2 Samuel 7 - Q'eqchi Bible

Li raatin propeet kixye laj Natán

¹ Naq ak wank chik laj David sa' rochoch ut li Qaawa' kixk'e chi wank sa' tuqtuukil usilal rik'ineb' li xik' neke'ilok re li wankeb' chi xsutam,

² li awab'ej kixye re li propeet Natán: “K'e reetal, laa'in wankin sa' jun li ochoch yiib'anb'il rik'in yaw, ab'an li xLoq'laj Kaax li Yos wank sa' tz'uumil muheb'aal”, chan.

³ Kichaq'ok laj Natán ut kixye re: “Ayu ut b'aanu chixjunil li naxye laach'ool, xb'aan naq li Qaawa' wank aawik'in”.

⁴ Ab'anan sa' ajwi' li q'oqyink a'an li raatin li Yos kik'ulunk rik'in laj Natán ut kixye re:

⁵ “Ayu ut ye re laj David aj k'anjel chiwu: «A'in naxye li Qaawa': Maawa' laa'at li tatyiib'anq re junaq wochoch b'arwi' tinwanq.

⁶ Chalen sa' li kutan naq xe'wisi chaq Ejiipt eb' laj Israel toj anaqwan ink'a' xinwank sa' junaq kab'l, ninwank b'an jo' aj numel yal sa' jun muheb'aal.

⁷ Chiru chixjunileb' li kutan xe'wochb'eeni wi' chaq eb' laj Israel yalaq b'ar, maajun sut xinye reheb' laj k'amol b'e li xeb'inxaqab' chi xb'eresinkil lintenamit Israel, naq te'xyiib' junaq ochoch rik'in yaw».

⁸ “Jo'kan utan taaye re laj David laj k'anjel chiwu: «Jo'ka'in xye li Nimajwal Yos: Laa'in xin'isink chaq aawe sa' li xna'ajeb' laakarneer re naq laa'ataq xjolomil lintenamit Israel.

⁹ Xinwank aawik'in yalaq b'ar xkohat, ut xinsacheb' ru chixjunileb' li xik' xe'ilok aawe. Ut laa'in tink'e chi nimaak laak'ab'a' jo'eb' li ninqeb' xwankil sa' ruuchich'och'.

¹⁰ Tink'e xch'och'eb' laj Israel lintenamit ut tink'eheb' chi hilank aran, re naq sa te'wanq chi maak'a'aqeb' xxiw ut ink'a' chik te'rahob'tesiiq xb'aaneb' li ink'a' useb' xna'leb' kama' junxil

¹¹ naq xinxaqab'eb' aj k'amol b'e sa' xb'een lintenamit Israel. Laa'in tink'eheb' li xik' neke'ilok aawe chi wank sa' usilal aawik'in. Ut ninye resil aawe naq laa'in li Qaawa' tink'eheb' aawalal aak'ajol.

¹² Jo'kan ajwi' naq taawulaq xq'ehil laakamik ut tatq'ajq tatsutq'iiq rik'ineb' laaxe'toonil yuwa', tinxaqab' chi awab'ej jun reheb' laawalal aak'ajol li taa'elq chaq aawik'in, ut tink'e xkawilal li x'awab'ejihom chi junelik.

¹³ A'an li taayiib'anq re jun li ochoch sa' ink'ab'a' ut laa'in tink'ojob' li x'awab'ejihom chi junajwa.

¹⁴ Laa'inaq xyuwa' ut a'anaq walal. Wi tixb'aanu li ink'a' us, laa'in tink'e chi xtojb'al li xmaak ut tintij rik'in tz'uum jo' junaq yuwa'b'ej naxb'aanu reheb' li ralal xk'ajol.

¹⁵ Ab'anan ink'a' tinkanab' xraab'al ut ruxtaanankil ru jo' kinb'aanu re laj Saúl li kiwisi sa' xwankil re naq laa'ataq chik reeqaj a'an.

¹⁶ Laajunkab'al ut laa'awab'ejihom wanqeb' junelik rub'el linkupuhom, ut laak'ojarib'aal k'ojk'ooq sa' xna'aj chi junelik»”.

¹⁷ Laj Natán kixye chixjunil a'in re laj David kama' kiyehe'k re xb'aan li Yos sa' li moy u a'in.

Li xtij laj David

¹⁸ Toja' naq li awab'ej David ki'ok sa' xMuheb'aal li Qaawa', koxk'ojlaaq aran ut kixye: “At Qaawa', anihin laa'in ut k'aru linjunkab'al naq xasi we chixjunil a'in?

¹⁹ Ut moko tz'aqal ta a'in cho'q aawe, at Qaawa', xb'aan naq xat-aatinak ajwi' chirix li k'aru toj chaalel sa' xb'eeneb' li walal ink'ajol li te'wanq moqon. Maa'ani nab'aanunk re li nakab'aanu laa'at, at Qaawa'.

²⁰ K'a' chik ru truuq tinye aawe? Laa'at nakanaw wu laa'in aj k'anjel chawu, at Qaawa'.

²¹ “Xab'aanu chixjunileb' li sachb'ach'oolej a'in, jo' xaye ut xwulak chawu, re naq laa'in teb'innaw.

²² Q'axal nim laawankil, at Qaawa'. Maajun junaq jo' laa'at, maak'a' chik junaq yos chawu; ka'ajwi' laa'at, jo' ak qab'ihom resil.

²³ Maajun chik tenamit wank sa' ruuchich'och' jo' laatenamit. “Laa'at, at Qaawa', xatkolok reheb' laj Israel, re naq a'anaqeb' laatenamit; xanima li xk'ab'a'eb' ut xab'aanu li sachb'ach'oolej q'axal ninqeb' ut xiwajeleb' xb'aan xnimal laarahom. Xawisiheb' sa' ruq'eb' laj Ejiipt ut xawaanilasiheb' li poyanam ut eb' li jalanil yos chiru laatenamit.

²⁴ Laa'at xatxaqab'ank reheb' laj Israel re naq a'anaqeb' laatenamit chi junelik ut laa'ataq li xYos.

²⁵ “Ut anaqwan, at Qaawa' Yos, kaw chapchooq aab'aan chi junajwa li k'aru xayeechi'i we jo'wi' re linjunkab'al. B'aanu jo' chanru laawaatin.

²⁶ Chinimaaq taxaq xloq'al laak'ab'a' chi junelik ut chiyeemanq naq li Qaawa', li Nimajwal Yos, a'an li xYos laj Israel! Xaqxooq taxaq sa' xna'aj li xjunkab'al laj David laj k'anjel chawu xb'aan xnimal aarahom.

²⁷ “Laa'at, at Qaawa', at Nimajwal Yos ut xYos laj Israel, xak'ut chiwu naq taak'ojob' linjunkab'al. Jo'kan naq laa'in aj k'anjel chawu ink'a' ninxiwak chi tz'aamank ut elajink chawu.

²⁸ At Qaawa', laa'at Yos, ut tz'aqal yaal laawaatin. Laa'at xayeechi'i li usilal a'in we laa'in laj k'anjel chawu.

²⁹ Chawosob'tesi taxaq linjunkab'al re naq wanq chawu chi junelik. At Qaawa', at inYos, jo' chanru xayeechi'i laa'at, laawosob'tesihom chihilanq taxaq sa' xb'eeneb' li walal ink'ajol chi junelik”.