Daniel 5 - Q'eqchi Bible

Li xninq'e laj Baltasar

¹ Laj Baltasar, li awab'ej, kixkawresi jun nimla ninq'e cho'q reheb' jun mil chi winq ninqeb' xwankil, ut chiruheb' ajwi' a'an ki'ok chi uk'ak b'iin.

² Naq ak yo xkalajik, kixtaqla xxokb'aleb' li sek' oor ut plaat, li ke'isiik chaq sa' rochoch li Yos aran Jerusalén, xb'aan laj Nabukodonosor li xyuwa'. Kixb'aanu chi jo'kan xb'aan naq taaraj uk'ak chisa', rochb'eeneb' li ninqeb' xwankil, eb' li rixaqil ut li xtz'aqob'leb' li rixaqil.

³ Tikto koxe'xxok chaq eb' li sek' oor ut plaat li ke'isiik chaq sa' rochoch li Yos aran Jerusalén, ut ki'uk'ak li awab'ej chisa', rochb'eeneb' li ninqeb' xwankil, eb' li rixaqil ut li xtz'aqob'leb' li rixaqil.

⁴ Ke'uk'ak b'iin chixjunileb' ut ke'xnima ru li xyoseb' yiib'anb'ileb' rik'in oor ut plaat, q'anch'iich' ut ch'iich', che' ut pek.

⁵ Sa' ajwi' li honal a'an k'utaamil li ruq' jun li winq ki'ok chi tz'iib'ak chiru li xtz'akul li rochoch li awab'ej, tz'aqal chirix li xna'aj kanteel. Naq li awab'ej kiril li uq'ej yo chi tz'iib'ak,

⁶ k'ajo' naq kisaqkirino'k li xnaq' ru, kisachk xch'ool, ke'lub'e'k li roq ut ke'parpotk li xtzelek.

⁷ Toja' naq li awab'ej kixjap re chi xb'oqb'aleb' chaq laj q'e, eb' laj nawal ut eb' laj tz'ilol rixeb' li chahim li wankeb' sa' xteepal Babilonia, ut kixye reheb': “Ani taa'iloq re li tz'iib'anb'il chiru li tz'ak ut tixch'olob' li xyaalal, taatiqib'aaq rik'in kaqi aq'ej reetalil li xwankil; taak'eemanq xq'ol oor chi xkux ut a'anaq li roxil chi taqlank sa' lin'awab'ejihom”, chan.

⁸ Chixjunileb' laj k'ehol na'leb' sa' rochoch li awab'ej ke'jilok chi rilb'al li tz'iib'anb'il chiru li tz'ak, ab'an ink'a' ke'ruuk chi xyaab'asinkil chi moko ke'xtaw ru.

⁹ Toja' naq li awab'ej kisaqkirino'k wi' chik, kisachk xch'ool, ut eb' laj k'anjel chiru mem ajwi' ke'kanaak.

¹⁰ Ab'an naq li rixaqil li awab'ej kirab'i naq japjo re chi aatinak jo'wi' eb' laj k'anjel chiru, ki'ok sa' li na'ajej b'arwi' yo li ninq'e ut kixye: “Najtaq taxaq roq laayu'am, at awab'ej! Misachk aach'ool chi moko tatsaqkirino'q xb'aan laaxiw.

¹¹ Sa' laa'awab'ejihom wank jun li winq nujenaq chi xmusiq' eb' li loq'laj yos. Chiru li x'awab'ejihom laj Nabukodonosor laayuwa', kik'utunk chi us naq li winq a'an seeb' xk'a'uxl ut jwal chaab'il xna'leb' jo'eb' li yos, ut kixaqab'aak cho'q xjolomileb' laj q'e, eb' laj nawal jo'wi' eb' laj tz'ilol rix li chahim,

¹² xb'aan naq q'axal q'es li xch'ool chi na'leb'ak, wank xnawom ut jwal seeb' xch'ool chi xtawb'al xyaalal eb' li matk', eb' li moy u ut chi xtuqub'ankil ru junaq ch'a'ajkilal. Yookin chi aatinak chirix laj Daniel, a' li Beltsasar kik'ehe'k cho'q xkab' xk'ab'a' xb'aan laayuwa'. Jo'kan utan chib'oqmanq chaq laj Daniel, ut a'an tixch'olob' ru li tz'iib'anb'il chiru li tz'ak”, chan li ixq.

¹³ Chi junpaat laj Daniel kik'ame'k wan wi' li awab'ej, ut a'in kixye re: “Ma laa'at laj Daniel, jun reheb' li ke'k'ame'k chaq xb'aan linyuwa' sa' li tenamit Judá?

¹⁴ Xwab'i resil naq wank aawik'in li xmusiq' eb' li loq'laj yos, jwal seeb' laak'a'uxl ut numtajenaq nim laachoxahil na'leb'.

¹⁵ Xe'k'ame'k chaq wik'in eb' laj k'ehol na'leb' ut eb' laj q'e re raj naq te'ril li tz'iib'anb'il a'in ut te'xch'olob' chiwu li k'aru naxye, ab'an ink'a' xe'ruhank chi xyeeb'al li xyaalal.

¹⁶ Wab'ihom resil naq laa'at nakatruuk chi xtawb'al xyaalal ut xtuqub'ankil ruheb' li ch'a'ajkilal. Us b'i', wi nakatruhank chi xyaab'asinkil ut xch'olob'ankil xyaalal li tz'iib'anb'il arin, tattiqib'aaq rik'in kaqi aq'ej, taak'eemanq jun q'ol oor chakux ut tatkanaaq sa' roxil chi taqlank sa' lin'awab'ejihom”.

¹⁷ Toja' naq laj Daniel kixye re li awab'ej: “Kanaaq aawik'in li taawaj xsihinkil we malaj k'e re jalan chik; ab'an laa'in tinyaab'asi li naxye li tz'iib'anb'il chiru li tz'ak ut tinch'olob' li xyaalalil.

¹⁸ “At awab'ej, li Nimajwal Yos kixk'e chi awab'ejink laj Nabukodonosor laayuwa'; kixk'e ajwi' xwankil ut xloq'al, re naq nawb'ilaq ut nimanb'ilaq ru xb'aaneb' chixjunil.

¹⁹ Ut sa' xk'ab'a' a'an chixjunileb' li tenamit, eb' li poyanam, a' yaal k'aru li raatinob'aaleb', ke'xiwak ut ke'siksotk chiru. Kixkamsi malaj kixkol li ani kiraj xch'ool, kixk'e xloq'al malaj kixsach xwankil li ani kiwulak chiru.

²⁰ Ab'anan kixnimob'resi rib' ut q'axal kiq'etq'eto'k; jo'kan naq ki'isiik sa' xwankil ut kimaq'e'k chiru li xloq'al.

²¹ Ki'isiik sa' xyanqeb' li poyanam ut kiwank jo' junaq xul; kiwank chaq sa' xyanqeb' li k'iche'il xul ut kiwa'ok pim jo'eb' li wakax. Kit'aqresiik xb'aan li xchu'ke, toj reetal kixk'e reetal naq li Nimajwal Yos a'an li nataqlank sa' xb'eeneb' li x'awab'ejihom li ruuchich'och' ut naxk'e xwankil li naraj wi' xk'eeb'al.

²² A'ut laa'at, a Baltasar li ralalat, us ta ak nakanaw chixjunil a'in, ink'a' xakub'si laawankil,

²³ xaq'etq'eti b'an aawib' chiru li xYos li choxa ut xataqla xk'amb'aleb' chaq arin li sek' oor li ke'k'anjelak sa' li rochoch, re uk'ak b'iin chisa' aawochb'eeneb' li ninqeb' xwankil, eb' laawixaqil jo'wi' li xtz'aqob'leb' laawixaqil. Xenima ruheb' li yos yiib'anb'ileb' rik'in oor ut plaat, q'anch'iich' ut ch'iich', che' ut pek, li ink'a' neke'ilok, ink'a' neke'ab'ink ut maak'a' neke'xtaw ru. Ut ink'a' xanima xloq'al li Yos li wank laayu'am sa' ruq', ut li yaal re sa' xb'een chixjunil li nakab'aanu.

²⁴ Jo'kan naq li Yos xtaqla chaq li uq'ej a'an chi xtz'iib'ankil eb' li aatin a'in:

²⁵ Mene mene, Tékel ut Parsín.

²⁶ Ut a'an a'in li xyaalal: Mene naraj naxye, li Yos ak xrajlaheb' li kutan tatwanq wi' chi awab'ejil ut anaqwan ak xraqe'k laawankil.

²⁷ Tékel naraj naxye, ak xatb'ise'k sa' li peex ut xtawmank naq ink'a' tz'aqal laawaalal.

²⁸ Parsín naraj naxye, ak jachb'il chik ru laa'awab'ejihom ut xk'eemank reheb' laj Media ut eb' laj Persia”, chan laj Daniel.

²⁹ Toja' naq laj Baltasar kixye naq chitiqib'aaq laj Daniel rik'in kaqi aq'ej, ut kixk'e chi xkux jun q'ol oor. Kixtaqla ajwi' resil naq laj Daniel a'an chik li roxil chi taqlank.

³⁰ Chiru ajwi' li q'oqyink a'an kikamsiik laj Baltasar, awab'ej re Kaldeha.

³¹ Laj Darío aj Media a'an chik ki'ok chi awab'ejink naq ak wank wiib' xkaak'aal chihab' re.