2 Samuel 1 - Q'eqchi Bible

Naq laj David kirab'i resil li xkamik laj Saúl

¹ Chirix li xkamik laj Saúl, laj David kisutq'iik Siklak naq ak xq'ax ruheb' laj Amalek, ut aran kikanaak chiru wiib' kutan.

² Sa' rox li kutan kiwulak sa' xmuheb'aaleb' laj puub' re laj Saúl jun li winq kok' q'ich li raq' ut nujenaq chi pojtz' sa' xjolom. Naq kiwulak wan wi' laj David kiwiq'laak ut kixhupub' rib' chiru ch'och'.

³ Ut laj David kixpatz' re: “B'ar xatchalk chaq?”. Kichaq'ok li winq: “Xin'elelik chaq sa' xmuheb'aaleb' laj puub' aj Israel”, chan.

⁴ “K'aru xk'ulmank? B'aanu usilal, ye we sa' junpaat!”, chan laj David. Kisumeek: “Eb' laj puub' aj Israel ke'elelik sa' li yalok ut naab'aleb' ke'kamsiik. Ke'kamk ajwi' laj Saúl ut laj Jonatán li ralal”.

⁵ “Chanru naq xanaw naq xe'kamk laj Saúl ut laj Jonatán li ralal?”, chan laj David re li al li kik'amok re li esilal.

⁶ Ut a'in kixsume: “Yookin chi nume'k sa' li tzuul Jelbohé ut xwil laj Saúl sutsu rix xb'aaneb' li b'eleb'aal ch'iich' ut eb' li wankeb' chirixeb' kawaay, yo chi xkuutunkil rib' rik'in li xjutz' che'.

⁷ Naq xsutq'isi rib', xril wu ut xinxb'oq. «We'kin», chankin laa'in.

⁸ Xye we: «Anihat laa'at?», chan. «Laa'in jun reheb' laj Amalek», chankin.

⁹ Ut a'an xye we: «Jilon chaq ut kamsin. Toj yo'yookin, ab'anan q'axal ra wankin», chan.

¹⁰ Toja' naq xinjilok chi xk'atq ut xinkamsi, xb'aan naq xink'e reetal naq ink'a' chik taawanq xyu'am xb'aan naq ak xt'ane'k. Chirix chik a'an xinxok li xkoroon ut li xsahob' ru li wank sa' xtel ut xink'am chaq aawe, at awab'ej”.

¹¹ Toja' naq laj David kixq'ich li raq' xb'aan xrahil xch'ool; jo'kan ajwi' ke'xb'aanu eb' li wankeb' rochb'een.

¹² Ke'ayuunik toj ki'ewuuk, neke'huyhutk chi yaab'ak chirix laj Saúl ut laj Jonatán li ralal, xb'aan naq naab'aleb' laj Israel, li xtenamit li Qaawa', ke'kamsiik chi ch'iich'.

¹³ Chirix chik a'an laj David kixpatz' re li saaj aj yehol esil: “Aj b'arat?”, chan. Kichaq'ok: “Laa'in jalan lintenamit; laa'in jun reheb' laj Amalek”, chan.

¹⁴ “Chanru naq ink'a' xatxiwak chi xtaqsinkil laawuq' ut xkamsinkil li sik'b'il ru xb'aan li Qaawa'?”, chan wi' chik laj Saúl.

¹⁵ Ut kixb'oq jun reheb' laj k'anjel chiru ut kixye re: “Jilon chi xk'atq ut kamsi!”. Ut a'an kixtiq' laj Amalek ut kixkamsi

¹⁶ naq laj David yo chi xyeeb'al: “Laa'at wankat wi' laakamik. Laa'at xatb'oqok re li tojb'amaak sa' aab'een naq xaye: «Laa'in xinkamsink re li sik'b'il ru xb'aan li Qaawa'», chankat”.

Xrahil b'ich laj David chirix laj Saúl ut laj Jonatán

¹⁷ Laj David kixb'icha li rahil b'ich a'in chirix laj Saúl ut laj Jonatán li ralal,

¹⁸ ut kixye naq chixjunileb' laj Judá te'xtzol. Li rahil b'ich a'in tz'iib'anb'il sa' xHuhil li tiik xch'ool. Naxye chi jo'ka'in:

¹⁹ “At Israel, k'a'ut naq xsache'k ru laaloq'al sa' xb'eeneb' laatzuul? Chanru naq xe't'ane'k li kaweb' rib'?

²⁰ Meeye resil aran Gat, meepuktesi resil sa'atqeb' li b'e aran Askalón. Misaho'k sa' xch'ooleb' li xrab'ineb' laj Filistea, me'ok chi ninq'ehik eb' li ixq a'an maak'a'eb' xpaab'aal!

²¹ Ex tzuul re Jelbohé, mit'ane'k chik hab' chi moko k'ajob' sa' eeb'een, xb'aan naq laa'ex ch'och' b'arwi' maak'a' li usilal. Aran xe'sache'k xwankil eb' li xkoleb' ch'iich' li kaweb' rib', aran xsache'k xloq'al li xkoleb' ch'iich' laj Saúl.

²² Maajun sut ke'sutq'iik laj Saúl ut laj Jonatán chi ink'a' ta neke'xtza li xch'iich'eb' ut li simajeb' sa' xkik'eleb' li kamenaq, sa' xxeeb'uleb' li yo'ooneb' chi yalok.

²³ Chiru chixjunil li xyu'ameb' xe'xra rib' laj Saúl ut laj Jonatán. Chi moko li kamk xjachok reheb'. Q'axal seeb'eb' chiruheb' li t'iw ut q'axal kaweb' rib' chiruheb' li kaqkoj!

²⁴ Ex ixq aj Israel, yaab'anqex chirix laj Saúl li xexxtiqib' rik'in kaqi t'ikr ut chaab'il liin, li xk'ehok xsahob' ru leeraq' rik'in oor.

²⁵ K'a'ut naq xe't'ane'k li kaweb' rib' sa' li yalok? K'a'ut naq xkamk laj Jonatán sa' xb'eeneb' li tzuul?

²⁶ K'ajo' linyot'ik aab'aan, a Jonatán, at was li numtajenaq inrahomat! Q'axal xchaq'al ru cho'q we laarahom chiru li xrahomeb' li ixq.

²⁷ K'a'ut naq xe't'ane'k li kaweb' rib'? K'a'ut naq xe'oso'k li yo'ooneb' chi yalok?”.