjunil li tenamit.

¹⁰ Taateni chi pek toj reetal taakamq, xb'aan naq xraj aawisinkil sa' xb'e li Qaawa' laaYos li ki'isink chaq aawe sa' li tenamit Ejiipt, b'arwi' katwank chaq chi munil.

¹¹ Ut naq te'rab'i a'in chixjunileb' laj Israel, te'xiwaq ut te'xkanab' xb'aanunkil li yib'ruhil na'leb' a'in sa' eeyanq.

¹² “Wi sa' junaq reheb' li tenamit tixk'e aawe li Qaawa' laaYos re naq tatwanq chisa', taawab'i resil naq

¹³ wankeb' winq li ink'a' useb' xch'ool, yo'lajenaqeb' sa' eeyanq li xe'xb'alaq'i li rech tenamitul rik'in xyeeb'al: «Qaloq'oniiq ruheb' li jalanil yos», li ink'a' eenawom ru laa'ex,

¹⁴ laa'at tento tatpatz'inq, taatz'il rix ut tatpatz'oq sa' xyaalal. Ut wi a'an yaal, wi wank k'aru nak'utunk wi' naq sa' eeyanq xb'aanumank li yib' aj na'leb' a'an,

¹⁵ tento naq laa'at taakamsiheb' chi q'esnal ch'iich' jo'k'ihaleb' wankeb' sa' li tenamit a'an, taasach ruheb' li poyanam chi junajwa rochb'een chixjunil li k'a'aq re ru wank chisa'.

¹⁶ Taatuub' chixjunil li k'aru xawisi aran sa' xyi li k'ayib'aal ut taak'e xxamlel li tenamit rochb'een jo'ch'inal jo'nimal x'isiik aran. Ut taab'aanu chixjunil a'in sa' xk'ab'a' li Qaawa' laaYos. Li tenamit a'an taakanaaq chi junelik cho'q po'lem ut moko taakab'lamanq ta chik.

¹⁷ “Maak'a' k'a'aq re ru li ak q'axtesinb'il re sache'k taakanaaq aawik'in, re naq taanume'q xjosq'il li Qaawa' ut a'anaq taxaq aj uxtaan aawik'in ut chiril taxaq xtoq'ob'aal aawu jo'wi' tatxtamb'resi taxaq, jo' xyeechi'om reheb' laana' laayuwa'.

¹⁸ Tixb'aanu chi jo'kan wi taawab'i xyaab' xkux li Qaawa' laaYos ut taapaab' chixjunil li xchaq'rab' xink'e aawe anaqwan, ut wanqat sa' tiikilal chiru li Qaawa' laaYos.