2 Samuel 8 - Q'eqchi Bible

Naq kiyalok laj David

¹ Moqon chik laj David kixq'ax ruheb' laj Filistea, kinumtaak sa' xb'eeneb' ut kixmaq' chiruheb' li tenamit Gat jo'wi' eb' li na'ajej li wankeb' chi xsutam.

² Kixq'ax ajwi' ruheb' laj Mohab; kixk'eheb' chi jilib'aak chiru ch'och' ut kixb'iseb' rik'in k'aam: jo'k'ihaleb' li ke'kanaak sa' li wiib' b'isok, ke'kamsiik; ut li ke'kanaak sa' li rox b'isok, ke'kanab'aak chi yo'yo. Jo'ka'in naq eb' laj Mohab ke'kanaak rub'el xwankil laj David chi k'ehok toj.

³ Laj David kixq'ax ajwi' ru laj Hadadéser, ralal laj Rejob, awab'ej re Sobá, naq a'in ok raj re chi xxaqab'ankil xwankil sa' xb'een li na'ajej wank junqre li nima' Éwfrates.

⁴ Laj David kixchapeb' o'k'aal ro' o'q'ob' (1,700) chi winq li wankeb' chirix kawaay ut junmay mileb' (20,000) li yal chi roqeb' neke'xik. Kixtoq roqeb' chixjunileb' li kawaay neke'kelonk re li b'eleb'aal ch'iich'. Ka'ajwi' li jo'k'ihaleb' te'k'anjelaq re xkelonkil o'k'aal (100) chi b'eleb'aal ch'iich' ink'a' kixtoq roqeb'.

⁵ Eb' laj Aram aj Damaask ke'chalk chi xtenq'ankil laj Hadadéser, awab'ej re Sobá, ab'an laj David kixsacheb' ut kixkamsi wiib' xka'k'aal mil (22,000) reheb' laj Aram.

⁶ Moqon chik laj David kixxaqab'eb' aj k'aak'alenel aran Aram sa' xteepal Damaask, ut eb' laj Aram ke'kanaak rub'el xwankil laj David chi k'ehok toj. Yalaq b'ar naxik laj David, li Qaawa' natenq'ank re chi q'axok u.

⁷ Chirix chik a'an kixxok eb' li koleb' ch'iich' yiib'anb'ileb' rik'in oor li wankeb' rik'ineb' laj tenq' re Hadadéser, ut kixk'ameb' Jerusalén.

⁸ Kireechani ajwi' naab'al li q'anch'iich' li wan chaq aran Tebaj ut Berotay, xtenamiteb' laj Hadadéser.

⁹ Naq laj Tow, awab'ej re Jamat, kirab'i resil naq laj David kixq'axeb' ru chixjunileb' laj puub' re laj Hadadéser,

¹⁰ kixtaqla laj Jorán li ralal rik'in li awab'ej David re xk'eeb'al xsahil xch'ool rik'in naq xq'ax ru laj Hadadéser sa' li yalok, xb'aan naq a'in xik' naril laj Tow. Laj Jorán kixsi re laj David naab'aleb' li sek' yiib'anb'ileb' rik'in plaat ut oor, jo'wi' rik'in q'anch'iich'.

¹¹ Ut li awab'ej David kixq'axtesiheb' chiru li Qaawa', rochb'een li plaat ut li oor q'axtesinb'il chik, a' li kichalk rik'in chixjunileb' li tenamit kixq'axeb' ru:

¹² rik'ineb' laj Aram, eb' laj Mohab, eb' laj Amón, rik'ineb' laj Filistea, eb' laj Amalek jo'wi' rik'in laj Hadadéser, ralal laj Rejob, awab'ej re Sobá.

¹³ Jo'ka'in naq laj David kinawe'k ru yalaq b'ar. Ut naq kisutq'iik chaq chi xq'axb'al ruheb' laj Aram, kixsacheb' waqxaqlaju mil chi winq aj Edom sa' xTaq'ahil li Atz'am.

¹⁴ Kixxaqab'eb' aj k'aak'alenel sa' xsutam Edom, ut chixjunileb' laj Edom ke'kanaak rub'el xwankil laj David. Yalaq b'ar naxik laj David, li Qaawa' natenq'ank re chi q'axok u.

Eb' laj k'anjel chiru laj David

¹⁵ Laj David ki'awab'ejink sa' xb'een chixjunileb' laj Israel ut junelik kitaqlank sa' xyaalal ut tiikilal sa' xb'een li xtenamit.

¹⁶ Laj Johab, xyum lix Sarbia, a'an li najolomink reheb' laj puub'; ut laj Josafat, ralal laj Ajilud, a'an laj puktesinel esil.

¹⁷ Laj Sadok, ralal laj Ajitub, ut laj Abiatar, ralal laj Ajimélek, a'aneb' laj tij; ut laj Seraías a'an laj tz'iib'.

¹⁸ Laj Benaías, ralal laj Johadá, nataqlank sa' xb'eeneb' laj Keret ut eb' laj Pélet. Eb' li ralal laj David a'aneb' ajwi' aj tij.