2 Reyes 6 - Q'eqchi Bible

Li maal li kisachk ut kitawe'k wi' chik

¹ Sa' jun kutan eb' li propeet ke'xye re laj Eliseo: “Ili, li na'ajej wanko wi' aawochb'een, jwal kach'in cho'q qe.

² Kanab'o chi xik chire li nima' Jordán: qajunjunqal tqak'am junjunq qoqech ut aran tqakab'la junaq qamuheb'aal b'arwi' toowanq”. Kichaq'ok laj Eliseo: “Ayuqex”, chan.

³ Toja' naq jun reheb' li propeet kixye re: “B'aanu usilal, tqaj tatxik chiqix”. “Us, tinxik”, chan laj Eliseo.

⁴ Ut koho rochb'eeneb' toj chire li nima' Jordán, ut aran ke'ok chi yok'ok che'.

⁵ Ab'anan naq jun reheb' yo chi t'anok che', kib'oq'e'k li xmaal ut koxt'ane'q sa' li ha'. Toja' naq kixjap re chi xyeeb'al: “Toq'ob' wu, wa'chin. Li maal a'an yal xinto'oni!”.

⁶ “B'ar xnaqk?”, chan li xtaql li Yos. Naq li winq kixk'ut chiru li na'ajej b'arwi' xt'ane'k li maal, laj Eliseo kixyok' jun li che', kixkut sa' li ha' ut li maal kitaqe'k chaq sa' xb'een li ha'.

⁷ “Chap chaq li maal”, chan laj Eliseo. Li winq kixye' li ruq' ut kixchap li maal.

Laj Eliseo ut eb' laj Aram

⁸ Li awab'ej re Aram yo chi yalok rik'ineb' laj Israel. Sa' jun kutan kixch'utub'eb' chixjunil li xjolomileb' laj puub' ut kixye reheb' li na'ajej b'arwi' toxe'okaq.

⁹ Toja' naq li xtaql li Yos kixtaqla xyeeb'al resil re li awab'ej re Israel: “Matnume'k sa' li na'ajej a'an, xb'aan naq eb' laj Aram wankeb' aran”.

¹⁰ Jo'kan naq li awab'ej re Israel kixtaqlaheb' laj puub' sa' li na'ajej li kixye laj Eliseo, ut kixkol rib' naab'al sut chiruheb' laj Aram.

¹¹ K'ajo' naq ki'ok xk'a'uxl li awab'ej re Aram chirix li yo chi k'ulmank. Jo'kan naq kixch'utub' chixjunileb' li xjolomileb' laj puub' ut kixye reheb': “Ma ink'a' teeye we chanru naq nanawmank li esil a'in? Ani eere wank sa' aatin rik'in li awab'ej re Israel?”.

¹² Kichaq'ok jun reheb' li xjolomileb' laj puub': “Maajun, at awab'ej. Li xyaalalil a'an naq laj Eliseo, li propeet li wank Israel, naxye re li awab'ej re Israel chixjunil li nakaseeraq'i sa' laawochoch”.

¹³ Toja' naq li awab'ej kixye: “Ayuqex ut patz'omaq b'ar wank, re tqataqla xchapb'al”. Naq ke'xye naq laj Eliseo wan chaq Dotán,

¹⁴ li awab'ej re Aram kixtaqla aran naab'aleb' laj puub' rochb'eeneb' kawaay ut b'eleb'aal ch'iich', li ke'wulak chiru q'oqyink ut ke'xsut li tenamit.

¹⁵ Wulajaq chik toj eq'la, laj tenq' re laj Eliseo kiwakliik, ut naq ki'elk chirix kab'l, kiril naq sutsuuk li tenamit xb'aaneb' laj puub', eb' li kawaay ut eb' li b'eleb'aal ch'iich'. Toja' naq koxye re laj Eliseo: “Wa'chin, k'aru tqab'aanu?”.

¹⁶ “Matxiwak -chan laj Eliseo-. Jwal naab'aleb' li wankeb' qik'in laa'o chiruheb' a'an”.

¹⁷ Ut ki'ok chi tijok chi jo'ka'in: “At Qaawa', chate xsa' li ru re naq taa'iloq”. Li Qaawa' kixte xsa' ru laj tenq' re laj Eliseo, ut kiril li tzuul nujenaq chi kawaay re xam; wankeb' ajwi' kaarxam chi xsutam laj Eliseo.

¹⁸ Naq eb' laj Aram ke'kub'e chaq chi xchapb'al raj laj Eliseo, a'in kitijok chiru li Qaawa', ut kixye chi kama'in: “At Qaawa', mutz'o'b'resiheb' li poyanam a'in”. Ut relik chi yaal naq li Qaawa' kixmutz'o'b'resiheb' li poyanam, jo' kixpatz' laj Eliseo.

¹⁹ Chirix chik a'an laj Eliseo kixye reheb': “Maawa' a'in li b'e, chi moko a'an a'in li tenamit nekesik'. Yo'qeb' chiwix ut toxexinkanab' wan wi' li winq nekesik'”. Ut kixk'ameb' sa' li tenamit Samaria.

²⁰ Naq koxe'okaq aran Samaria, laj Eliseo kixye: “At Qaawa', chate xsa' ruheb' re naq te'iloq”. Ut li Qaawa' kixte xsa' li ruheb': sachsookeb' xch'ool naq ke'ril naq wankeb' sa' li tenamit Samaria!

²¹ Naq li awab'ej re Israel kirileb', kixpatz' re laj Eliseo: “At inyuwa', ma tinkamsiheb'?”, chan.

²² Kichaq'ok laj Eliseo: “Maakamsiheb'. Ma nakakamsiheb' tab'i' li nakachapeb' chaq sa' li yalok rik'in ch'iich' ut simaj? K'eheb' xwa ut ruk'a'eb', re naq te'wa'aq te'uk'aq, ut kanab'eb' chi sutq'iik rik'in li x'awab'ejeb'”, chan.

²³ Toja' naq kik'uub'aak xninq'eheb': ke'wa'ak ut ke'uk'ak. Chirix chik a'an li awab'ej kixchaq'rab'iheb' ut ke'sutq'iik rik'in laj eechal reheb'. Chalen chaq sa' li kutan a'an eb' laj Aram ke'xkanab' xch'i'ch'i'inkileb' laj Israel.

Laj Eliseo ut li tenamit Samaria

²⁴ Chirix chik a'an, laj Ben-Adad, awab'ej re Aram, kixch'utub' chixjunileb' laj puub' ut koxsut li tenamit Samaria.

²⁵ Xb'aan a'an kichalk jun nimla we'ej sa' li tenamit a'an. Ut kib'ayk xsutb'al li tenamit toj reetal naq li xjolom jun li b'uur kitojmank chi kaak'aal chi tumin plaat, ut kach'in xk'ot li mukuy kitojmank o'otq chi tumin plaat.

²⁶ Sa' jun kutan, naq li awab'ej re Israel yo chi nume'k sa' xb'een li xsuttz'akil li tenamit, jun li ixq kixjap re chi xyeeb'al: “Tenq'ahin, at awab'ej!”.

²⁷ Kichaq'ok li awab'ej: “Ink'a', maaye chi jo'kan. Wi li Qaawa' ink'a' nakatxtenq'a, b'ar tintaw laa'in li triiw malaj li uub' tatintenq'a wi'?

²⁸ K'aru xak'ul?”, chan li awab'ej. Kichaq'ok li ixq: “Li ixq a'an xye we: «Qatzekaaq laak'uula'al anaqwan ut wulaj tqatzeka link'uula'al laa'in», chan we.

²⁹ Jo'kan naq xqatzeka link'uula'al. Sa' li kutan jun chik xinye re: «Qakamsiiq laak'uula'al ut tqatzeka», chankin re. Ab'an a'an xmuq chiwu”.

³⁰ Naq li awab'ej kirab'i li kixye li ixq, kixq'ich li raq'. Ut naq yo chi nume'k sa' xb'een li suttz'ak, eb' li tenamit ke'ril naq, chisa' li raq', lanlo rik'in q'es ruhil t'ikr.

³¹ Tikto kixye: “Chinxrahob'tesiiq li Qaawa' chi q'axal ra, wi chiru li kutan a'in toj wanq sa' xna'aj li xjolom laj Eliseo, li ralal laj Safat”.

³² Chunchu li propeet sa' li rochoch ut chunchuukeb' ajwi' eb' li cheekel winq chi xk'atq. Tikto li awab'ej kixtaqla jun li winq chi xk'amb'al laj Eliseo. Ab'anan toj maji' ajwi' nawulak li xtaql li awab'ej, naq laj Eliseo kixye reheb' li cheekel winq: “K'ehomaq reetal. Li awab'ej a'an jun aj kamsinel, ut xtaqla chaq jun li winq chi xch'otb'al linjolom. Yo'oon wanqex! Naq tol'elq li winq, tz'apomaq li okeb'aal ut nat'omaq rix, re naq ink'a' taa'ok chaq, xb'aan naq yo ajwi' chi chalk li awab'ej chirix”.

³³ Toj yook ajwi' chi aatinak rik'ineb' li cheekel winq naq li xtaql li awab'ej kiwulak rik'in laj Eliseo ut kixye: “Li Yos xtaqlank chaq li rahilal a'in. Ink'a' chik truuq twoyb'eni naq li Qaawa' tooxtenq'a”.