2 Reyes 8 - Q'eqchi Bible

Li ixq aj Sunam kireechani wi' chik li k'aru re

¹ Kixye laj Eliseo re li ixq li kiwaklesiik chi yo'yo li xyum: “Ayu aawochb'eeneb' laakomon. Ayu chi wank sa' jalan chik na'ajej, xb'aan naq li Qaawa' xye resil naq taawanq we'ej chiru wuqub' chihab' sa' li tenamit a'in, ut ak xtiklaak chikan”.

² Kixaqliik li ixq ut kixb'aanu jo' kiyehe'k re xb'aan li xtaql li Yos: koho rochb'eeneb' li xkomon chi kanaak wuqub' chihab' sa' xteepal Filistea.

³ Naq kinume'k li wuqub' chihab', kisutq'iik chaq li ixq sa' xteepal Filistea ut koho chi xtz'aamankil chiru li awab'ej naq taaq'axtesimanq wi' chik li rochoch ut li xch'och'.

⁴ Sa' li honal a'an li awab'ej yo chi aatinak rik'in laj Kejasí, laj tenq' re li propeet Eliseo, yo chi xyeeb'al: “Seeraq'i we chixjunil li sachb'ach'oolej kixb'aanu laj Eliseo”.

⁵ Ut naq laj Kejasí yo chi xseeraq'inkil re li awab'ej chanru naq laj Eliseo kixwaklesi wi' chik chi yo'yo jun ch'ina'al kikamk, kiwulak li ixq li xyoob'tesiik wi' chik li xyum; kijilok chi xk'atq re xpatz'b'al naq chiq'axtesiiq wi' chik li rochoch ut li xch'och'. Toja' naq laj Kejasí kixye: “At awab'ej, a'an a'in li ixq ut a'an a'in li xyum li xyoob'tesiik wi' chik xb'aan laj Eliseo”.

⁶ Li awab'ej kixpatz' re li ixq ma yaal a'an, ut li ixq kixtikib' xseeraq'inkil re chixjunil. Toja' naq li awab'ej kixxaqab' jun reheb' laj ilol re li xjunkab'lal chi xtenq'ankil li ixq: “Q'ajsi re li ixq chixjunil li kiwank re junxil ut li xtz'aq ru li rawimq, chalen sa' li kutan naq ki'elk sa' li tenamit toj anaqwan”, chan li awab'ej.

Laj Eliseo ut laj Jasahel aj Damaask

⁷ Chirix chik a'an laj Eliseo koho Damaask, naq yaj laj Ben-Hadad, awab'ej re Aram. Tikto ke'xye resil re li awab'ej: “Li xtaql li Yos yo chi chalk arin”, chankeb'.

⁸ Toja' naq li awab'ej kixye re laj Jasahel: “K'am junaq simaatan ut ayu chi xk'ulb'al li xtaql li Yos. Xpatz'aq re li Qaawa' chiwix: «Ma tinkole'q chiru li yajel a'in malaj ut ink'a'?»”.

⁹ Laj Jasahel koho chi xk'ulb'al laj Eliseo ut kixk'am li k'a'aq re ru jwal chaab'il re Damaask, iiqanb'il xb'aan ka'k'aal chi kameey. Ut naq kiwulak wan wi' li xtaql li Yos, koxxaqab' rib' chiru ut kixye re: “Laj Ben-Adad laawalal, awab'ej re Aram, xinxtaqla chaq aawik'in chi xpatz'b'al aawe: «Ma tinkole'q chiru li yajel a'in malaj ut ink'a'?»”.

¹⁰ Kichaq'ok laj Eliseo: “Ayu ut ye re, naq taak'iraaq. Ab'anan li Qaawa' xk'ut ajwi' chiwu naq chi seeb' taakamq chi maak'a' chik xja'lenkil”.

¹¹ Chirix chik a'an laj Eliseo kixka'ya laj Jasahel jun k'amok ut ki'ok chi yaab'ak.

¹² “K'a'ut naq nakatyaab'ak, wa'chin?”, chan laj Jasahel. Laj Eliseo kixsume: “Xb'aan naq ninnaw li rahilal taab'aanu reheb' laj Israel: taak'ateb' li ochoch kawub'resinb'ileb', taakamsiheb' chi ch'iich' eb' li saaj winq, taaputz'iheb' li xk'uula'aleb' ut taacho'eb' chi ch'iich' li xsa'eb' li ixq wankeb' sa' yu'am”, chan.

¹³ Kichaq'ok laj Jasahel: “Chanru naq tinb'aanu chi jo'kan? Laa'in maak'a' nin'ok wi'. Chanchanin junaq tz'i'”. Ut laj Eliseo kixye re: “Li Qaawa' xk'utb'esi chiwu naq laa'ataq li awab'ej re Aram”.

¹⁴ Toja' naq laj Jasahel kixkanab' laj Eliseo ut kisutq'iik rik'in li awab'ej li kixpatz' re: “K'aru xye chaq aawe laj Eliseo?”. Kichaq'ok laj Jasahel: “Xye chaq we naq tatk'iraaq”.

¹⁵ Ab'an sa' li kutan jun chik laj Jasahel kixt'aqasi jun t'ikr sa' ha' ut kixhel chi xnaq' ru li awab'ej, toj reetal kixkamsi. Chi jo'kan laj Jasahel ki'ok chi awab'ejink sa' xna'aj.

Laj Jorán, awab'ej re Judá

¹⁶ Moqon naq ak wank ro' chihab' rokik chi awab'ejink laj Jorán, ralal laj Ajab, sa' xb'eeneb' laj Israel, ki'ok laj Jorán, ralal laj Josafat, cho'q awab'ej re Judá.

¹⁷ Kab'laju xka'k'aal chihab' wank re laj Jorán naq kixtikib' awab'ejink, ut kitaqlank chiru waqxaqib' chihab' sa' li tenamit Jerusalén.

¹⁸ Ab'anan kixb'aanu ajwi' jo' li xna'leb'eb' li awab'ej re Israel, jo' tz'aqal kixb'aanu li xjunkab'al laj Ajab, xb'aan naq kixk'am cho'q rixaqil li xrab'in laj Ajab. Jo'kan naq kixb'aanu li k'aru ink'a' nawulak chiru li Qaawa'.

¹⁹ Ab'an li Qaawa' ink'a' kiraj xsachb'al ruheb' laj Judá, sa' xk'ab'a' laj David laj k'anjel chiru, xb'aan naq kixyeechi'i re naq wanq junaq xsaqenk lochlooq chiru chi junelik.

²⁰ Chiru li x'awab'ejihom laj Jorán, eb' laj Edom ink'a' chik ke'raj wank rub'el xwankileb' laj Judá, ut ke'xxaqab' jun x'awab'ejeb'.

²¹ Toja' naq laj Jorán koho chi yalok rik'ineb' laj Saír rochb'een chixjunileb' li xb'eleb'aal ch'iich' re yalok. Koho chiru q'oqyink rochb'eeneb' laj jolominel, ut ke'yalok rik'ineb' laj Edom li yookeb' chi xsutb'aleb' ut ke'raanilasiheb'.

²² Ab'anan eb' laj Edom ke'risi rib' rub'el xwankileb' laj Judá, chalen toj anaqwan. Jo'kan ajwi' ke'xb'aanu eb' laj Libná sa'eb' li kutan a'an.

²³ Chixjunil li xyehom xb'aanuhom laj Jorán, tz'iib'anb'il sa' xHuhil xyehom ut xb'aanuhomeb' li awab'ej re Judá.

²⁴ Laj Jorán kiq'ajk kisutq'iik rik'ineb' li xxe'toonil yuwa' ut kimuqe'k sa' xtenamit laj David li xyuwa'. Chirix chik a'an a' chik laj Okosías li ralal ki'ok chi awab'ejink sa' xna'aj.

Laj Okosías, awab'ej re Judá

²⁵ Ak kab'lajuhaq chihab' rokik chi awab'ejink laj Jorán, ralal laj Ajab, awab'ej re Israel, naq laj Okosías, ralal laj Jorán, ki'ok chi awab'ejink sa' xb'een Judá.

²⁶ Laj Okosías wank wiib' xka'k'aal chihab' re naq kikanaak cho'q awab'ej, ut jun chihab' ajwi' ki'awab'ejink aran Jerusalén. Li xna' a'an x'Atalía xk'ab'a', xrab'in laj Omrí, awab'ej re Israel.

²⁷ Kixb'aanu ajwi' li xna'leb'eb' li xkomoneb' laj Ajab, ut kixb'aanu li ink'a' nawulak chiru li Qaawa' (jo' ke'xb'aanu eb' laj Ajab), xb'aan naq kixk'am cho'q rixaqil xkomoneb' laj Ajab.

²⁸ Laj Okosías rochb'een laj Jorán, ralal laj Ajab, koheb' chi yalok rik'in laj Jesahel, awab'ej re Aram, sa' li tenamit Ramot sa' xteepal Galahad. Ab'an eb' laj Aram, ke'xtiq' laj Jorán,

²⁹ ut a'in kisutq'iik Jisrehel, re naq taak'iraaq li xtiq'ilal. Toja' naq laj Okosías, ralal laj Jorán, awab'ej re Judá, koho Jisrehel chi rula'aninkil laj Jorán, ralal laj Ajab, xb'aan naq yaj.