Daniel 2 - Q'eqchi Bible

Li xmatk' laj Nabukodonosor

¹ Ak wiib' chihab' rokik chi awab'ejink laj Nabukodonosor, kiwank jun xmatk' li jwal kik'ehok xk'a'uxl, toj reetal ink'a' chik sa nawark xb'aan.

² Toja' naq li awab'ej kixtaqla xb'oqb'aleb' laj q'e ut eb' laj nawal, eb' laj k'ehol na'leb' jo'wi' eb' laj tz'ilol rixeb' li chahim, re naq te'xch'olob' chiru k'aru xyaalal li xmatk'. Ut naq ke'wulak rik'in,

³ li awab'ej kixye reheb': “Xinmatk'ek ut k'ajo' ink'a'uxl xb'aan. Nawaj xtawb'al ru k'aru xyaalal linmatk'”.

⁴ Eb' laj q'e ke'raatina li awab'ej sa' li aatinob'aal arameo, ut ke'xye re chi jo'ka'in: “At awab'ej, sahaq taxaq laach'ool chi junelik. Seeraq'i qe laamatk' ut laa'o tqach'olob' xyaalal chawu”, chankeb'.

⁵ Kixye li awab'ej reheb': “Ch'olch'ooq cheru li ninb'aanu: wi ink'a' nekeye we li xinmatk'e ut ink'a' nekech'olob' chiwu li xyaalal, chi putz'inb'il naq tex'oso'q ut taajuk'manq leerochoch.

⁶ Ab'anan wi teeye we li k'aru xinmatk'e ut k'aru naraj naxye, texinq'ajkamu chi us, tink'e eesimaatan ut eeloq'al. Jo'kan utan, yehomaq we linmatk' ut li xyaalal”.

⁷ Eb' laj q'e ke'xye wi' chik: “At awab'ej, seeraq'i qe laamatk' ut laa'o tqach'olob' li xyaalal”.

⁸ Tikto li awab'ej kixye reheb': “Xink'e reetal naq yookex chi royb'eninkil naq taanume'q li kutan, xb'aan naq nekenaw li ak k'uub'k'u inb'aan.

⁹ Wi ink'a' nekeye we linmatk' jo'wi' li xyaalal, juntaq'eet ajwi' li tojb'amaak teek'ul chejunilex, xb'aan naq xek'e eerib' sa' aatin re intik'ti'inkil ut inb'alaq'inkil re naq us tex'elq. Yehomaq b'i' we li matk' ut rik'in a'an tintaw ru naq teeye ajwi' we li xyaalal”.

¹⁰ Toja' naq eb' laj q'e ke'xye re li awab'ej: “Maajun junaq sa' ruuchich'och' taaruuq chi xyeeb'al li k'aru nakawaj xnawb'al, at awab'ej. Chi moko wank junaq awab'ej, yal ta jwal nim xwankil ut xloq'al, tixpatz' a'an reheb' laj q'e, eb' laj k'ehol na'leb' ut laj tz'ilol rixeb' li chahim.

¹¹ Li k'aru nakapatz', at awab'ej, a'an q'axal ch'a'aj xsumenkil, ut maajun junaq truuq chi xyeeb'al aawe, ka'ajeb' ajwi' eb' li yos; ab'anan moko wankeb' ta sa' xyanqeb' li poyanam!”.

¹² Toja' naq li awab'ej k'ajo' naq kichalk xjosq'il ut kixye naq che'kamsiiq chixjunileb' laj k'ehol na'leb' sa' xteepal Babilonia.

¹³ Ki'elk li chaq'rab' re xkamsinkileb' laj k'ehol na'leb', ut ke'sik'e'k ajwi' laj Daniel ut eb' li rochb'een re risinkileb' xyu'am.

Laj Daniel kixch'olob' ru li matk'

¹⁴ Laj Daniel rik'in chaab'il k'a'uxl ut q'unil aatin kiraatina laj Aryok, xjolomileb' laj k'aak'alenel re li awab'ej, li ak ok raj re chi xkamsinkileb' laj k'ehol na'leb' re Babilonia.

¹⁵ Koho laj Daniel ut koxpatz' re laj Aryok laj jolominel: “K'a'ut naq li awab'ej xk'e li chaq'rab' a'in jwal ra?”, chan. Toja' naq laj Aryok kixtikib' xch'olob'ankil chi us li xk'ulmank,

¹⁶ ut laj Daniel koho rik'in li awab'ej re xtz'aamankil chiru naq chixkuyaq jun k'amokaq chik, re naq truuq xch'olob'ankil xyaalal li xmatk'.

¹⁷ Chirix chik a'an laj Daniel kisutq'iik sa' rochoch, ut aran kixseeraq'i re laj Ananías, laj Misael ut laj Asarías, li rochb'eeneb', li k'aru yo chi k'ulmank.

¹⁸ Kixtz'aama ajwi' chiruheb' naq tijoqeb' chiru li Qaawa', re xpatz'b'al xnimal ruxtaan li xYos li choxa chirix li tz'aptz'ookil na'leb' a'an, re naq ink'a' te'kamsiiq rochb'eeneb' laj k'ehol na'leb' re Babilonia.

¹⁹ Ut chiru ajwi' li q'oqyink a'an li Qaawa' kixk'utb'esi chiru laj Daniel li xyaalalil li matk', ut laj Daniel kiyoxink chiru li xYos li choxa,

²⁰ ut kixye chi jo'ka'in: “Chinimaaq taxaq xk'ab'a' li Qaawa' chi junelik q'e kutan, xb'aan naq re A'an li choxahil na'leb' ut li wankilal.

²¹ Li Qaawa' wank xwankil sa' xb'eeneb' li kutan ut naxtaqla chaq li saq'ehil ut li hab'alq'e. A'an naxaqab'ank ut na'isink reheb' li awab'ej; naxk'e xchoxahil na'leb'eb' laj k'ehol na'leb' ut naxsi li xnimal nawom reheb' li seeb'eb' xk'a'uxl.

²² A'an nak'ehok chi kutankil li muqmuukil k'a'uxl ut li ch'a'aj xtawb'al ru; naxnaw li k'aru muqmu sa' li aak'ab', xb'aan naq na'ochb'eeniik xb'aan li kutan saqenk.

²³ Ninb'anyoxink chawu, at Qaawa', xYosat eb' linxe'toonil yuwa', xb'aan naq xak'e inchoxahil na'leb' ut inwankilal; xak'ut chiqu xyaalal li xqatz'aama aawe ut xak'e chiqanaw li yo wi' xk'a'uxl li awab'ej”.

²⁴ Chirix a'an laj Daniel kiwulak rik'in laj Aryok, li kixaqab'aak xb'aan li awab'ej re xkamsinkileb' laj k'ehol na'leb' re Babilonia, ut kixye re: “Maakamsiheb' laj k'ehol na'leb' re Babilonia. K'amin toj wan wi' li awab'ej, ut laa'in tinch'olob' chiru li xyaalalil li xmatk'”.

²⁵ Laj Aryok kixseeb'a rib' chi xk'amb'al laj Daniel rik'in li awab'ej ut kixye re: “At awab'ej, xintaw jun li winq sa' xyanqeb' li ke'k'ame'k chaq Judá, li naru xch'olob'ankil chawu li xyaalalil laamatk'”, chan laj Aryok.

²⁶ Toja' naq li awab'ej kixpatz' re laj Daniel, Beltsasar li xkab' xk'ab'a': “Ma tatruhanq chi xyeeb'al we linmatk' ut xch'olob'ankil li xyaalal?”, chan.

²⁷ Kichaq'ok laj Daniel ut kixye chi jo'ka'in: “Maajun junaq aj q'e, aj nawal, aj k'ehol na'leb' ut aj tz'ilol rixeb' li chahim te'ruhanq chi xch'olob'ankil chawu li taawaj xnawb'al, at awab'ej.

²⁸ Ab'anan wank jun Yos sa' choxa li nakutanob'resink re li muqmuukil na'leb', at awab'ej, ut A'an xk'e chanaw li k'aru taak'ulmanq sa' roso'jikeb' li kutan. Laamatk' ut li moy u li xawil naq yookat chi wark, a'aneb' a'in:

²⁹ “At awab'ej, naq wankat chaq sa' laach'aat, yookat chi k'oxlak chirix li taak'ulmanq sa'eb' li kutan chaalel. Ut li Yos li nakutanob'resink re li muqmuukil na'leb' xk'utb'esi chawu li k'aru taak'ulmanq.

³⁰ Laa'in ajwi' xk'utb'esiik chiwu li tz'aptz'ookil na'leb' a'in: moko xb'aan ta naq q'axal naab'al inna'leb' chiru chixjunileb' li poyanam, yal re b'an xch'olob'ankil chawu li xyaalalil, at awab'ej, ut re ajwi' taataw ru li k'aru yo wi' laak'a'uxl.

³¹ “Laa'at, at awab'ej, xawil sa' moy u jun nimla jalam u xaqxo chawu, q'axal nalemtz'unk ru ut jwal xiwajel rilb'al.

³² Li xjolom a'an tz'aqal chaab'il oor; eb' li xtel ut li re xch'ool a'an tz'aqal plaat; li ru xsa' ut li xyi rix a'an q'anch'iich';

³³ eb' li ra' a'an junes ch'iich'; ut eb' li roq a'an yiijach ch'iich' ut yiijach seb'.

³⁴ Naq yookat chi rilb'al a'an, jun li pek x'eelunk chaq sa' xna'aj, chi maajun kitoch'ok chaq re, ut kolnaqk chi roq li jalam u ut kixkok'putz'i.

³⁵ Kijuk'e'k chixjunil li jalam u ut kixk'aji rib': li ch'iich' ut li seb', li q'anch'iich', li plaat ut li oor chanchan junes chaqik'im sa' saq'ehil naq xkanaak, ut xk'ame'k chixjunil xb'aan li iq' chi ink'a' xkanaak reetalil. Ab'an li pek li xjuk'uk re li jalam u, xkanaak cho'q nimla tzuul ut xram ru chixjunil li ruuchich'och'.

³⁶ “A'an a'in laamatk', ut anaqwan tinch'olob' chawu li xyaalal.

³⁷ Laa'at li awab'ej q'axal nim laawankil sa' xb'eeneb' li awab'ej, xb'aan naq li xYos li choxa xk'e aakawilal, aawankil ut xnimal aaloq'al.

³⁸ A'an xk'ehok rub'el laawoq eb' li poyanam, eb' li ketomq jo'wi' eb' li xul neke'xik'ank chiru choxa, ut xxaqab' aawankil sa' xb'een chixjunil li ruuchich'och'. Laa'at li jolomej oor, at awab'ej.

³⁹ “Moqon chik taawakliiq chaq jun chik awab'ejihom, ab'an kub'enaqaq xwankil chawu, ut chirix a'an taawanq jun rox awab'ejihom, jo' li q'anch'iich', li taataqlanq sa' xb'een chixjunil li ruuchich'och'.

⁴⁰ “Moqon chik taawakliiq chaq jun xka awab'ejihom, jwal kawaq rib' jo' li ch'iich'. Kama' li ch'iich' naxputz'i ut naxke' chixjunil, jo'kan ajwi' tixb'aanu li awab'ejihom a'an reheb' chixjunil li tenamit.

⁴¹ At awab'ej, laa'at xawil ajwi' naq eb' li roq ut li ru'uj roq yiijach ch'iich' ut yiijach seb'. A'in naraj naxye naq li xka awab'ejihom jachjooq chirib'il, us ta kawaq b'ayaq rib', xb'aan naq xak'e reetal naq eb' li roq yiib'anb'il rik'in ch'iich' ut seb'.

⁴² Eb' li ru'uj roq yiijach ch'iich' ut yiijach seb', a'an reetalil naq li awab'ejihom a'an yiijach kawaq rib' ut yiijach ink'a'.

⁴³ Jo' naq xawil li ch'iich' xlaq'ab'ahom rib' rik'in li seb', jo'kan ajwi' eb' laj jolominel re li awab'ejihom a'an te'xk'amatq rib' sa' aatin; ab'an ink'a' junajaq li xch'ooleb', jo' naq li ch'iich' ink'a' naxjunaji rib' rik'in li seb'.

⁴⁴ “Chiru li xyu'amileb' li awab'ej a'an, li xYos li choxa tixwaklesi chaq jun awab'ejihom li maajun wa taajuk'manq, chi moko taakanaaq rub'el xwankil jalan chik tenamit. Tixjuk'i ut tixputz'iheb' li awab'ejihom junch'ol, ut a'an wanq xwankil chi junelik.

⁴⁵ A'an a'in li xyaalal li pek li xtolk'ok chaq sa' li tzuul chi maajun kitoch'ok chaq re, ut kolxputz'i li q'anch'iich' ut li seb', li ch'iich', li plaat ut li oor. “At awab'ej, jo'ka'in naq li Nimajwal Yos xk'utb'esi chawu li taak'ulmanje'q chiruheb' li kutan chaalel. Ut tz'aqal yaal li matk' a'an jo'wi' li xyaalalil”, chan laj Daniel.

⁴⁶ Toja' naq laj Nabukodonosor, li awab'ej, kiwiq'laak chiru laj Daniel, kixhupub' rib' chiru ch'och' ut kixye naq chik'eemanq xsimaatan jo'wi' xsununkil b'an.

⁴⁷ Chirix chik a'an kixye re laj Daniel: “Relik chi yaal naq leeYos laa'ex, a'an tz'aqal li Yos nim xloq'al, li awab'ej q'axal nim xwankil sa' xb'een chixjunileb' li awab'ej. A'an laj kutanob'resinel re li muqmuukil na'leb', xb'aan naq laa'at xach'olob' xyaalal li tz'aptz'ookil na'leb' a'in”.

⁴⁸ Chirix chik a'an li awab'ej kixxaqab' xwankil laj Daniel, kixk'e naab'al xsimaatan jwal terto xtz'aq ut kixk'e chixjolomi chixjunil li xteepalil Babilonia. Kixxaqab' ajwi' xwankil sa' xb'eeneb' chixjunil laj k'ehol na'leb' re Babilonia.

⁴⁹ Ut naq laj Daniel kixtz'aama chiru li awab'ej naq laj Sidrak, laj Misak ut laj Abdénago te'xjolomi li xteepalil Babilonia, a'an kik'eemank chiru. Ut laj Daniel kikanaak sa' rochoch li awab'ej.