2 Samuel 12 - Q'eqchi Bible

Laj Natán kixq'us laj David

¹ Li Qaawa' kixtaqla laj Natán rik'in laj David. Naq li propeet kiwulak aran, kixye: “Ke'wank wiib' chi winq sa' jun tenamit, jun b'ihom ut li jun chik neb'a'.

² Li b'ihom naab'aleb' li xkarneer ut li xb'ooyx,

³ ab'an li neb'a' jun ajwi' xch'ina karneer wank, li kixloq', kixch'oolani ut kixk'iiresi sa' rochoch rochb'eeneb' li xkok'al. Rochb'een nawa'ak; sa' li xsek' na'uk'ak ut nawark chire xch'ool, jo' junaq xrab'in.

⁴ Sa' jun kutan kik'ulunk jun rula' li winq b'ihom, ab'anan a'in ink'a' kiraj xchapb'al junaq reheb' li xketomq re tixk'e chi tzekank li rula'. Jo'kan naq kixchap li xch'ina karneer li neb'a', kixkamsi ut kixk'uub' cho'q xtzekemq li rula'”.

⁵ K'ajo' naq kijosq'o'k laj David sa' xb'een li winq a'an, ut kixye re laj Natán: “Sa' xk'ab'a' li yo'yookil Yos ninye aawe naq xk'ulub' kamk li winq li xb'aanunk re a'an.

⁶ Kaasut tixtoj li ch'ina karneer xb'aan naq xb'aanu a'an ut ink'a' xtoq'ob'ank u”, chan.

⁷ Toja' naq laj Natán kixye re laj David: “Li winq a'an, a'anat laa'at. Jo'ka'in xye li Qaawa', xYos laj Israel: «Laa'in xatinxaqab' cho'q awab'ej re Israel ut xatinkol chiru laj Saúl.

⁸ Xink'e aawe li rochoch ut eb' li rixqilal laj eechal aawe; xinq'axtesi ajwi' aawe li xjunkab'al laj Israel ut laj Judá. Ut moko ka'aj ta wi' a'an, toj wank chik usilal xinb'aanu raj aawe.

⁹ Ab'anan k'a' naq xatz'eqtaana li waatin ut xab'aanu li ink'a' nawulak chiwu? Xakamsi chi ch'iich' laj Urías laj Hit, xataqla chi kamsiik xb'aaneb' laj Amón ut xak'am li rixaqil.

¹⁰ Jo'kan naq chalen anaqwan junelik wanq raaxiik' ut kamsij ib' sa' laajunkab'al, xb'aan naq xinaatz'eqtaana ut xak'am li rixaqil laj Urías aj Hit cho'q aawixaqil.

¹¹ Laa'in li Qaawa' ninye aawe naq sa' ajwi' laajunkab'al taatiklaaq chaq li rahilal sa' aab'een. Tinmaq'eb' laawixaqil chawu ut tinq'axtesiheb' re jalan chik re naq taawanq rik'ineb' chiruheb' chixjunil li tenamit.

¹² Laa'at sa' muqmu xab'aanu, ab'an laa'in chiru chixjunileb' laj Israel ut chiruheb' chixjunil li poyanam tinb'aanu li k'aru xinye»”.

¹³ Kichaq'ok laj David ut kixye: “Xinmaakob'k chiru li Qaawa'”. Ut laj Natán kixye re: “Li Qaawa' ak xkuy aamaak; ink'a' tatkamq.

¹⁴ Ab'anan xb'aan li maak xab'aanu rik'in xtz'eqtaanankil li Qaawa', laak'uula'al li toje' xyo'laak taakamq”.

¹⁵ Chirix chik a'an laj Natán kisutq'iik sa' rochoch. Li Qaawa' kixtaqla jun nimla yajel sa' xb'een li ralal laj David li kiwank rik'in li rixaqil laj Urías.

¹⁶ Toja' naq laj David ki'ok chi tz'aamank ut elajink chiru li Qaawa' chirix li k'uula'al. Ki'ayuunik ut rajlal naq na'ok sa' rochoch, naxnumsi li q'oqyink chi yokyo sa' ch'och'.

¹⁷ Eb' li cheekel winq li wankeb' sa' rochoch ke'xyal xq'e chi xwaklesinkil, ab'an a'an ink'a' kiraj chi moko kiwa'ak rochb'eeneb'.

¹⁸ Sa' xwuq li kutan kikamk li k'uula'al. K'ajo' naq ke'ok xk'a'uxl eb' laj k'anjel chiru laj David. Ke'xiwak chi xyeeb'al resil li xkamik li k'uula'al xb'aan naq ke'xye: “Naq toj yo'yo li k'uula'al ink'a' nokoorab'i naq nokoo'aatinak rik'in. Chanru naq tqaye re anaqwan naq xkamk li ralal? Mare taapo'q li xch'ool chi junajwa!”, chankeb'.

¹⁹ Naq laj David kixk'e reetal naq eb' laj k'anjel neke'hashotk chirib'ileb' rib', kixtaw ru naq kamenaq chik li xk'uula'al, ut kixye reheb': “Pe' xkamk li k'uula'al”, chan. Ke'xsume: “Hehe', xkamk”, chankeb'.

²⁰ Tikto kiwakliik laj David, ki'atink, kixk'e xsununkil b'an ut kixjal li raq'. Chirix chik a'an koho sa' rochoch li Qaawa' ut koxhupub' rib' chi loq'onink. Ut naq kisutq'iik sa' rochoch, kixpatz' xtzekemq ut kiwa'ak.

²¹ Toja' naq eb' laj k'anjel chiru ke'xye re: “K'aru li nakab'aanu? Naq toj yo'yo li k'uula'al, xat-ayuunik ut xatyaab'ak, ut anaqwan naq xkamk chik, xatwakliik ut yookat chi wa'ak”.

²² Kichaq'ok laj David: “Naq toj yo'yo link'uula'al, xin'ayuunik ut xinyaab'ak, xb'aan naq xinye sa' inch'ool: Chan taxaq naq xruxtaana wu li Qaawa' ut ink'a' taakamq link'uula'al.

²³ Ab'an anaqwan naq ak xkamk, k'a' naq tin'ayuuniq? Ma truuq tab'i' tinyoob'tesi wi' chik? Laa'in tinxik wan wi' a'an, ab'an a'an ink'a' chik taachalq wik'in”, chan li awab'ej.

Xyo'lajik laj Salomón

²⁴ Chirix chik a'an laj David koxk'ojob' xch'ool lix Betsabé li rixaqil; ki'ok wan wi' a'an ut kiwank rik'in. Ut a'an kiwank jun chik xk'uula'al, aj Salomón kik'ehe'k cho'q xk'ab'a'. Li Qaawa' kixra laj Salomón,

²⁵ ut kixtaqla laj Natán li propeet chi xyeeb'al: “Sa' ink'ab'a' laa'in, aj Yedidías tixk'ab'a'in li k'uula'al a'in, li naraj naxye: «Raaro xb'aan li Qaawa'»”.

Laj David kixchap li tenamit Rabá

²⁶ Laj Johab ki'ok wi' chik chi yalok rik'in Rabá, xtenamiteb' laj Amón, ut koxreechani li na'ajej wan wi' li awab'ej.

²⁷ Kixtaqlaheb' aj esil re xyeeb'al re laj David: “Xin'ok chi yalok rik'in Rabá ut ak xweechani li na'ajej li nawank wi' li xha'eb'.

²⁸ Ch'utub'eb' li rela'eb' laj puub' anaqwan, yalon rik'in li tenamit ut eechani. Ink'a' nawaj naq laa'in tin'eechaninq re ut taak'eemanq link'ab'a'”.

²⁹ Toja' naq laj David kixch'utub' chixjunileb' laj puub' ut koho Rabá. Kixtikib' yalok ut koxreechani li tenamit.

³⁰ Moqon chik kirisi li koroon sa' xjolom laj Milkón. Li koroon a'an wank tana oxib' aroow li raalal, yiib'anb'il rik'in oor, ut wank jun xch'ina'usil pek chiru. Laj David kirisi li tertookil pek ut kixk'e sa' li xkoroon. Naab'al chik li k'a'aq re ru kireechani laj David sa' li tenamit a'an;

³¹ ut eb' li poyanam li toj wankeb' aran, kirisiheb' ut kixk'eheb' chi jachok che', chi isink pek, chi yok'ok che' ut chi yiib'ank xan. Jo'kan ajwi' kixb'aanu rik'in chixjunileb' li xtenamiteb' aj Amón. Chirix chik a'an kisutq'iik Jerusalén rochb'een chixjunileb' laj puub'.