Apocalipsis 8 - Q'eqchi Bible

Li xwuq tz'apleb': li wuqub' chi ánjel

¹ Naq li Karneer kixte li xwuq tz'apleb', kich'anaak li eek'ank sa' choxa chiru tana mer honal.

² Toja' naq kiwil li wuqub' chi ánjel xaqxookeb' chiru li Yos, ut ke'k'ehe'k wuqub' xtronpeet.

³ Kichalk jun chik li ánjel ut kixaqliik chiru li artal, wank jun sansaar oor rik'in. Ut ke'q'axtesiik re naab'al chi sununkil b'an re naq tixyeechi'i rochb'een xtijeb' chixjunileb' li sant, sa' xb'een li artal oor li wank chiru li nimajwal k'ojarib'aal.

⁴ Ut li xsib'el eb' li sununkil b'an rochb'een li xtijeb' li sant ki'elk sa' ruq' li ánjel ut kitaqe'k toj chiru li Yos.

⁵ Chirix chik a'an li ánjel kixchap li sansaar, kixnujob'resi rik'in ru xxamlel li artal ut kixkut sa' xb'een li ruuchich'och'. Toja' naq kiwank kaaq, xyaab' kuxej, raq'kaaq ut hiik.

Li kaahib' chi tronpeet

⁶ Eb' li wuqub' chi ánjel li wankeb' xtronpeet ke'xkawresi rib' re xyaab'asinkileb'.

⁷ Li xb'een ánjel kixyaab'asi li xtronpeet ut kiwank saqb'ach ut xam yuub'il rik'in kik'. Toja' naq a'an kik'ute'k chaq sa' xb'een li ruuchich'och'. Ut li rox jachal li ruuchich'och' kik'atk, rochb'een li rox jachal chixjunileb' li che' ut chixjunil li rax pim.

⁸ Li xkab' ánjel kixyaab'asi li xtronpeet, ut wank k'aru kama' jun nimla tzuul yo xxamlel kikute'k sa' palaw, ut li rox jachal li palaw kikik'o'k ru:

⁹ Li rox jachal chixjunil li yoob'tesinb'il li wankeb' xyu'am sa' palaw ke'kamk ut li rox jachal chixjunileb' li jukub' ke'sache'k.

¹⁰ Li rox ánjel kixyaab'asi li xtronpeet, ut kit'ane'k chaq sa' choxa jun li nimla chahim, yo xxamlel kama' jun li saqenk: kit'ane'k sa' xb'een li rox jachal chixjunileb' li nima' ut sa' xb'eeneb' li yo'leb'aal ha'.

¹¹ Li xk'ab'a' li chahim a'an K'a. Li rox jachal chixjunileb' li ha' ke'k'aho'k ut naab'aleb' li tenamit ke'kamk xb'aaneb' li ha', xb'aan naq ke'k'aho'k.

¹² Toja' naq li xka ánjel kixyaab'asi li xtronpeet, ut kikete'k li rox jachal li saq'e, li rox jachal li po ut li rox jachal chixjunileb' li chahim: ki'aak'ab'o'k li rox jachal chixjunil a'an, ut li rox jachal li kutan ink'a' kisaqeno'k ru; jo'kan ajwi' li q'oqyink.

¹³ Chirix chik a'an kiwil ut kiwab'i jun li t'iw yo chi xik'ank taqe'q sa' xyi li choxa, kaw xyaab' xkux naq kixye: “Rahilal, rahilal, rahilal sa' xb'eeneb' li wankatqeb' sa' ruuchich'och', sa' xk'ab'a' xyaab'eb' li tronpeet li okeb' re chi xyaab'asinkil eb' li oxib' chik chi ánjel!”.