Apocalipsis 5 - Q'eqchi Bible

Li hu rik'in li wuqub' chi tz'apleb'

¹ Kiwil ajwi' sa' xnim uq' li k'ojk'o sa' li nimajwal k'ojarib'aal jun li hu tz'iib'anb'il chisa' ut chirix, tz'aptz'o rik'in wuqub' chi tz'apleb'.

² Ut kiwil jun li ánjel kaw rib', yo chi xpuktesinkil chi kaw xyaab' xkux: “Ani xk'ulub' risinkileb' li tz'apleb' ut xteeb'al li hu?”, chan.

³ Ab'anan maajun kitawmank sa' choxa, chi moko sa' ruuchich'och' malaj rub'el ta li ch'och'; maajun kiruhank chi xteeb'al chi moko rilb'al xsa' li hu.

⁴ Ut laa'in k'ajo' naq kinyaab'ak xb'aan naq maa'ani kitawmank xk'ulub' ta xteeb'al chi moko rilb'al xsa' li hu.

⁵ Ab'an jun reheb' li cheekel winq kiyehok we: “Matyaab'ak. Chawil, li Kaqkoj re li xteepal laj Judá, a' li xTuxb' laj David, xq'axok u: a'an taa'isinq reheb' li wuqub' chi tz'apleb' ut tixte li hu”.

⁶ Toja' naq kiwil a'in: chi xk'atq li nimajwal k'ojarib'aal sutsu xb'aaneb' li kaahib' chi yo'yookeb' jo'wi' xb'aaneb' li cheekel winq, kiwil jun li Karneer xaqxo aran chanchan kamsinb'il, wank wuqub' xxukub' ut wuqub' xsa' li ru, a'aneb' li wuqub' chi xmusiq' li Yos taqlanb'ileb' sa' chixjunil li ruuchich'och'.

⁷ Ut a'an kolxchap li hu wank sa' xnim uq' li k'ojk'o sa' li nimajwal k'ojarib'aal.

⁸ Ut naq kixchap li hu, eb' li kaahib' chi yo'yookeb' ut li kaahib' xka'k'aal chi cheekel winq ke't'ane'k rub'el roq li Karneer, wankatqeb' x'aarp chixjunqaleb' jo' ajwi' xsek'eb' oor nujenaqeb' chi sununkil b'an, a'aneb' li xtij eb' li sant;

⁹ ut neke'xb'icha jun li ak' b'ich, yookeb' chi xyeeb'al: “Aak'ulub' xchapb'al li hu ut xteeb'al eb' li xtz'apleb', xb'aan naq katkamsiik ut rik'in laakik'el kaloq'eb' li winq ut li ixq cho'q re li Yos sa' xyanq chixjunileb' li xteepal ut xtenamit li ruuchich'och', yalaq chanru neke'ilok ut neke'aatinak;

¹⁰ ut kak'eheb' chi awab'ejink cho'q aj tij cho'q re li qaYos, ut te'awab'ejinq sa' xb'een li ruuchich'och'”.

¹¹ Ut sa' li moy u kiwab'i xyaab'eb' xkux li k'iila ánjel chire li nimajwal k'ojarib'aal jo'wi' chi xsutam li yo'yookeb' ut eb' li cheekel winq, k'iila mil o'q'ob' chi o'q'ob' li xk'ihaleb',

¹² yookeb' chi xyeeb'al chi kaw xyaab'eb' xkux: “Li Karneer kikamsiik, a'an xk'ulub' xk'ulb'al xwankil, xb'ihomal, xna'leb', xkawilal, xnimal xloq'al ut loq'onink, jo' ajwi' naq taaterq'usiiq xk'ab'a'”.

¹³ Ut chixjunileb' li yoob'tesinb'ileb' xb'aan li Yos sa' choxa, sa' ruuchich'och', rub'el li ch'och' ut sa' li palaw, jo'wi' chixjunil li wankatqeb' chisa', kiwab'i naq ke'chaq'ok: “A' li k'ojk'o sa' li nimajwal k'ojarib'aal jo' ajwi' li Karneer, chiwanq taxaq xnimal xloq'al, xkawilal ut chiterq'usiiq xk'ab'a' chi junelik q'e kutan”, chankeb'.

¹⁴ Ut eb' li kaahib' chi yo'yookeb' ke'xye: “Jo'kan taxaq!”. Toja' naq eb' li cheekel winq ke'xhupub' rib' chi loq'onink.