2 Timoteo 1 - Q'eqchi Bible

Xk'eeb'al sahil ch'oolej

¹ Laa'in laj Pablo, x'apóstol li Kristo Jesus, xb'aan naq jo'kan kiraj li Yos, re xpuktesinkil resil li yeechi'inb'il yu'am li wank sa' xk'ab'a' li Kristo Jesus,

² nintz'iib'ak aawik'in, a Timoteo inraarookil alal. Li usilal, li uxtaanal ut li tuqtuukilal li nachalk rik'in li Yos Yuwa'b'ej ut rik'in li Kristo Jesus, li Qaawa', chiwanq taxaq aawik'in.

³ Junelik ninb'anyoxi chiru li Yos li nink'anjelak chiru chi saq ru li waanm, kama' ke'xb'aanu chaq eb' linna' linyuwa', rajlal naq nakatjultiko'k we sa'eb' lintij chi q'eq ut chi kutan.

⁴ Naq najultiko'k we chanru naq xatyaab'ak, k'ajo' naq nawaj raj rilb'al aawu re naq chitz'aqloq xsahil inch'ool.

⁵ Xb'aan naq najultiko'k we laatz'aqal paab'aal, li kixe'en xb'enwa sa' xch'ool laawixa'an qana' Loida jo'wi' sa' xch'ool lix Ewnise laana', ut ninnaw naq kixe'en ajwi' aawik'in.

Li teneb'anb'il sa' xb'een laj Timoteo

⁶ Jo'kan utan, nintz'aama chawu naq chatz'ab' xxamlel laamaatan k'eeb'il aawe xb'aan li Yos naq kink'e li wuq' sa' aab'een.

⁷ Xb'aan naq moko li xiwak ta xqamaatani chaq rik'in li Yos, a' b'an li xkawub' qach'ool, li rahok ut kuyuk ib'.

⁸ Jo'kan naq matxutaanak chi xyeeb'al li yaal chirix li Qaawa', chi moko tatxutaanaq inb'aan laa'in li wankin sa' tz'alam sa' xk'ab'a' A'an. Chakuyaq ajwi' laa'at li rahilal nak'ulmank sa' xk'ab'a' li Chaab'il Esilal. Chakuy rik'in xwankil li Yos

⁹ li kooxkol ut kooxb'oq rik'in jun qasantil b'oqb'al, maawa' xb'aan qab'aanuhom, rik'in b'an naq kiraj xch'ool ut sa' xk'ab'a' li rusilal li kixsi qe sa' xk'ab'a' li Kristo Jesus junxilaj naq toj maji' kitiklaak li ruuchich'och'.

¹⁰ Li rusilal li Yos xk'utunk anaqwan rik'in li xk'utb'esinkil rib' laj Kolol qe, a' li Kristo Jesus, li xjuk'uk re xwankil li kamk ut xk'e chi lemtz'unk li junelik yu'am sa' xk'ab'a' li Chaab'il Esilal.

¹¹ Sa' li k'anjel a'in xaqab'anb'ilin cho'q aj puktesinel, cho'q apóstol ut aj tzolonel,

¹² ut yookin chi xk'ulb'al li rahilal a'in. Ab'an ink'a' ninxutaanak xb'aan naq ninnaw chi us ani k'ojk'o wi' inch'ool, ut ch'olch'o chiwu naq A'an q'axal kaw rib' re xk'uulankil li k'aru q'axtesinb'il we, toj reetal taawulaq li Kutan a'an.

¹³ Chiwanq sa' laach'ool chixjunil li chaab'il aatin xawab'i wik'in. Chiwanq laapaab'aal ut chatrahoq sa' xk'ab'a' li Kristo Jesus.

¹⁴ Rik'in xwankil li Santil Musiq'ej li wank qik'in chak'uula sa' laach'ool li yaal q'axtesinb'il aawe.

¹⁵ Ak nakanaw naq chixjunileb' laj Asia xine'xkanab' injunes, ut sa' xyanqeb' a'an wankeb' laj Figelo ut laj Hermógenes.

¹⁶ Li Qaawa' chiruxtaana taxaq li xjunkab'al laj Onesíforo, xb'aan naq k'iila sut xk'ojob' inch'ool ut ink'a' xxutaanak naq b'ak'b'ookin chi kareen.

¹⁷ Ka'ajwi' xwulak Roma, junpaat x'ok chinsik'b'al toj reetal xoxinxtaw.

¹⁸ A' taxaq li Qaawa' chi'uxtaananq ru sa' li Kutan a'an, ut jo'ch'inal jo'nimal li chaab'il k'anjel xb'aanu we aran Éfeso, laa'at nakanaw chi us.