Daniel 6 - Q'eqchi Bible

Laj Daniel kikute'k sa' xyanqeb' li kaqkoj

¹ Laj Darío ki'alaak sa' xch'ool xxaqab'ankil waqk'aaleb' chi winq re naq a'aneb' te'jolominq re li junq teep chi tenamit li wank sa' li x'awab'ejihom;

² ut eb' a'an ke'kanaak rub'el xtaqlahomeb' oxib' chik ninqeb' xwankil, re naq chaab'il taa'elq li xk'anjeleb' ut ink'a' te'xb'alaq'i li awab'ej. Laj Daniel a'an jun sa' xyanqeb' li oxib' ninqeb' xwankil

³ ut q'axal wank xna'leb' sa' xyanqeb' li xkomon jo'wi' sa' xyanqeb' chixjunil laj jolominel, xb'aan naq nujenaq chi seeb'al k'a'uxl. Jo'kan naq li awab'ej kixk'oxla xk'eeb'al laj Daniel chi taqlank sa' xb'een chixjunil li awab'ejihom.

⁴ Toja' naq li xjolomileb' li junq teep chi tenamit jo'wi' eb' li ninqeb' xwankil ke'ok chi xsik'b'al k'aru te'xjit wi' laj Daniel chirix li xk'anjel; ab'anan maak'a' k'aru ke'xtaw xb'aan naq jwal tiik xch'ool laj Daniel ut maak'a' xmaak, maak'a' k'aru taaq'use'q wi'.

⁵ Ut eb' li winq a'an ke'xye chirib'ileb' rib': “Maak'a' k'aru tqajit wi' laj Daniel, ka'ajwi' chirix li xpaab'aal”, chankeb'.

⁶ Sa' junpaat li xjolomileb' li junq teep chi tenamit jo'wi' eb' li ninqeb' xwankil koheb' rik'in li awab'ej ut ke'xye re: “Sahaq taxaq laach'ool chi junelik, at awab'ej!

⁷ Chiqajunilo laj taqlanel sa' laa'awab'ejihom, eb' laj jolominel ut eb' li kok' ut ninqeb' xwankil xqak'uub' sa' junajil naq chi'elq junaq chaq'rab' kama' a'in: Chiru jun po maajun junaq winq naru taatijoq chiru jalanil yos malaj winq; ka'ajwi' chawu laa'at, at awab'ej. Li ani taaq'etoq re li chaq'rab' a'in, taakutmanq sa' xyanqeb' li kaqkoj.

⁸ Jo'kan utan, at awab'ej, k'e xwankil li chaq'rab' a'in ut juch' laak'ab'a' chisa', re naq ink'a' chijalmanq xyaalal jo' li xchaq'rab'eb' laj Media ut eb' laj Persia”.

⁹ Jo'kan naq laj Darío, li awab'ej, kixk'ulub'a li na'leb' a'in ut kixjuch' li xk'ab'a' sa' xhuhul li esil a'an.

¹⁰ Naq laj Daniel kixnaw a'an, koho sa' li rochoch. Li xwarib'aal wank sa' xkab' k'ojar li ochoch ut li xb'entaanil wank sa' xjayal Jerusalén; ox sut chiru li jun kutan laj Daniel naxwiq'ib' rib' chi tijok ut b'anyoxink chiru li xYos, jo' naxb'aanu junelik.

¹¹ Eb' li reemaaru aj winq ke'wulak sa' rochoch laj Daniel chi maak'a' sa' xch'ool ut koxe'xtaw chi tijok ut chi elajink chiru li xYos.

¹² Tikto ajwi' koheb' rik'in li awab'ej ut ke'xjultika wi' chik re li chaq'rab' k'eeb'il xb'aan ut ke'xye re: “Ma ink'a' xajuch' laak'ab'a' sa' li chaq'rab' b'arwi' naxye naq chiru jun po maajun naru taatijoq chiru junaq chik yos malaj winq, ka'ajwi' chawu laa'at, at awab'ej? Wi wanq junaq taaq'etoq re li chaq'rab' a'an, taakutmanq sa' xyanqeb' li kaqkoj”, chankeb'. Kichaq'ok li awab'ej ut kixye: “Jo'kan k'uub'anb'il, jo' chanru xchaq'rab'eb' laj Media ut eb' laj Persia”.

¹³ Toja' naq eb' a'an ke'xye wi' chik: “Ab'an laj Daniel, li kik'ame'k chaq Judá, ink'a' nakatxpaab', at awab'ej, chi moko naxpaab' li chaq'rab' li xajuch' wi' laak'ab'a'. Ox sut chiru li kutan natijok chiru li xYos”.

¹⁴ Naq li awab'ej kirab'i a'in, k'ajo' naq kiraho'k xch'ool ut kixsik' chan raj ru tixkol laj Daniel toj reetal ki'ewuuk.

¹⁵ Ab'anan eb' li winq a'an koheb' wi' chik chi ch'uut rik'in li awab'ej re xyeeb'al re: “Jultikaq aawe, at awab'ej, naq li xchaq'rab'eb' laj Media ut eb' laj Persia naxye naq maajun naru najalok xyaalal li chaq'rab' xaqab'anb'il xwankil xb'aan junaq awab'ej”, chankeb'.

¹⁶ Toja' naq li awab'ej kixtaqla xk'amb'al laj Daniel re naq taakute'q sa' xyanqeb' li kaqkoj. Ab'anan naq toj maji' nakutmank sa' xjuleb' li kaqkoj, laj Darío kixye re laj Daniel: “A' taxaq li Qaawa' laaYos, li nakak'anjela ru chi anchal laach'ool, chikoloq aawe sa' reheb' li kaqkoj”, chan. Ut ke'xkut sa' li jul.

¹⁷ Ke'xk'am jun nimla pek re xtz'apb'al re li xjuleb' li kaqkoj, ut li awab'ej kixkaaxti ru li pek; jo'kan ajwi' ke'xb'aanu eb' laj tenq' re, re naq ink'a' taajalmanq xyaalal li chaq'rab' xteneb'aak sa' xb'een laj Daniel.

¹⁸ Chirix chik a'an li awab'ej kisutq'iik sa' li rochoch ut ki'ayuunik chiru li q'oqyink: maajun li ixq kixk'ul rik'in chi moko kiwark xb'aan xk'a'uxl.

¹⁹ Naq kihik'e'k li kutan, li awab'ej kiwakliik ut koho chi junpaat wan wi' li xjuleb' li kaqkoj.

²⁰ Ut naq yo chi jilok, chi ra sa' xch'ool kixjap re chi xyeeb'al: “At Daniel, aj k'anjelat chiru li yo'yookil Yos ut li nakaloq'oni ru chi anchal laach'ool, ma xru laaYos chakolb'al sa' reheb' li kaqkoj?”, chan.

²¹ Ut laj Daniel kichaq'ok chaq: “Chiwanq taxaq aayu'am chi junelik, at awab'ej.

²² LinYos xtaqla chaq li x'ánjel chi xtz'apb'al li reheb' li kaqkoj, ut maak'a' junaq rahilal xe'xb'aanu we, xb'aan naq maak'a' inmaak chiru A'an chi moko xinb'aanu junaq ch'a'ajkilal chawu laa'at”, chan laj Daniel.

²³ Toja' naq li awab'ej k'ajo' naq kisaho'k sa' xch'ool ut chi junpaat kixtaqla risinkil laj Daniel sa' xyanqeb' li kaqkoj. Naq ke'risi chaq sa' xyanqeb' li xul, maajun xtiq'ilal ke'xtaw, xb'aan naq k'ojk'o li xch'ool rik'in li xYos.

²⁴ Moqon li awab'ej kixtaqla xk'amb'aleb' li winq li ke'jitok re laj Daniel, ut ke'kute'k sa' xyanqeb' li kaqkoj rochb'eeneb' li rixaqil jo'wi' eb' li ralal xk'ajol. Ut toj maji' ajwi' neke'wulak chi ch'och'el naq ke't'upiik ut ke'nuq'e'k xb'aaneb' li kaqkoj!

²⁵ Toja' naq laj Darío, li awab'ej, kixk'e chi tz'iib'aak li esil a'in reheb' chixjunil li tenamit ut poyanam li wankatqeb' sa' ruuchich'och', a' yaal chanru li raatinob'aaleb': “Chiwanq taxaq tuqtuukil usilal chi numtajenaq sa' eeyanq chejunilex.

²⁶ A'an a'in li ninchaq'rab'i wi' chixjunileb' li tenamit wankeb' sa' lin'awab'ejihom: naq che'roxloq'i ut che'xpaab' li xYos laj Daniel, xb'aan naq A'an tz'aqal li yo'yookil Yos ut wank chi junelik. Li x'awab'ejihom maajun wa taajuk'manq ut li xwankilal maajoq'e taalajq taa'oso'q.

²⁷ A'an nakolok ut na'isink sa' rahilal, naxb'aanu xninqal eetalil ut sachb'ach'oolej junsut junrub'el choxa. A'an li xkolok re laj Daniel sa' ruq'eb' li kaqkoj”.

²⁸ Ut laj Daniel q'axal kiwank xwankil chiru chixjunil li xyu'am sa' li x'awab'ejihom laj Darío ut laj Siro aj Persia.