Daniel 3 - Q'eqchi Bible

Ke'xloq'oni ru jun li jalam u oor

¹ Laj Nabukodonosor kixk'e chi yiib'aak jun li jalam u oor, wan b'eleelaju moqoj li xteram ut oxlaju k'utub' li xnimal ru, ut kixye naq chixaqab'aaq sa' xtaq'ahil Duur, sa' xteepal Babilonia.

² Chirix chik a'an li awab'ej kixch'utub' chixjunileb' laj k'anjel chiru, eb' li xninqal ru winq, eb' laj jolominel, eb' laj k'ehol na'leb', laj k'uulahomeb' tumin, eb' laj raqol aatin ut eb' laj nawol chaq'rab' sa' xsutam Babilonia, re naq te'wanq sa' xninq'ehinkil ru li jalam u li kik'ehe'k chi yiib'aak xb'aan.

³ Ke'ch'utlaak chixjunileb' laj k'anjel chiru li awab'ej, eb' li xninqal ru winq, eb' laj jolominel, eb' laj k'ehol na'leb', laj k'uulahomeb' tumin, eb' laj raqol aatin ut eb' laj nawol chaq'rab' sa' chixjunil xteepal Babilonia, re xninq'ehinkil ru li jalam u li kiyaalo'k; ut chixjunileb' xaqxookeb' chi xk'atq li jalam u kixk'e chi yiib'aak laj Nabukodonosor.

⁴ Toja' naq laj yehol esil kixye chi kaw xyaab' xkux: “Ex poyanam ut chejunilex laa'ex li xexchalk sa' jalan jalanq chi tenamit ut nekex'aatinak sa' jalan jalanq chi aatinob'aal, naqak'e chenaw a'in:

⁵ Naq teerab'i chi yaab'asiik li pur, li xolb', li kitaar, li aarp, li tzojtzoj, li tun ut chixjunil li k'iila paay chi wajb', b'uchub'omaq eerib' chiru ch'och' re xloq'oninkil li jalam u oor li xk'e chi yiib'aak laj Nabukodonosor, li awab'ej.

⁶ Li ink'a' tixb'uchub' rib' chiru ch'och' chi xloq'oninkil, sa' junpaat taakutmanq sa' xam li k'ajo' xtiqwal”.

⁷ Ut relik chi yaal naq kiyaab'asiik li pur, li xolb', li kitaar, li aarp, li tzojtzoj, li tun ut chixjunil li k'iila paay chi wajb', chixjunileb' li poyanam, eb' li tenamit li neke'aatinak sa' jalan jalanq chi aatinob'aal, ke'xb'uchub' rib' chi xloq'oninkil ru li jalam u li kixk'e chi yiib'aak laj Nabukodonosor.

⁸ Ab'anan wankeb' aj Kaldeha koheb' chi xjitb'aleb' laj Judiiy

⁹ chiru laj Nabukodonosor li awab'ej, ut ke'xye re: “At awab'ej, sahaq taxaq aach'ool chi junelik!

¹⁰ Laa'at xak'e li chaq'rab' a'in: Naq taayaab'asimanq li pur, li xolb', li kitaar, li aarp, li tzojtzoj, li tun ut chixjunil li k'iila paay chi wajb', xb'uchub'aqeb' rib' chiru ch'och' chixjunileb' li poyanam chi xloq'oninkil ru li jalam u oor,

¹¹ ut li ani ink'a' tixloq'oni ru li jalam u, sa' junpaat chikutmanq sa' xam li k'ajo' xtiqwal.

¹² Ab'anan wankeb' aj Judiiy, a' laj Sidrak, laj Misak ut laj Abdénago, li xaxaqab'eb' chi xjolominkil li xteepalil Babilonia, ink'a' nakate'xpaab', at awab'ej. Ink'a' neke'raj k'anjelak chiru laayos chi moko xloq'oninkil ru li jalam u xak'e chi yiib'aak”.

¹³ Toja' naq laj Nabukodonosor k'ajo' naq kichalk xjosq'il, ut kixb'oqeb' chaq laj Sidrak, laj Misak ut laj Abdénago, ut naq ke'oksiik chiru,

¹⁴ kixpatz' reheb': “Ma yaal, a Sidrak, Misak ut Abdénago, naq ink'a' yookex chi k'anjelak chiru linyos ut ink'a' nekeloq'oni ru li jalam u xink'e chi yiib'aak?

¹⁵ Anaqwan naq teerab'i chi yaab'asiik li pur, li xolb', li kitaar, li aarp, li tzojtzoj, li tun ut chixjunil li k'iila paay chi wajb', ma teeb'uchub' eerib' chi xloq'oninkil ru li jalam u oor li xink'e chi yiib'aak? Xb'aan naq wi ink'a' teeloq'oni ru, sa' junpaat texkute'q sa' li xam li k'ajo' xtiqwal; toja' naq k'a' chik chi yosil taakoloq eere sa' wuq'?”, chan li awab'ej.

¹⁶ Laj Sidrak, laj Misak ut laj Abdénago ke'chaq'ok ut ke'xye re laj Nabukodonosor li awab'ej: “Moko na'ajmank ta ru naq tqasume li patz'om a'in.

¹⁷ Wi li Yos li naqaloq'oni ru naraj qakolb'al chiru li xam li k'ajo' xtiqwal ut sa' laawuq' laa'at, at awab'ej, tooxkol.

¹⁸ Ab'anan wi ink'a' tooxkol, ch'olch'ooq chawu, at awab'ej, naq ink'a' took'anjelaq chiruheb' laayos chi moko tqaloq'oni ru li jalam u xak'e chi yiib'aak”, chankeb'.

Eb' li oxib' chi saaj winq ink'a' ke'k'ate'k sa' li xam

¹⁹ Laj Nabukodonosor k'ajo' naq kikaqo'k xb'aan xjosq'il chirix laj Sidrak, laj Misak ut laj Abdénago, ut kixye naq chik'eemanq xxamlel li k'atleb'aal wuqub' wa chik chiru li xtiqwal.

²⁰ Kixye ajwi' reheb' laj puub' li q'axal kaweb' rib' naq te'xb'ak' laj Sidrak, laj Misak ut laj Abdénago, re xkutb'aleb' sa' li xam k'ajo' xtiqwal.

²¹ Ut sa' junpaat eb' li oxib' chi saaj winq ke'b'ak'e'k rik'in chixjunil li xb'aataleb' ut ke'kute'k sa' li xam k'ajo' xtiqwal.

²² Jwal aajel ru xpaab'ankil raatin li awab'ej ut k'ajo' xtiqwal li xam; jo'kan naq li raq'xam kixkamsiheb' li winq ke'kutuk reheb' laj Sidrak, laj Misak ut laj Abdénago sa' li xam.

²³ Ut eb' li oxib' chi saaj winq ke't'ane'k sa' li lochlookil k'atleb'aal, chi b'ak'b'ookeb' chi xjunxaqalileb'.

²⁴ Toja' naq laj Nabukodonosor, li awab'ej, kiwakliik chi junpaat sa' li xk'ojarib'aal ut, chi sachso xch'ool, kixpatz' reheb' laj k'ehol xna'leb': “Ma ink'a' tab'i' oxib'eb' chi winq ut b'ak'b'ookeb' naq xqakuteb' sa' li xam?”, chan. Ke'chaq'ok eb' a'an: “Jo'kan tz'aqal, at awab'ej”, chankeb'.

²⁵ “Ab'an laa'in yookin chi rilb'al kaahib' chi winq hithookeb' chik, ut yookeb' chi b'eek sa' xyi li xam chi maak'a' b'ayaq xe'xk'ul; ut li xka a'an chanchan jun ánjel”, chan li awab'ej.

²⁶ Toja' naq laj Nabukodonosor kijilok chire li xam li k'ajo' xtiqwal ut kixye: “Sidrak, Misak ut Abdénago, aj k'anjelex chiru li Nimajwal Yos, elenqex chaq ut kimqex arin”. Ut eb' a'an ke'elk chaq sa' li xam.

²⁷ Tikto eb' laj k'anjel chiru li awab'ej, eb' li xninqal ru winq, eb' laj jolominel ut eb' laj k'ehol xna'leb' li awab'ej ke'jilok chi xk'atqeb' li oxib'eb' re rilb'aleb' chi us; ut ke'xk'e reetal naq li xam maak'a' xb'aanu reheb', moko k'atalkeb' ta li rismaleb', tz'aqal re ru li xb'aataleb', ut moko wank ta xb'ook li sib' chiruheb'.

²⁸ Toja' naq laj Nabukodonosor kixjap re chi yeeb'al: “Usilaatinanb'il taxaq li xYos laj Sidrak, laj Misak ut laj Abdénago, xb'aan naq xtaqla li x'ánjel chi xkolb'aleb' laj k'anjel chiru. Eb' li saaj al a'in k'ojk'o xch'ooleb' rik'in li xYos ut xe'xq'et li xtaqlahom li awab'ej; q'axal chik xe'xra li kamk chiru xloq'oninkil ut xk'anjelankil ru jalan chik yos li ink'a' xnawomeb' ru.

²⁹ Jo'kan naq laa'in nink'e li chaq'rab' a'in: chixjunil li winq, a' yaal b'ar xtenamit, malaj xteepalil malaj ut raatinob'aal, li taa'aatinaq yib'ru chirix li xYos laj Sidrak, laj Misak ut laj Abdénago, taakamsiiq chi putz'inb'il ut taajuk'manq chixjunil li rochoch, xb'aan naq maak'a' chik junaq Yos taaruhanq chi kolok jo' li Yos a'in”.

³⁰ Chirix chik a'an li awab'ej kixk'eheb' xwankil chi yo'oon reheb' li oxib' chi saaj al, sa' xb'een xteepalil Babilonia.