Apocalipsis 10 - Q'eqchi Bible

Chalk re li xnimal rahilal

¹ Kiwil ajwi' jun chik li ánjel kaw rib', yo chaq chi kub'eek sa' choxa, sutsu sa' choql, wank li kaqlaaq' chi xb'een xjolom; li xnaq' ru kama' li saq'e ut eb' li ra' chanchaneb' oqech yo xxamlel.

² Wank sa' ruq' jun li ch'ina tasal hu teeto xsa'. Ut kixk'e li xnim oq sa' xb'een li palaw ut li xtz'e oq sa' xb'een li ruuchich'och'.

³ Toja' naq kixjap re chi kaw xyaab' xkux, jo' naxjap re li kaqkoj; ut naq kixjap re, ki'ab'iik xyaab' wuqub' chi kaaq.

⁴ Naq kiraqe'k xyaab' eb' li wuqub' chi kaaq, kin'ok raj chi tz'iib'ak, ab'an kiwab'i jun xyaab' kuxej sa' choxa yo chi xyeeb'al: “Tz'ap rik'in tz'apleb' li b'arwan xe'xye li wuqub' chi kaaq ut maatz'iib'a a'an”.

⁵ Toja' naq li ánjel li kiwil, li xaqxo sa' xb'een li palaw ut li ruuchich'och', kixtaqsi li xnim uq' sa' choxa

⁶ ut kixye jurament sa' xk'ab'a' li Yos, li yo'yo chi junelik q'e kutan, a' li kiyoob'tesink re li choxa ut chixjunil li wank chisa', li ruuchich'och' rochb'een chixjunil li wank chisa', li palaw rochb'een chixjunil li wank chisa'. Kixye chi jo'ka'in: “Maak'a' chik b'ayk!

⁷ Naq taa'ab'imanq li xyaab' xkux li xwuq ánjel ut a'an tixyaab'asi li xtronpeet, toja' naq sa'eb' li kutan a'an taatz'aqloq ru li xtz'aptz'ookil na'leb' li Yos, jo' kixye chaq rik'in chaab'il esilal reheb' laj k'anjel chiru, a'eb' li propeet”.

Li ch'ina hu nuq'bil

⁸ Li xyaab' kuxej li kiwab'i sa' choxa kinraatina wi' chik ut kixye we: “Ayu, chap li ch'ina hu teeto sa' ruq' li ánjel li wank chi xaqxo sa' xb'een li palaw ut li ruuchich'och'”.

⁹ Toja' naq kohin wan wi' li ánjel ut kinye re naq chixk'e we li ch'ina hu; ut a'an kixye we: “Chap ut nuq': tixk'ahob'resi laasa', ab'an sa' laawe kama'aq xki'al li xya'al kab'”.

¹⁰ Kink'ul li ch'ina hu sa' ruq' li ánjel ut kinnuq': li xki'al sa' li we jo' xki'al li xya'al kab', ab'anan, naq kinnuq', kik'aho'k sa' linsa'.

¹¹ Toja' naq kiyehe'k we: “Tento naq tat-aatinaq wi' chik jo' propeet chirix naab'aleb' chi tenamit, jo' ajwi' chirix naab'aleb' li amaq' ut awab'ej”.