2 Timoteo 4 - Q'eqchi Bible

Xk'eeb'al xna'leb' laj Timoteo

¹ Chiru li Yos ut li Kristo Jesus li taaraqoq aatin sa' xb'eeneb' li yo'yookeb' ut kamenaqeb', nintz'aama ut nawelaji chawu sa' xk'ab'a' li xk'utb'esinkil rib' ut sa' xk'ab'a' li xnimajwal awab'ejihom:

² chapuktesi li Aatin, chayal aaq'e chi xb'aanunkil a'in naq tixk'e rib' ut naq ink'a'; chatq'usuq, chak'ehaq xna'leb'eb' ut chawaklesi xch'ooleb' rik'in xnimal aakuyum ut aana'leb'.

³ Xb'aan naq taawulaq xq'ehil naq eb' li tenamit ink'a' chik te'raj rab'inkil li chaab'il na'leb' ut, xb'aan xrahinkil li k'aru neke'raj xch'ool, q'esaq xxik chi rab'inkil k'iila na'leb', te'sute'q xb'aan jun tuub' chi aj tzolonel;

⁴ te'xkanab' rab'inkil li yaal ut a' chik li seeraq' maak'a' na'ok wi' taawulaq chiruheb'.

⁵ A'ut laa'at aj'ajaq aawu rik'in chixjunil, chakuyaq li rahilal, k'e aach'ool cho'q aj puktesinel re li Chaab'il Esilal, chab'aanu laak'anjel chi tz'aqal re ru.

⁶ Xb'aan naq xwulak xkutankil naq taahoye'q linkik'el jo' mayej; li xhonalil linq'ajik ak xnach'ok chaq.

⁷ Xintz'aqonk sa' li xchaq'alil ru yalok u, xinraqe'k chi aanilak, xink'uula linpaab'aal.

⁸ Ut chalen anaqwan ak yo chi woyb'eninkil linmaatan li tinxq'ajkamu wi' li Qaawa' sa' li Kutan a'an, li tiik xch'ool chi raqok aatin; ut moko ka'aj ta wi' laa'in, jo'kaneb' aj b'an wi' chixjunileb' li neke'xyo'oni li xnimal xk'ulunik chi anchaleb' xch'ool.

⁹ Chaseeb'a chaq aawib' chi chalk wik'in chi junpaat:

¹⁰ laj Demas xinxkanab' xb'aan xrahinkil ru li ruuchich'och' a'in ut xkoho Tesalónika. Laj Crescente xkoho Galacia; laj Tito xkoho Dalmacia.

¹¹ Ka'aj chik laj Lukas wank wik'in. Chak'am chaq chawix laj Markos, xb'aan naq a'an q'axal nikinxtenq'a sa' li k'anjel.

¹² Laj Tíkiko xintaqla Éfeso.

¹³ Naq tatchalq, chak'am chaq linkaap li xinkanab' chaq Tróada, sa' rochoch laj Karpo, ut chak'am ajwi' chaq eb' li tasb'il hu, a' li tz'uum hu li q'axal twaj ru.

¹⁴ Laj Alejandro, laj tenol ch'iich', naab'al li rahilal xb'aanu we. Li Qaawa' taa'eeqajunq re jo' chanru li xb'aanuhom.

¹⁵ Chakol ajwi' aawib' laa'at chiru a'an, xb'aan naq q'axal ra xreek'a naq xoo'aatinak aran.

¹⁶ Naq xinb'oqe'k xb'enwa rik'in laj raqol aatin re xkolb'al wib', maa'ani xtenq'ank we, chixjunileb' b'an xine'xkanab' injunes. Mik'ehe'k ta li maak a'in sa' xb'eeneb'.

¹⁷ Ab'an li Qaawa' xoltenq'anq we ut xk'e xkawub' linch'ool re xpuktesinkil chi yaal li Aatin re naq xe'rab'i chixjunileb' li tenamit. Ut xinkole'k sa' re li kaqkoj.

¹⁸ Li Qaawa' taakoloq we chiru chixjunil li ink'a' us ut tinxxok cho'q re li xnimajwal wankilal sa' choxa. A'an taxaq chiloq'oniiq ru junq'e junq'e kutan. Jo'kan taxaq.

Xraqik li hu

¹⁹ Chak'e xsahilaleb' xch'ool lix Priska ut laj Akila, jo'kan ajwi' li xjunkab'al laj Onesíforo.

²⁰ Laj Erasto xkanaak chaq Korinto, ut laj Trófimo yaj naq xinkanab' chaq Mileto.

²¹ Chaseeb'a chaq aawib' chi chalk naq toj maji' natiklaak li hab'alq'e. Naxtaqla xsahil aach'ool laj Ewbulo, laj Pudente, laj Lino, lix Klawdia ut chixjunileb' laj paab'anel.

²² Li Qaawa' chiwanq taxaq aawik'in. Li rusilal li Yos chiwanq taxaq eerik'in.