2 Samuel 17 - Q'eqchi Bible

Laj Jusay kixpo' ru li xk'uub'ahom laj Ajitófel

¹ Moqon chik laj Ajitófel kixye re laj Absalón: “Anaqwan ok we chi xsik'b'al ruheb' kab'laju mil chi winq ut sa' ajwi' li q'oqyink a'in tinxik chi xsik'b'al laj David.

² Toxinchap naq lub'jenaqaq ut maak'a'aq xmetz'ew; twoksi xxiw, ut chixjunileb' li wankeb' rochb'een te'eleliq chiqu. Ka'ajwi' li awab'ej tinkamsi,

³ ut chirix chik a'an tinsutq'isiheb' aawik'in chixjunileb' li tenamit, jo' naq li ixaqilb'ej nasutq'iik rik'in li xb'eelom. Laa'at jun ajwi' chi winq taawaj xkamsinkil; ut chi jo'kan chixjunil li tenamit taawanq sa' tuqtuukilal”.

⁴ Li na'leb' a'in kiwulak chiru laj Absalón jo'wi' chiruheb' chixjunil li xcheekal winqul laj Israel.

⁵ Ab'an laj Absalón kixtaqla ajwi' xb'oqb'al laj Jusay aj Arkí re rab'inkil li raatin.

⁶ Naq laj Jusay kiwulak rik'in laj Absalón, a'in kixye re: “Jo'ka'in xye laj Ajitófel. Ma us xb'aanunkil li naxye? Wi ut ink'a', ye laa'at k'aru nakak'oxla”.

⁷ Kichaq'ok laj Jusay ut kixye: “Anaqwan moko us ta li xye laj Ajitófel.

⁸ Laa'at nakanaw chi us naq laayuwa' ut eb' li winq rochb'een q'axal kaweb' rib' ut yookeb' xjosq'il anaqwan, jo' junaq tz'uqtz'un li xmaq'mank li raleb'. Jun chik: laayuwa' naxnaw yalok chi us, ut ink'a' tixnumsi li q'oqyink sa' xyanqeb' li tenamit.

⁹ Muqmu tana anaqwan sa' junaq ochoch pek malaj sa' junaq chik na'ajej. Wi li te'kamq xb'enwa a'aneb' laj puub' li neke'k'anjelak chawu, taa'elq resil a'an ut taayeemanq naq eb' li neke'okenk chirix laj Absalón xe'xk'ul jun nimla rahilal.

¹⁰ Ut a'atqeb' li yo'ooneb' chi yalok, li wankeb' xkawil xch'ooleb' jo' jun kaqkoj, te'ch'inanq xch'ool, xb'aan naq chixjunileb' laj Israel neke'xnaw naq kaw rib' laayuwa' ut eb' li wankeb' rochb'een yo'ooneb' chi yalok.

¹¹ Jo'kan naq li na'leb' nink'e laa'in, a'an naq taach'utub' chixjunileb' laj Israel, chalen chaq Dan toj Berseba (a'aneb' naab'aleb' kama' li samahib' wank chire li palaw), ut laa'at tatk'amoq xb'eheb' sa' li yalok.

¹² Toojiloq chi xk'atq laayuwa' yalaq b'ar wanq, jun xikaqo sa' xb'een jo' li ratz'amke sa' xb'een ch'och', ut maajun tqakanab' chi yo'yo, chi moko a'an chi moko eb' li wankeb' rochb'een.

¹³ Ut wi tixmuq rib' sa' junaq tenamit, chiqajunilo laj Israel taaqak'am qak'aam ut taaqakelo li tenamit toj sa' nima' re naq ink'a' tkanaaq junaq pek aran”.

¹⁴ Toja' naq laj Absalón ut chixjunileb' laj Israel ke'xye: “Q'axal us li na'leb' xk'e laj Jusay aj Arkí chiru li xk'e laj Ajitófel”, chankeb'. A' li Qaawa' ki'ajok xpo'b'al ru li xk'uub'ahom laj Ajitófel, us ta a'an jwal us, re xk'amb'al chaq li rahilal sa' xb'een laj Absalón.

Laj David kinume'k junpak'al li nima' Jordán

¹⁵ Chirix chik a'an laj Jusay kixye reheb' laj Sadok ut laj Abiatar aj tij: “A'in li na'leb' xk'e laj Ajitófel re laj Absalón ut reheb' li xcheekal winqul laj Israel, ut a'in chik li na'leb' li xink'e laa'in.

¹⁶ Anaqwan taqlahomaq chi junpaat xyeeb'al re laj David naq mixnumsi li q'oqyink sa' xtaq'ahil li chaqich'och', chiq'axonq b'an chi junpaat junpak'al li nima' re naq ink'a' taakamsiiq a'an chi moko li wankeb' rochb'een”, chan.

¹⁷ Laj Jonatán ut laj Ajimás wankeb' chire li ha' Rokel, xb'aan naq ink'a' neke'raj te'ile'q chi ok sa' li tenamit. Jun moosej ixq koho chi xyeeb'al resil reheb', ut tikto eb' a'an koheb' rik'in laj David li awab'ej.

¹⁸ Ab'anan jun saaj al ki'ilok reheb' ut koxye resil re laj Absalón. Toja' naq laj Jonatán ut laj Ajimás koheb' xkab'ichaleb' sa' aanil ut koxe'okaq sa' rochoch jun li winq aj Bajurín. A'in wank jun xb'ekb'il ha' sa' li neb'aal, ut aran ke'xmuq rib'eb'.

¹⁹ Chirix chik a'an li rixaqil li winq kixchap jun nimla t'ikr, kixtz'ap li xjulel li ha' rik'in a'an ut sa' xb'een kixk'e ke'b'il triiw re naq maak'a' taak'utunq.

²⁰ Naq eb' laj Absalón ke'wulak sa' rochoch li ixq, ke'xpatz' re: “B'ar wankeb' laj Ajimás ut laj Jonatán?”. Kichaq'ok li ixq: “Toja' xkoheb' sa' xjayal li nima'”, chan. Toja' naq eb' li xtaql laj Absalón koheb' aran chi xsik'b'aleb', ab'an maak'a' ke'xtaw; jo'kan naq ke'sutq'iik wi' chik Jerusalén.

²¹ Naq ak xikenaqeb' chik a'an, laj Ajimás ut laj Jonatán ke'elk chaq sa' xjulel li ha' ut koheb' chi xyeeb'al re laj David li awab'ej: “Xaqlinqex ut q'axonqex chi junpaat junpak'al li nima', xb'aan naq xyehom laj Ajitófel naq chalqeb' sa' eeb'een”.

²² Tikto ke'xaqliik laj David ut chixjunileb' li wankeb' rochb'een ut ke'q'axonk junpak'al li nima' Jordán. Naq kisaqewk sa' li kutan jun chik, ak wankeb' chik chixjunileb' junpak'al li nima'.

²³ Naq laj Ajitófel kixk'e reetal naq laj Absalón ink'a' kixk'ulub'an li xyehom, kixyiib' rix li xb'uur ut koho sa' rochoch sa' li xtenamit. Aran kixchaq'rab'i li xjunkab'al ut kixyatz' rib'. Jo'ka'in naq kikamk, ut ke'xmuq sa' li na'ajej kimuqe'k wi' li xyuwa'.

Laj David kiwulak Majanáhin

²⁴ Laj David kiwulak Majanáhin naq laj Absalón yo chi nume'k junpak'al li nima' Jordán rochb'een chixjunileb' laj Israel.

²⁵ Laj Absalón ak xxaqab'ahom laj Amasá cho'q xjolomileb' laj puub', cho'q reeqaj laj Johab. Laj Amasá a'an ralal jun aj Ismael, aj Yéter xk'ab'a', li kixlaq'ab' rib' rik'in lix Abigahil, xrab'in laj Najás, ras lix Sarbia, a' li xna' laj Johab.

²⁶ Laj Absalón ut eb' laj Israel ke'xyiib' li xmuheb'aaleb' aran Galahad.

²⁷ Naq laj David kiwulak Majanáhin, kik'ule'k aran xb'aan laj Sobí, ralal laj Najás, (Rabá li xtenamit, li wank sa' xteepal Amón) ut xb'aan laj Makir, ralal laj Amiel, aj Lodebar, jo'wi' xb'aan laj Barsilay, aj Rokelín re Galahad.

²⁸ Eb' a'in ke'xk'am chaq eb' li ch'aat, li pop, li sek' ut li uk'al, triiw, seb'aad, k'aj, joranb'il triiw, kenq',

²⁹ xya'al kab', rekesón, karneer ut xkeesul wakax, ut ke'xyeechi'i re laj David ut reheb' li wankeb' rochb'een re naq te'tzekanq, xb'aan naq ke'xye sa' xch'ooleb': “Laj David ut eb' li rochb'een tawajenaqeb', te'tz'okaaq ut taachaqiq reheb' xb'aan naq chalenaqeb' chaq sa' chaqich'och'”.