2 Ts 2 - Q'eqchi Bible

Li xnimal xk'ulunik li Qaawa'

¹ Ex qas qiitz'in, chirix li xk'ulunik li Qaawa' Jesukriist ut li xch'utub'ankil qib' rik'in, naqatz'aama cheru

² naq meejal eek'a'uxl sa' junpaat chi moko chexib'e eerib' rik'in junaq xnimal reetalil li Musiq'ej, chi moko rik'in junaq aatin malaj hu kama' ta li taqlanb'il qab'aan, chanchan tawi' yooko chi xyeeb'al naq ak xtaw xq'ehil xkutankil li Qaawa'.

³ Maa'ani chib'alaq'inq eere chi yalaq chan ta ru. Xb'enwa tento taawanq xtz'eqtaanankil li paab'ank; tento taawakliiq chaq li tz'aqal aj maak, li teneb'anb'il li sachk sa' xb'een,

⁴ a' laj Xik'il Uuchinel. A'an naxnimob'resi rib' sa' xb'een chixjunil li wank xk'ab'a' li Yos malaj naloq'onimank sa' ruuchich'och', toj reetal toxk'ojlaaq sa' rochoch li Yos ut tixxaqab' rib' xjunes jo' Yos.

⁵ Ma ink'a' najultiko'k eere naq ak inyehom a'in eere sa' linwanjik chaq sa' eeyanq?

⁶ Laa'ex nekenaw k'aru naramok chaq re laj xik'il uuchinel; ab'anan ch'olch'o naq a'an tolxk'ut rib' sa' xq'ehil.

⁷ Xb'aan naq li xmuqmuukil na'leb' li maa'usilal ak yo chi k'anjelak; ka'ajwi' na'ajmank ru naq taa'isiiq li naramok re anaqwan.

⁸ Toja' naq tixk'ut chaq rib' laj q'etol chaq'rab', ut taasaapuuq xb'aan li Qaawa' rik'in li xmusiq' li na'elk chaq sa' re, ut taasache'q xb'aan xnimal xwankil sa' li xk'ulunik.

⁹ Laj q'etol chaq'rab' taachalq rik'in xwankil laj tza naq talaje'wanq xninqal ru b'aanuhom, eetalil ut b'alaq'il sachb'ach'oolej;

¹⁰ taachalq ajwi' rik'in chixjunil li maa'usilal re naq tixq'unb'esi xch'ooleb' li tento te'sachq xb'aan naq ink'a' ke'xk'ulub'a ut ink'a' ke'xra li yaal li kikolok raj reheb'.

¹¹ Jo'kan naq li Yos naxtaqla chaq jun wankilal aj b'alaq' rik'ineb' re naq te'xpaab' li tik'ti',

¹² ut chi jo'kan chixjunileb' li ink'a' ke'xpaab' li yaal ut a' chik li maa'usilal kiwulak chiruheb', taateneb'aaq tojb'amaak sa' xb'eeneb'.

Kaw xaqxooqex

¹³ A'ut laa'o rajlal toob'anyoxinq re li Yos cherix laa'ex, ex qas qiitz'in raarookex xb'aan li Qaawa', xb'aan naq li Yos kisik'ok eeru chalen chaq sa' xtiklajik re naq texkole'q sa' xk'ab'a' li santob'resink naxb'aanu li Musiq'ej, jo' ajwi' xb'aan xpaab'ankil li yaal.

¹⁴ A'in aj e naq xexb'oq rik'in li Chaab'il Esilal xqapuktesi, re naq textz'aqonq sa' li xnimal xloq'al li Qaawa' Jesukriist.

¹⁵ Jo'kan utan, ex qas qiitz'in, kaw xaqxooqex ut meekanab' xpaab'ankil leetijb'al eek'ulum qik'in jo' chi aatin jo' chi tz'iib'anb'il chiru hu.

¹⁶ A'aj tawi' li Qaawa' Jesukriist ut li Yos li qaYuwa', li xrahok qe ut, xb'aan xnimal rusilal, xk'e qe jun xk'ojob'ankil qach'ool li ink'a' nalajk na'oso'k jo'wi' xnimal xsahil li qaanm chi oyb'enink,

¹⁷ a'an taxaq chik'ojob'anq eech'ool ut chik'ehoq eekawub' re xb'aanunkil ut xyeeb'al chixjunil li us.