Daniel 12 - Q'eqchi Bible

Li roso'jikeb' li kutan

¹ «Sa'eb' li kutan a'an taachalq laj Miguel, li xnimal ru ánjel li nakolok re laatenamit. Q'axal rahaq rilb'aleb' li kutan a'an, jo' maajun wa kik'ulmank chalen chaq sa' xtiklajikeb' li tenamit toj anaqwan. Toja' naq taakole'q laatenamit, jo'k'ihaleb' li tz'iib'anb'ileb' xk'ab'a' sa' li xHuhul li yu'am.

² «Naab'aleb' li ak kamenaqeb' te'wakliiq chaq wi' chik chi yo'yo: wankeb' re junelik yu'am, wankeb' chik re wank sa' xutaan ut tojb'amaak chi junajwa.

³ Eb' li wankeb' xna'leb', li ke'k'utuk re li tiikil ch'oolej chiruheb' li k'iila tenamit, te'lemtz'uno'q jo' li saqenk sa' choxa ut jo'kaqeb' li chahim chi junelik.

⁴ Ab'anan laa'at, a Daniel, maa'ani taaye wi' eb' li aatin a'in; k'uula chi tz'aptz'o li hu a'in toj sa' roso'jikeb' li kutan. Naab'aleb' te'xb'eeni rib' chi xsik'b'al li raatin li Qaawa' ut te'xtaw xtz'aqob' li xna'leb'eb'».

⁵ “Laa'in laj Daniel kiwil wiib'eb' chik mu chanchaneb' li winq, xaqxookeb' junqpak'al li nima'.

⁶ Ut jun reheb' kixpatz' re li ánjel tiqto rik'in t'ikr liin li xaqxo sa' xb'een li ha': «Jo'q'e te'raqe'q eb' li sachb'ach'oolej a'in?».

⁷ Li tiqto rik'in liin sa' xb'een li ha' kixtaqsiheb' li ruq' sa' choxa ut kiwab'i chi xyeeb'al sa' jurament sa' xk'ab'a' li Yos li wank chi junelik: «Chiru wan xka chihab', naq taaraqe'q xsachb'aleb' ru li santil tenamit, taatz'aqloq ru chixjunil a'in».

⁸ “Laa'in kiwab'i li kixye, ab'an ink'a' kintaw xyaalal. Jo'kan naq kinpatz' wi' chik: «Wa'chin, chanru naq toxraqe'q chixjunil a'in?», chankin.

⁹ Ut a'an kixye we: «Matk'oxlak, a Daniel, xb'aan naq eb' li aatin a'in k'uulanb'ileb' ut tz'aptz'ookeb' toj reetal sa' roso'jikeb' li kutan.

¹⁰ Naab'aleb' li te'yale'q rix ut te'ch'ajob'resiiq xb'aan li Yos. Eb' li yib'ru xna'leb'eb' toj yooqeb' chi xb'aanunkil li maa'usilal, chi maajun taatawoq xyaalal; ab'anan li wankeb' xchoxahil na'leb' te'xtaw ru.

¹¹ Chalen sa' li kutan naq taasachmanq xwankil li mayejak rajlal kutan ut taak'ojob'aaq li xnimal tz'i'b'eetal sa' rochoch li Yos, taanume'q lajeeb' ro'k'aal xka o'q'ob' (1,290) kutan.

¹² Us xaq re li tixkuy royb'eninkil ut toxtaw eb' li o'laju xwuqk'aal xka o'q'ob' (1,335) kutan.

¹³ Ut laa'at ayu chi hilank toj sa' xkutankil laakamik. Tatwakliiq chaq sa' roso'jikeb' li kutan re xk'ulb'al laaq'ajkamunkil»”.