2 Samuel 23 - Q'eqchi Bible

Eb' li aatin kixye laj David sa' xraqik li xyu'am

¹ Rik'in li aatin a'in kixraq aatinak laj David: “Raatin laj David, ralal laj Jesé; raatin li winq li kitaqsiik xwankil, a' li sik'b'il ru xb'aan li xYos laj Jakob, li chaab'il aj b'ichanel aj Israel:

² “Li xmusiq' li Qaawa' na'aatinak wik'in, li xloq'laj aatin wank chi xtz'uumal we.

³ Li xYos laj Israel x'aatinak, laj Kolol re laj Israel xye we: «Li nataqlank sa' xb'eeneb' li tenamit sa' tiikilal ut na'awab'ejink chi k'ojk'o xch'ool rik'in li Yos,

⁴ chanchanaq li kutan naq yo chi hik'e'k, chanchanaq li saq'e naq maak'a' li choql eq'la ut naxk'e chi lemtz'unk li pim chiru ch'och' sa' xraqik li hab'».

⁵ Kaw xaqxo linjunkab'al chiru linYos, xb'aan naq li Qaawa' xb'aanu wik'in jun sumwank chi junelik, tustu ru ut xaqxo xwankil. A'an nak'ehok we chi q'axok u chi junelik, a'an naxk'e chi tz'aqlok ru chixjunil li wajom.

⁶ Ab'anan chixjunileb' li ink'a' useb' xna'leb' kama'eb' li k'ix sa' li chaqich'och': maa'ani nach'e'ok re rik'in li ruq'.

⁷ Li ani nach'e'ok reheb', aajel ru li ch'iich' malaj jutz' che', ut te'kute'q sa' xam chi oso'k chi junajwa”.

Xk'ab'a'eb' li kaweb' rib' re laj David

⁸ A'aneb' a'in li xk'ab'a'eb' li kaweb' rib' sa' xyanqeb' laj puub' re laj David: li xb'een, a'an laj Isbahal aj Jakmón, a' li xjolomil eb' li kaweb' rib', li kixkut rib' sa' xb'eeneb' wiib' o'q'ob' (800) chi winq rik'in li xjutz' ch'iich' ut kixkamsiheb' sa' jun kutan.

⁹ Li xkab', a'an laj Elehasar, ralal laj Dodó, aj Ajot. A'an jun reheb' li oxib'eb' jwal kaweb' rib' chi yalok, ut kiwank rochb'een laj David naq ke'yalok rik'ineb' laj Filistea li ch'utch'uukeb' aran Fesdamín. Sa' li kutan a'an eb' laj Israel ke'elelik,

¹⁰ ab'an kaw xaqxo laj Elehasar chi yalok: kixkamsiheb' laj Filistea toj reetal kilub'k li xtel ut kiletzq'uuk li ruq' rik'in li xch'iich'. Sa' li kutan a'an li Qaawa' kixk'eheb' laj Israel chi xq'axb'al ruheb' laj Filistea, ut eb' laj puub' ke'sutq'iik chirixeb' yal re xxokb'al li k'a' re ru xe'reechani sa' li yalok.

¹¹ Li rox, a'an laj Samá, ralal laj Aké, aj Arar. Naq eb' laj Filistea ke'xch'utub' rib' aran Lejí, b'arwi' wank jun siir li ch'och' nujenaq chi lenteej, eb' laj puub' re Israel ke'elelik chiruheb'.

¹² Ab'an laj Samá koxxaqab' rib' sa' xyi li ch'och' a'an, kixkol rix li na'ajej ut kixq'ax ruheb' laj Filistea. Jo'ka'in naq li Qaawa' kixk'e re laj Samá jun nimla q'axok u.

¹³ Sa' jun kutan, sa' xq'ehil li q'olok, oxib' reheb' li lajeeb' xka'k'aal chi kaweb' rib' koxe'ril laj David sa' li ochoch pek re Adulán, naq jun ch'uuteb' aj Filistea wankeb' sa' li xTaq'ahil Refaín.

¹⁴ Laj David wank aran sa' li kawub'resinb'il na'ajej, ut jun ch'uuteb' aj Filistea wankeb' chaq Belén.

¹⁵ Ut sa' junpaat laj David kixtz'aama a'in: “Ani taxaq xk'ehok chiwuk' b'ayaq li ha' re li kumb' wank chi xk'atq li okeb'aal re Belén!”, chan.

¹⁶ Toja' naq li oxib'eb' chi kaweb' rib' ke'ok sa' xmuheb'aaleb' laj Filistea ut ke'risi chaq ha' sa' li kumb' wank chi xk'atq li okeb'aal re Belén; ke'xk'am ut koxe'xyeechi'i re laj David. Ab'an a'an ink'a' kiruk', kixhoy b'an jo' yeechi'inb'il mayej chiru li Qaawa':

¹⁷ “Ink'a' taxaq tixk'e we li Qaawa' ruk'b'al li ha' a'in! A'an xkik'eleb' li winq li xe'wulak chi xsik'b'al li ha' a'in ut kach'in chik maa xe'kamk”, chan. Ut ink'a' kiraj ruk'b'al. A'an a'in li ke'xb'aanu li oxib' chi winq yo'ooneb' chi yalok.

¹⁸ Laj Abisay, riitz'in laj Johab ut xyum lix Sarbia, a'an xjolomil eb' li kaweb' rib'. Sa' jun kutan kixkut rib' sa' xb'eeneb' o'lajuk'aal (300) chi winq rik'in li xjutz' ch'iich' ut kixkamsiheb'. Jo'kan naq kinimank xwankil sa' xyanqeb' li lajeeb' xka'k'aal

¹⁹ ut q'axal chik kik'ehe'k xloq'al chiruheb' chixjunil a'an, xb'aan naq ki'ok chi taqlank sa' xb'eeneb'. Ab'anan ink'a' koxtaw xloq'al jo'eb' li oxib'.

²⁰ Laj Benaías, ralal laj Johadá, aj Kabsehel, a'an jun li winq kaw xch'ool li kixb'aanu xninqal ru b'aanuhom rik'in li xjutz' ch'iich' ut kixkamsiheb'. A'an kikamsink re li wiib' xninqaleb' ru winq aj Mohab. Sa' jun kutan naq yo chaq chi kub'eek sa' choxa li ratz'amke, ki'ok sa' jun b'ekb'il ha' ut kixkamsi jun kaqkoj.

²¹ Kixkamsi ajwi' jun aj Ejiipt jwal nim roq, li wank xjutz' che' sa' ruq'. Ab'an laj Benaías koho chi xk'ulb'al yal rik'in jun ch'ina xuq', kixmaq' li jutz' che' sa' ruq' laj Ejiipt ut rik'in ajwi' a'an kixkamsi.

²² A'in kixb'aanu laj Benaías, ralal laj Johadá; ut rik'in a'an kinimank xwankil sa' xyanqeb' li lajeeb' xka'k'aal li kaweb' rib'.

²³ Q'axal chik kik'ehe'k xwankil chiruheb' chixjunil a'an, ab'anan ink'a' koxtaw xloq'al jo'eb' li oxib'. Ut laj David kixk'e laj Benaías chi taqlank sa' xb'eeneb' laj k'aak'alehom re.

²⁴ Sa' xyanqeb' li lajeeb' xka'k'aal wank laj Asahel, riitz'in laj Johab, jo' ajwi' laj Eljanán, ralal laj Dodó, Belén xtenamit;

²⁵ laj Samá aj Jarod; laj Eliká aj Jarod;

²⁶ laj Jeles aj Bet-Pélet; laj Irá, ralal laj Ikés, Tékoha li xtenamit;

²⁷ laj Abiéser aj Anatot; laj Sabení aj Jusá;

²⁸ laj Salmón aj Ajoj; laj Majray aj Netofá;

²⁹ laj Jeled, ralal laj Bahaná, Netofá li xtenamit; laj Itay, ralal laj Ribay, aj Kibehá sa' xteepal Benjamín;

³⁰ laj Benaías aj Piratón; laj Hiday, chalenaq chaq chire li nima' re Kahás;

³¹ laj Abibal aj Bet-Arabá; laj Asmábet aj Bajurín;

³² laj Eliajbá aj Sahalbín; laj Yasén aj Kisón; laj Jonatán,

³³ ralal laj Samá, Arar li xtenamit; laj Ajián, ralal laj Sarar, aj Arar;

³⁴ laj Elifélet, ralal laj Ajasbay, Bet-Mahaká li xtenamit; laj Elián, ralal laj Ajitófel, Kiló li xtenamit;

³⁵ laj Jesró aj Karmeel; laj Paray aj Arab;

³⁶ laj Ikal, ralal laj Natán, Sobá li xtenamit; laj Baní aj Gad;

³⁷ laj Sélek aj Amón; laj Najray aj Beherot, aj tenq' re laj Johab, a' li xyum lix Sarbia;

³⁸ laj Irá aj Yatir; laj Kareb aj Yatir

³⁹ ut laj Urías aj Hit. Li xk'ihaleb' a'an: wuqub' xka'k'aal chi winq.