Apocalipsis 15 - Q'eqchi Bible

Eb' li wuqub' chi rahilal

¹ Chirix chik a'an kiwil sa' choxa jun chik nimla eetalil ut sachb'ach'oolej rilb'al: wuqub' chi ánjel yookeb' chaq chi xk'amb'al wuqub' chi rahilal te'chalq sa' roso'jik, xb'aan naq rik'ineb' a'an taatz'aqloq ru li xjosq'il li Yos.

² Kiwil ajwi' jo' jun li palaw nalemtz'unk ru, yuub'il rik'in xam; ut eb' li ke'xq'ax ru li josq' aj xul jo' ajwi' li ink'a' ke'xk'e xwankil li xjalam u ut li rajlil li xk'ab'a', xaqxookeb' chire li palaw nalemtz'unk ru, wankeb' li aarp k'eeb'il xb'aan li Yos sa' ruq'eb'

³ ut yookeb' chi xb'ichankil li xb'ich laj Moisés, laj k'anjel chiru li Yos, jo'wi' li xb'ich li Karneer: “Q'axal ninqeb' ut sachb'ach'oolej rilb'al laab'aanuhom, at Qaawa', at Nimajwal Yos; tiik ut tz'aqal yaal ru laab'e, at xReyeb' li tenamit!

⁴ Ani ink'a' tixxiwa ut ink'a' tixnima ru laak'ab'a', at Qaawa'? Xb'aan naq ka'jat wi' laa'at santat, ut chixjunileb' li tenamit talaje'chalq ut te'xhupub' rib' chawe chawu, xb'aan naq xe'kanaak chi kutankil laaninqal k'a'uxl”.

⁵ Chirix chik a'an kiwil sa' choxa naq kixte rib' li santil ochoch wan wi' li xmuheb'aal li Sumwank,

⁶ ut ke'elk chaq sa' li santil ochoch eb' li wuqub' chi ánjel li wan chaq li wuqub' chi rahilal rik'ineb', tiqtookeb' rik'in tz'aqal liino nalemtz'unk, ut b'ak'b'ookeb' li re xch'ool rik'in xk'aamal sa' oor.

⁷ Moqon chik jun reheb' li kaahib' chi yo'yookeb' kixq'axtesi reheb' li wuqub' chi ánjel wuqub' chi sek' oor, nujenaqeb' rik'in xjosq'il li Yos li yo'yo chi junelik q'e kutan.

⁸ Ut li santil ochoch kinujak rik'in xsib'el li xloq'al ut li xwankil li Yos: maa'ani naruhank chi ok sa' li santil ochoch toj te'raqe'q li wuqub' chi rahilal wankeb' rik'in li wuqub' chi ánjel.