Apocalipsis 18 - Q'eqchi Bible

Xt'anik li nimla tenamit Babilonia

¹ Chirix chik a'an kiwil jun chik li ánjel yo chaq chi kub'eek sa' choxa rik'in xnimal xwankil, ut kikutano'k li ruuchich'och' xb'aan li xnimal xloq'al.

² Kixjap re chi kaw xyaab' xkux: “Xt'ane'k, ak xt'ane'k li nimla tenamit Babilonia. Xkanaak cho'q xna'ajeb' li maa'us, cho'q xtz'alam chixjunileb' li tz'ajn aj musiq'ej, xtz'alameb' chixjunil li xik'anel xul tz'ajeb' ru ut tz'eqb'eetaleb'.

³ Xb'aan naq chixjunileb' li tenamit xe'ruk' li xb'iinul ut xe'xb'aanu li maa'usilal rik'in; eb' li awab'ej re li ruuchich'och' xe'xmux rib'eb', ut eb' laj yakonel sa' ruuchich'och' xe'b'ihomo'k rik'in li xjo'maajo'il aj maa'usilal”.

⁴ Moqon kiwab'i jun chik xyaab' kuxej yo chi xyeeb'al sa' choxa: “Elenqex chaq Babilonia, ex intenamit: mare anchal tex'okenq sa' li xmaakeb' ut toxexxtaw li xrahilaleb'.

⁵ Xb'aan naq li xmaakeb' li tenamit a'an ak xo'tub'laaq toj sa' choxa, ut xnaqk sa' xch'ool li Yos li xmaa'usilaleb'.

⁶ K'ehomaq re jo' naq a'an kik'ehok, chek'e reeqaj li xb'aanuhom ka' sut chik xk'ihal. Ut sa' li sek' kixkawresi wi' li uk'a', chekawresi laa'ex li xka'wail re a'an.

⁷ Jo'nimal xnimob'resi wi' rib' ut xrataw li maa'usilal, jo'kan ajwi' k'ehomaq reeqaj rik'in rahilal ut yot'e'k. Xb'aan naq kixye sa' xch'ool: «K'ojk'ookin jo' xna' li tenamit, maawa'in xmalka'an ut maajoq'e twil li rahil ch'oolej», chan.

⁸ Jo'kan naq chiru jun kutan talaje'chalq sa' xb'een chixjunileb' li xrahilal: a' li rax kamk, rahil ch'oolej, we'ej, ut taak'ate'q rik'in xam. Xb'aan naq nim xwankil li Qaawa' Yos li xteneb'ank tojb'amaak sa' xb'een”.

⁹ Eb' li awab'ej re li ruuchich'och' li ke'xmux rib' rik'in ut sa naq ke'wank rik'in, te'yaab'aq ut huyhutqeb' chirix, naq te'ril li xsib'el li xk'atik;

¹⁰ te'kanaaq chi najt xb'aan xxiweb' chiruheb' li xrahilal ut te'xye: “Toq'ob' aawu, toq'ob' aawu, at Nimla Tenamit, at kawil tenamit Babilonia! Yal chiru jun k'amok xk'ulunk li tojb'amaak teneb'anb'il sa' aab'een!”.

¹¹ Eb' laj yakonel sa' ruuchich'och' te'yaab'aq ut huyhutqeb' chirix, xb'aan naq maa'ani chik naloq'ok li xk'ayeb':

¹² a' li oor, plaat, tertookil pek ut lemtz'il q'ol, liino ut púrpura, seda ut kaqjorinkil t'ikr, jo'wi' chixjunil chik li k'iila paay chi sununkil che', chixjunil li k'a'aq re ru yiib'anb'il rik'in marfil, chixjunil li k'a'aq re ru yiib'anb'il rik'in chaab'il che', q'anch'iich', ch'iich' ut mármol;

¹³ kaneel, amomo, sununkil b'an, miir, pom, b'iin, aseeyt, k'aj, triiw, xul aj iiqonel, karneer, kawaay ut b'eleb'aal ch'iich'; loq'b'il moos ut yalaq ani chik chi winqul.

¹⁴ Ut te'xye re li tenamit: “Eb' li ki'il q'een natzemtzot wi' aach'ool xe'sachk chawu; chixjunil li xchaq'al ru ut li q'axal loq' ak xraqe'k cho'q aawe ut maajoq'e chik taatawmanq”.

¹⁵ Eb' laj yakol re a k'a'aq re ru a'in, eb' li xe'b'ihomo'k xb'aan a'an, te'kanaaq chi najt xb'aan xxiweb' chiru li xrahilal, huyhutqeb' chi yaab'ak:

¹⁶ “Toq'ob' ru, toq'ob' ru li Nimla Tenamit, tiqto rik'in liino, kaqjorinkil ut kaqmoqinkil t'ikr! Toq'ob' ru li nalemtz'unk rik'in oor, tertookil pek ut lemtz'il q'ol!

¹⁷ Yal chiru jun k'amok xsachk li nimla b'ihomal a'in!”, cha'qeb'. Chixjunileb' laj jolominel re jukub' ut li jo'k'ihal wankeb' chisa', eb' li neke'b'eresink re ut chixjunileb' li neke'k'anjelak chiru ha' ke'kanaak chi najt

¹⁸ ut japjookeb' re naq ke'ril li xsib'el li xk'atik: “Ani chanchan li Nimla Tenamit?”, chankeb'.

¹⁹ Ke'xk'e pojtz' sa' xjolomeb', te'yaab'aq ut te'xten re xch'ooleb' naq ke'xjap re chi xyeeb'al: “Toq'ob' ru, toq'ob' ru li Nimla Tenamit! Chixjunileb' li wankeb' xjukub' sa' li palaw xe'b'ihomo'k rik'in li xnimal b'ihomal, ut anaqwan, yal chiru jun k'amok, xkanaak chi nakirnak!”.

²⁰ Chatsaho'q xb'aan a'an, at choxa. Chisaho'q sa' eech'ool, ex sant, apóstol ut propeet, xb'aan naq rik'in xteneb'ankil li tojb'amaak sa' xb'een, li Yos xraqok aatin sa' tiikilal.

²¹ Toja' naq jun li ánjel kaw rib' kixchap jun li pek k'ajo' xnimal, jo' jun nimla sursuukil ke'leb' pek, ut kixkut sa' palaw, yo chi xyeeb'al: “Jo'ka'in, sa' jun chiq'ok ajwi' naq taakute'q li nimla tenamit Babilonia, ut ink'a' chik taak'utunq.

²² Ut li xyaab'eb' laj aarp, laj b'ichanel, laj xolb' ut laj tronpeet ink'a' chik taa'ab'iiq aawik'in; maajun chik aj pak'ol k'a'aq re ru taatawmanq wankat wi'; li xyaab' li sursuukil ke'leb' pek ink'a' chik taa'ab'iiq aawik'in.

²³ Li xxamlel li saqenk ink'a' chik taasaqeno'q wankat wi', ut li xyaab' xkuxeb' li b'eelomej ut li ixaqilb'ej ink'a' chik taa'ab'iiq aawik'in. Xb'aan naq eb' laj yakonel ke'wank aawik'in a'aneb' li xninqaleb' ru winq sa' ruuchich'och', ut rik'in li tuulak xab'aanu xab'alaq'i chixjunileb' li tenamit”.

²⁴ Aran, sa' li tenamit Babilonia, xtawe'k xkik'eleb' li propeet, xkik'eleb' li sant ut chixjunileb' li kilaje'kamsiik sa' ruuchich'och'.