Apocalipsis 17 - Q'eqchi Bible

Li xnimal ru aj yumb'eet

¹ Toja' naq kichalk jun reheb' li wuqub' chi ánjel li wankeb' li wuqub' chi sek' rik'in, ut ki'aatinak wik'in: “Kim -chan we-, ink'utaq chawu li tojb'amaak teneb'anb'il sa' xb'een li xnimal ru aj yumb'eet li k'ojk'o sa' xb'eeneb' li k'iila ha'.

² Eb' li awab'ej re li ruuchich'och' ke'xmux rib'eb' rik'in, ut eb' li wankeb' sa' ruuchich'och' ke'kalaak rik'in li xb'iinul ut ke'xb'aanu li maa'usilal rik'in”.

³ Toja' naq li ánjel kinxk'am sa' musiq'ej sa' li chaqich'och', ut aran kiwil jun li ixq k'ojk'o sa' xb'een jun li josq' aj xul kaq rix, nujenaq chi k'ab'a'ej re majewank, wank wuqub' xjolom ut lajeeb' xxukub'.

⁴ Li ixq a'an tiqto rik'in t'ikr kaqmoqin ut kaqjorin xb'onol, nalemtz'unk ru rik'in oor, rik'in tertookil pek ut lemtz'il q'ol. Wank sa' ruq' jun li sek' oor nujenaq rik'in li xyiib'etalil ut xtz'ajnil li xmuxb'al rib';

⁵ ut tz'iib'anb'il chi xpeekem jun k'ab'a'ej muqmu xyaalal: “Babilonia, li Nimla Tenamit, li xna'eb' laj yumb'eet ut xna' ajwi' chixjunil li tz'i'b'eetalil aj na'leb' li wank sa' ruuchich'och'”.

⁶ Toja' naq kiwil li ixq yo xkalajik xb'aan xkik'eleb' li sant ut li xkik'eleb' li ke'kamk sa' xk'ab'a' li Jesus; ut k'ajo' naq kisachk linch'ool chi rilb'al.

⁷ A'ut li ánjel kixye we: “K'a'ut naq nasachk aach'ool? Inch'olob'aq chawu xyaalalil li tz'aptz'ookil na'leb' chirix li ixq ut li josq' aj xul nak'amok re, a' li wank wuqub' xjolom ut lajeeb' xxukub'.

Xyaalalil li josq' aj xul ut laj yumb'eet

⁸ “Li josq' aj xul xawil, a'an li kiwank ut maak'a' chik anaqwan; taataqe'q chaq sa' li Siwan, ab'an taaxik sa' li sachleb'aal. Eb' li wankeb' sa' ruuchich'och', eb' li ink'a' tz'iib'anb'ileb' xk'ab'a' sa' li xhuhil li yu'am chalen chaq sa' xk'ojlajik li ruuchich'och', te'sachq xch'ool chi rilb'al naq li josq' aj xul kiwank ut maak'a' chik anaqwan, ab'an taak'ulunq wi' chik.

⁹ “Arin na'ajmank ru li seeb'al ch'oolej: li wuqub' chi jolomej a'aneb' wuqub' chi tzuul k'ojk'o wi' li ixq. A'aneb' ajwi' wuqub' chi awab'ej:

¹⁰ oob' ak t'anjenaqeb', li jun wank anaqwan ut li jun chik maji' nak'ulunk. Ut naq tol'elq, ink'a' najt taawanq.

¹¹ Ut li josq' aj xul li kiwank ut moko wank ta chik, a'an li xwaqxaq awab'ej, ab'anan a'an ajwi' jun reheb' li wuqub', ut yo chi xik b'arwi' taasache'q ru chi junajwa.

¹² “Li lajeeb' chi xukub' xawil a'aneb' li lajeeb' chi awab'ej li maji' xk'ulumeb' xwankil, ab'an te'ruhanq chi awab'ejink chiru jun k'amokaq rochb'eeneb' li josq' aj xul.

¹³ Eb' a'in wankeb' sa' aatin chi xq'axtesinkil sa' ruq' li josq' aj xul li xkawilaleb' ut li xwankilaleb'.

¹⁴ Te'xyal xmetz'ew rik'in li Karneer, ab'an li Karneer tixq'ax ruheb' xb'aan naq a'an Qaawa' sa' xb'eeneb' chixjunil li qaawa' ut Awab'ej sa' xb'eeneb' chixjunil li awab'ej; ut eb' li rochb'een, eb' li b'oqb'ileb', li sik'b'ileb' ru ut tiikeb' xch'ool, te'xq'ax ajwi' ruheb'”.

¹⁵ Moqon li ánjel kixye we: “Eb' li ha' xawil b'ar k'ojk'o wi' laj yumb'eet, a'an tenamiteb', xmolameb' li winq, k'iila teep ut k'iila aatinob'aal.

¹⁶ Li josq' aj xul ut eb' li lajeeb' chi xukub' li xawil, xik' te'ril laj yumb'eet; te'xkanab' chi nakirnak ut chi t'ust'u, te'xtiw li xtib'el ut te'xk'at li ixq sa' xam.

¹⁷ Xb'aan naq li Yos xk'ehok sa' xch'ooleb' xb'aanunkil li naraj. Jo'kan naq junajaqeb' li xk'a'uxl chi xq'axtesinkil li xwankilaleb' re li josq' aj xul, toj toxtz'aqloq ru li xyehom li Yos.

¹⁸ Ut li ixq xawil ru, a'an li Nimla Tenamit li wank xwankil sa' xb'eeneb' li awab'ej re li ruuchich'och'”.