Daniel 4 - Q'eqchi BibleLaj Nabukodonosor kimatk'ek wi' chik ut kikaano'k ru 1 A'an a'in li esil kixtaqla laj Nabukodonosor, li awab'ej, reheb' chixjunil li poyanam ut tenamit li wankatqeb' sa' ruuchich'och', a' yaal chanru li raatinob'aaleb': Chiwanq taxaq tuqtuukil usilal chi numtajenaq sa' eeyanq chejunilex. 2 Chi sa sa' inch'ool nawaj xk'eeb'al chenaw li xninqal b'aanuhom ut sachb'ach'oolej xb'aanu we li Nimajwal Yos. 3 K'ajo' xninqal li sachb'ach'oolej naxb'aanu, q'axal numtajenaq xwankil li xb'aanuhom! Li x'awab'ejihom wank chi junelik, ut li xwankilal ink'a' taalajq taa'oso'q. 4 Laa'in laj Nabukodonosor jwal sa sa' inch'ool ut k'ojk'o li waanm naq wankin chaq sa' xnimal ru li wochoch. 5 Ab'anan sa' jun q'oqyink xinmatk'ek ut xinxiwak xb'aan. Li moy u li xwil naq sotsookin chiru linch'aat ut li k'a'aq re ru xnume'k sa' inch'ool k'ajo' naq xine'xxib'esi. 6 Toja' naq xinb'oqeb' chixjunileb' laj k'ehol na'leb' li wankatqeb' sa' xteepal Babilonia, re naq te'xch'olob' chiwu li xyaalalil li moy u. 7 Xe'chalk eb' laj q'e ut eb' laj nawal, eb' laj k'ehol na'leb' jo'wi' eb' laj tz'ilol rixeb' li chahim, ut xinseeraq'i reheb' li moy u, ab'an maajun reheb' xru xch'olob'ankil li xyaalal. 8 Moqon chik xchalk wik'in laj Daniel, Beltsasar nayeemank re sa' xk'ab'a' linyos. A'an jun winq li wank li xmusiq' eb' li loq'laj yos, ut xinseeraq'i re linmatk': 9 “At Beltsasar, xjolomilat eb' laj q'e -chankin- ninnaw naq nujenaqat chi xmusiq' eb' li loq'laj yos ut maak'a' muqmu chawu. Ab'i k'aru xwil sa' moy u ut ch'olob' chiwu li xyaalal. 10 A'an a'in li xwil naq yokyookin chiru linch'aat: “Xwil jun toon chi che' jwal najt xteram sa' xyi li ruuchich'och'. 11 Li che' xk'iik ut xnimank, toj reetal xwulak li xteram sa' choxa ut xk'utunk toj sa' chixjunil li ruuchich'och'. 12 Q'axal ch'ina'us neke'ilok eb' li ruq' ut k'ajo'eb' li ru: aran wank tzekemq cho'q reheb' chixjunil. Sa' xmu neke'hilank chixjunileb' li k'iche'il xul ut neke'sukub'k eb' li xik'anel xul sa'eb' li ruq'; rik'ineb' li ru li che' a'an neke'tzekank chixjunileb' li wankeb' xyu'am. 13 Naq toj yookin chi matk'ek sa' linwarib', xkub'e chaq sa' choxa jun aj santil k'aak'alenel 14 ut xye chi kaw xyaab' xkux: «T'anomaq li che', yok'omaq eb' li ruq', jilomaq li xxaq ut kutomaq chi najt eb' li ru. Elqeb' li xul sa' li xmu ut eb' li xik'anel xul sa'eb' li ruq'. 15 Ka'ajwi' li xxe' ut li xtoonal kanab'omaq sa' ch'och', sa' xyanq li pim, ut b'ak'omaq rik'in kareen ch'iich' ut q'anch'iich'. Chit'aqresiiq xb'aan li xchu'ke ut chixtzeka li pim jo'eb' li k'iche'il xul. 16 Li che' a'an reetalil jun li winq. Chiru wuqub' chihab' chiwanq jo' junaq xul: chik'oxlaq ut china'leb'aq jo' naxb'aanu junaq xul. 17 A'an a'in li raqb'a aatin xxaqab'aak xb'aaneb' laj santil k'aak'alenel, re naq taanawmanq xb'aaneb' chixjunileb' li poyanam naq li Nimajwal Yos nataqlank sa' xb'eeneb' li x'awab'ejihom li ruuchich'och': naxk'e xwankil li naraj wi' xk'eeb'al ut naxterq'usi xloq'al li jwal kub'enaq xwankil sa' xyanqeb' chixjunil li poyanam». 18 “A'an a'in li xinmatk'e -chan laj Nabukodonosor li awab'ej-. At Beltsasar, ch'olob' chiwu li xyaalalil xb'aan naq maajun reheb' laj q'e li wankeb' rub'el inwankil xe'ruuk chi xtawb'al xyaalal. Ab'an laa'at tatruuq, xb'aan naq wank aawik'in li xmusiq' li Yos q'axal sant”. 19 Toja' naq laj Daniel, Beltsasar nayeemank re, kisachk xch'ool ut mem kikanaak chiru jun k'amok xb'aan li xk'a'uxl. Ab'an li awab'ej kixye re: “Matxiwak, a Beltsasar, ut mi'ok aak'a'uxl xb'aan li matk' a'in chi moko xb'aan li xyaalal”. Kichaq'ok laj Beltsasar ut kixye: “At awab'ej, rehaqeb' taxaq li xik' neke'ilok aawe li matk' a'in; ut chinaq ta li xyaalalil sa' xb'eeneb' li neke'majewank aawe. 20 Laa'at xawil jun li che' yo chi k'iik ut chi nimank xsa', toj reetal xwulak li xteram sa' choxa ut xk'utunk sa' chixjunil li ruuchich'och'. 21 Q'axal ch'ina'us neke'ilok eb' li ruq' ut k'ajo'eb' li ru: aran wank tzekemq cho'q reheb' chixjunil. Sa' xmu neke'hilank chixjunileb' li k'iche'il xul ut neke'sukub'k eb' li xik'anel xul sa'eb' li ruq'; rik'ineb' li ru li che' a'an neke'tzekank chixjunileb' li wankeb' xyu'am. 22 Li che' a'an a'anat laa'at, at awab'ej: laa'at li xnimank laawankil, li jwal kaw aawib', laa'at li xnumtaak laawankilal ut xwulak toj sa' choxa; laa'awab'ejihom xwulakje'k toj sa' xmaril li ruuchich'och'. 23 “Xawil ajwi' naq jun aj santil k'aak'alenel xkub'e chaq sa' choxa ut xye: «T'anomaq li che', sachomaq chixjunil, ab'an kanab'omaq li xtoonal ut li xxe', chi b'ak'b'ooq rik'in kareen ch'iich' ut q'anch'iich', sa' xyanq li pim; chit'aqresiiq xb'aan li xchu'ke, ut chiru wuqub' chihab' chiwa'aq pim sa' xyanqeb' li xul». 24 At awab'ej, a'an a'in li xyaalalil ut a'in li teneb'anb'il sa' aab'een xb'aan li Nimajwal Yos: 25 Tat-isiiq sa' xyanqeb' li poyanam ut tatwanq sa' xyanqeb' li k'iche'il xul; tattzekanq ichaj jo'eb' li wakax ut tatxt'aqresi li xchu'ke. Jo'ka'in naq tatwanq chiru wuqub' chihab', toj reetal taataw ru naq li Nimajwal Yos a'an li nataqlank sa' xb'eeneb' li x'awab'ejihom li ruuchich'och' ut naxk'e xwankil li naraj wi' xk'eeb'al. 26 “Xyeemank sa' laamoy u naq toj taakanaaq li xtoonal ut eb' li xxe' li che'; ut a'an naraj naxye naq taak'eemanq wi' chik aawe laa'awab'ejihom, ab'an toj taapaab' naq chixjunil li wankilal nachalk rik'in li Yos. 27 Jo'kan utan, at awab'ej, paab' li na'leb' tink'e aawe: toj rix laamaak rik'in xb'aanunkil li tiikilal ut xtenq'ankileb' li neb'a', ut matmaakob'k chik re naq sahaq taxaq aach'ool chi junelik”. 28 Ut relik chi yaal naq chixjunil a'in kixk'ul laj Nabukodonosor, li awab'ej. 29 Jun chihab'aq chik a'an, naq yo chi b'eek li awab'ej sa' xka' k'ojar li rochoch aran Babilonia, 30 kixye sa' xch'ool: “A'an a'in li nimla Babilonia li xinwaklesi cho'q xnimal tenamit rik'in linwankilal, re xk'utb'al linloq'al chiruheb' chixjunil”. 31 Toj yo ajwi' xyeeb'al eb' li aatin a'in li awab'ej, naq ki'ab'imank jun xyaab' kuxej kichalk chaq sa' choxa ut kixye: “Aawik'in nin'aatinak, a Nabukodonosor. Xmaq'mank chawu laa'awab'ejihom. 32 Tat-isiiq sa' xyanqeb' li poyanam ut tatwanq sa' xyanqeb' li k'iche'il xul; tattzekanq ichaj jo'eb' li wakax ut jo'kan tatwanq chiru wuqub' chihab', toj reetal taataw ru naq li Nimajwal Yos a'an li nataqlank sa' xb'eeneb' li x'awab'ejihom li ruuchich'och' ut naxk'e li wankilal re li ani naraj wi' xk'eeb'al”. 33 Sa' junpaat kitz'aqlok ru li aatin a'in rik'in laj Nabukodonosor: ki'isiik sa' xyanqeb' li poyanam, kixwa' li pim jo'eb' li wakax, kit'aqresiik xb'aan li xchu'ke ut kichamo'k eb' li rismal jo' xxik'eb' li t'iw ut li rixi'ij ke'k'iik jo' rixi'ijeb' li xik'anel xul. Xk'irajik laj Nabukodonosor 34 “Naq ak xnume'k li wuqub' chihab', laa'in laj Nabukodonosor xintaqsi li wilob'aal sa' choxa ut xk'ulunk wi' chik linch'ool. Toja' naq xwusilaatina li Nimajwal Yos, xinnima xloq'al ut xinterq'usi xk'ab'a' li Yo'yo junelik: li xnimal xwankil wank chi junelik ut li x'awab'ejihom taakanaaq junq'e junq'e kutan. 35 Chiru A'an maak'a' neke'ok wi' eb' li poyanam sa' ruuchich'och'. Naxb'aanu li k'aru naraj rik'ineb' li wankeb' sa' choxa jo' ajwi' rik'ineb' li wankeb' sa' ruuchich'och'; maajun naxkuy wank chiru ut maa'ani taapatz'oq re k'a'ut naq naxb'aanu chi jo'kan. 36 “Sa' ajwi' li honal a'an xk'ulunk linch'ool ut xink'ul wi' chik linloq'al, linwankil, jo' ajwi' lin'awab'ejihom. Eb' laj k'ehol inna'leb' ut eb' li ninqeb' xwankil xoline'ril, xine'xxaqab' wi' chik cho'q awab'ej ut q'axal chik xe'xk'e inwankil. 37 “Ut anaqwan, laa'in laj Nabukodonosor ninnima, ninterq'usi ut ninloq'oni ru li Awab'ej wank sa' choxa, xb'aan naq naxb'aanu chixjunil sa' tiikilal ut tz'aqal yaal, ut naxkub'si xwankil li ani naxq'etq'eti rib'”. |
Q'eqchi DC Bible © Bible Society in Guatemala, 2005.
Bible Society in Guatemala