Amós 5 - Q'eqchi Bible

Aajel ru li yot'b'ach'oolej ut jalb'ak'a'uxl

¹ Ex aj Israel, ab'ihomaq li waatin a'in; ok we chi xb'ichankil jun rahil b'ich cho'q eere:

² Israel chanchan jun tuq'ixq kamenaq; xt'ane'k ut ink'a' chik naru chi wakliik. Jiljo chiru ch'och' xkanaak ut maajun nawaklesink re.

³ Jo'ka'in kixye li Qaawa' Yos reheb' laj Israel: “Wi junaq tenamit taa'elq chi yalok rik'in jun mil chi winq, yal o'k'aal aj chik te'kole'q chaq; ut wi junaq chik tixtaqla o'k'aal chi winq, yal lajeeb'eb' aj chik te'kole'q chaq sa' xyanqeb'”.

⁴ Xb'aan naq jo'ka'in kixye li Qaawa' reheb' laj Israel: “Sik'omaqin laa'in ut taawanq eeyu'am.

⁵ Mexxik chi loq'onink aran Betel; mineesik' aran Kilkal chi moko chexnume'q Berseba, xb'aan naq eb' laj Kilkal te'k'ame'q sa' najtil tenamit ut Betel taakanab'aaq cho'q po'lem”.

⁶ Sik'omaq li Qaawa' ut taawanq eeyu'am; mare anchal jo' li xam naq taachalq sa' xb'eeneb' laj José ut maajun sa' xyanqeb' laj Betel taaruuq taachupuq re.

⁷ Ra chaalel sa' eeb'een laa'ex li nekepo' ru li tiikilal ut nekesach xwankil li k'ulub'ej.

^8-9 Li Qaawa', a'an li kiyiib'ank reheb' li k'iila chahim, Pléyades ut Oryón li xk'ab'a'eb', ut aak'ab' naxkanab' wi' li kutan. A'an naxjunaji li xha'el li palaw ut naxpaji chaq sa' xb'een li ruuchich'och'. A'an li nasachok xwankil eb' li kaweb' rib' ut naxjuk' li kawub'resinb'il tenamit. Li xk'ab'a' a'an Qaawa'.

¹⁰ Ra chaalel sa' eeb'een laa'ex xik' nekeril ani nakolok rix li tiikilal ut neketz'eqtaana li nayehok re li yaal.

¹¹ Laa'ex nekerahob'tesi li neb'a' ut nekepatz' re li toj chirix li triiw. Jo'kan naq ink'a' texwanq sa'eb' li ochoch xeyiib' rik'in pek tuqub'anb'il ru chi us, chi moko teeruk' xya'al li uub' xeraw chi chaab'il.

¹² Laa'in ninnaw naq k'ajo' xk'ihal leemaa'usilal, ninnaw naq numtajenaq leemaak: nekerahob'tesi li tiik xch'ool, natuminaak eeru ut nekesach xwankileb' li neb'a' sa'eb' li raqleb'aal aatin.

¹³ Jo'kan naq ani wank xna'leb' ink'a' na'aatinak anaqwan, xb'aan naq moko chaab'ileb' ta li kutan a'in.

¹⁴ Sik'omaq li chaab'ilal ut maawa' li ink'a' us, re naq twanq eeyu'am. Wi teeb'aanu chi jo'kan, relik chi yaal naq li Nimajwal Yos twanq eerik'in jo' nekeye laa'ex.

¹⁵ Tz'eqtaanahomaq li ink'a' us, rahomaq ru li us ut k'ehomaq xwankil li tiikilal sa' li raqok aatin. Mare anchal li Nimajwal Yos taaruxtaana ruheb' laj José, li jo'k'ihaleb' chik te'kole'q.

¹⁶ Jo'kan naq li Qaawa', li Nimajwal Yos, kixye chi jo'ka'in: “Taawanq yaab'ak sa' chixjunileb' li k'ayiil, ut sa'atqeb' li b'e taawanq tz'uyink xb'aan li rahilal. Te'b'oqmanq chi yaab'ak eb' laj k'aleb'aal ut te'b'oqe'q chi q'oqonk li tojb'ileb' chi yaab'ak;

¹⁷ taawanq yaab'ak sa' xyanqeb' li awimq naq laa'in tinchalq chi raqok aatin sa' eeb'een”, chan li Qaawa'.

¹⁸ Ra teek'ul laa'ex li nekeroyb'eni li xKutankil li Qaawa'. Ma nekenaw xyaalal chanru li kutan a'an? A'an jun aak'ab', ut maawa' kutan.

¹⁹ Chiru li kutan a'an chanchanaqex li winq na'elelik chiru li kaqkoj ut nokoxch'ik rib' sa' re jalan chik josq' aj xul; malaj naq junaq yo chi ok sa' rochoch, naxk'e li ruq' chiru li tz'ak, ut natiwe'k chik xb'aan li k'anti'.

²⁰ Ma sahil ch'oolej ut saqenk ru li xKutankil li Qaawa'? Ink'a', a'an b'an jun aak'ab' ut q'oqyink ru.

²¹ “Xik' nawil ut nintz'eqtaana leeninq'e, ut ink'a' naxk'ojob' inch'ool naq nekech'utub' eerib' sa' ink'ab'a'.

²² Wi nekemayeja leek'atb'il xul ut leeyeechi'om, laa'in ink'a' tink'ul; chi moko nawulak chiwu naq nekemayeja leeninqi wakax chirix li k'amok ib' sa' usilal.

²³ Isihomaq chiwu xyaab' leek'iila b'ich! Ink'a' nawaj rab'inkil li xyaab' lee'aarp!

²⁴ Ab'anan chiwanq li tiikilal jo' jun nima', ut li tiikil ch'oolej chiwanq jo' li roqha' ink'a' nachaqik.

²⁵ Ex aj Israel, ma kexmayejak tab'i' chaq chiwu sa' li chaqich'och' chiru ka'k'aal chihab'?

²⁶ Ab'an anaqwan yookex chi xk'amb'al eb' li jalam u eeyiib'ahom laa'ex: laj Sikut, lee'awab'ej, ut laj Kebán, li chahim li xek'e cho'q eeyos.

²⁷ Jo'kan naq anaqwan texink'am toj junpak'al Damaask”, chan li Qaawa', li Nimajwal Yos.