2 Reyes 4 - Q'eqchi Bible

Laj Eliseo kixtenq'a jun xmalka'an

¹ Jun li ixq, rixaqil jun li propeet, kixb'oq laj Eliseo ut kixye re: “Wa', laa'at nakanaw chi us naq linb'eelom junelik xpaab' li Qaawa'. Ab'anan xkamk chi wank xk'as. Ut anaqwan li winq wan wi' qak'as, xk'ulunk ut traj xk'amk'aleb' linwiib' chi yum chi munil”.

² Kichaq'ok laj Eliseo ut kixye re: “K'aru tatintenq'a wi'? Ye we k'aru wank aawe sa' laawochoch”. Kisumeek: “Maak'a' wank we sa' li wochoch; ka'ajwi' jun ch'ina kuk chi aseeyt”.

³ Kixye laj Eliseo re: “Ayu ut to'oniheb' aakok' kuk rik'in chixjunileb' laawechkab'al, chi yamyooqeb' xsa', a' yaal jo'k'ihaleb' taataw.

⁴ Chirix chik a'an tat-ok sa' laawochoch aawochb'eeneb' laakok'al ut taatz'ap li okeb'aal chawix. Nujob'resiheb' chixjunileb' li kok' kuk chi aseeyt, ut taawisi xjuneseb' li yooqat xnujob'resinkil”.

⁵ Koho li ixq ut koxtz'ap rib' sa' li rochoch rochb'eeneb' li xkok'al. Toja' naq kixtikib' xnujob'resinkil chi aseeyt eb' li kuk neke'numsiik xb'aaneb' li xkok'al.

⁶ Ut naq ak xe'nujak chixjunileb' li kuk, kixye re li xyum: “K'am chaq junaq chik kuk”. Ab'an a'an kixye: “Maak'a' chik”. Ut sa' ajwi' li honal a'an li aseeyt kixkanab' elk sa' li ch'ina kuk.

⁷ Chirix chik a'an li ixq koho rik'in laj Eliseo li propeet chi xyeeb'al li k'aru xk'ulmank, ut a'in kixye re. “Ayu chi xk'ayinkil li aseeyt ut toj laak'as chiru li xtz'aq. Ut li k'aru taa'ela'anq, taakanaaq cho'q aawe ut cho'q reheb' laakok'al re xq'axb'al li kutan junjunq”, chan.

Laj Eliseo, li ixq aj Sunam ut li xyum

⁸ Sa' jun kutan laj Eliseo kinume'k sa' li tenamit Sunén. Aran wank jun li ixq nim xwankil, li kirelaji ru chi xik chi wa'ak sa' rochoch. Rajlal naq nanume'k laj Eliseo aran, junelik naxik chi wa'ak sa' rochoch li ixq a'an.

⁹ Toja' naq li ixq kixye re li xb'eelom: “Xink'e reetal naq li winq a'in, li rajlal nanume'k chi tzekank qik'in, a'an jun xsantil taql li Yos.

¹⁰ Qayiib'aq junaq xch'ina na'aj sa' xb'een li kab'l. Aran tqak'e xch'aat, xmeex, jun xk'ojarib'aal ut jun xsaqenk, re naq jo'q'e tol'elq qik'in, taaxik aran chi hilank”.

¹¹ Kiwulak xkutankil naq laj Eliseo kinume'k wi' chik aran; kox'okaq sa' li xch'ina na'aj ut aran kihilank.

¹² Chirix chik a'an kixye re laj Kejasí, laj tenq' re: “B'oq chaq li ixq aj Sunam”. Laj tenq' re kixb'oq chaq li ixq, ut naq a'in kiwulak,

¹³ laj Eliseo kixye re laj k'anjel chiru: “Ye re li ixq: «Jwal xach'i'ch'i'i aawib' qab'aan laa'o. K'aru truuq tatqatenq'a wi'? Ma tqatz'aama aawusilal chiru li awab'ej, malaj chiru xjolomileb' laj puub'?», cha'qat”, chan laj Eliseo. Kichaq'ok li ixq: “Laa'in sa wankin arin sa' xyanqeb' li wech tenamitul”.

¹⁴ Kixye wi' chik laj Eliseo re laj tenq' re: “K'aru tqaq'ajkamu wi' chi jo'kanan?”. Kichaq'ok laj Kejasí: “Li xch'a'ajkilal, a'an naq maak'a' xkok'al ut li xb'eelom tiix aj chik”, chan.

¹⁵ “B'oq chaq li ixq”, chan laj Eliseo. Laj Kejasí koxb'oq chaq li ixq, ab'an a'in kikanaak chi xaqxo chire li okeb'aal.

¹⁶ Toja' naq laj Eliseo kixye re: “Sa' jun chihab', chiruheb' li kutan a'in, laa'at yooqat chi xq'unb'al jun aak'uula'al teelom”. Kichaq'ok li ixq: “Ink'a', wa'chin; minaab'alaq'i laa'in aj k'anjel chawu”.

¹⁷ Ab'an kik'ulmank tz'aqal jo' kixye laj Eliseo. Sa' li chihab' jun chik li ixq kikanaak sa' yu'am ut kiwank jun xteelom k'uula'al.

¹⁸ Ut li k'uula'al kik'iik. Sa' jun kutan li ch'ina'al koho wan wi' chaq li xyuwa' chi q'olok triiw rochb'eeneb' laj k'anjel. Ab'an sa' junpaat kixjap re chi xyeeb'al:

¹⁹ “Jwal ra linjolom, jwal ra linjolom!”, chan li ch'ina'al. Toja' naq li yuwa'b'ej kixye re jun laj k'anjel: “K'am rik'in li xna'”.

²⁰ Laj k'anjel kixq'alu li ch'ina'al ut kixk'am rik'in li xna'. Li na'b'ej kixchunub' chiru li ra' toj kiwulak wa'leb', ut aran kikamk li ch'ina'al.

²¹ Toja' naq li ixq kitaqe'k sa' xna'aj li propeet ut kixsotob' li ch'ina'al chiru li warib'aal. Chirix chik a'an ki'elk, kixtz'ap li okeb'aal,

²² kixb'oq li xb'eelom ut kixye: “Taqla chaq we jun reheb' laj k'anjel ut junaq b'uur. Xik chaq we sa' aanil rik'in li xtaql li Yos, chalk chalk we”.

²³ “K'a'ut naq xik aawe rik'in anaqwan, naq maji' nayo'laak li po chi moko sábado ta?”, chan li b'eelomej. Ab'an li ixq kixye: “Matk'oxlak”.

²⁴ Ut kixtaqla xk'eeb'al rix li xb'uur ut kixye re laj k'anjel: “K'amon b'e. Yo'o ut maab'ar tatxaqliiq toj laa'in tinyehoq aawe”.

²⁵ Koho li ixq ut kiwulak sa' li tzuul Karmeel, wan wi' li propeet. Toj najt ajwi' wank li ixq naq ki'ile'k xb'aan li xtaql li Yos, li kixye re laj Kejasí: “Wank le' chaq li ixq aj Sunam.

²⁶ Ayu sa' aanil chi xk'ulb'al ut patz' re ma sa sa' xch'ool a'an, ma sa sa' xch'ool li xb'eelom ut li ch'ina'al”.

²⁷ Naq li ixq kiwulak wan wi' li xtaql li Yos, sa' xjolom li tzuul, kixwiq'ib' rib' ut kixq'alu chi roq laj Eliseo. Laj Kejasí kinach'ok re raj risinkil, ab'an li propeet kixye re: “Kanab', xb'aan naq q'axal ra sa' xch'ool, ut li Qaawa' toj maji' xk'ut chiwu k'aru yo chi xk'ulb'al”.

²⁸ Toja' naq li ixq kixye: “Wa'chin, ma xintz'aama tab'i' junaq ink'uula'al aawe? Ma ink'a' tab'i' xinye aawe naq minaab'alaq'i?”.

²⁹ Tikto laj Eliseo kixye re laj Kejasí: “Kawresi aawib', k'am linxuq' ut ayu. Wi ani taak'ul sa' b'e, maak'e xsahil xch'ool, ut wi ani taak'ehoq xsahil aach'ool, maachaq'b'e. Ayu ut toxaak'e linxuq' sa' xnaq' ru li ch'ina'al”.

³⁰ Ab'anan li xna' li ch'ina'al kixye re laj Eliseo: “Sa' xk'ab'a' li yo'yookil Yos ut sa' xk'ab'a' laayu'am ink'a' tatinkanab'”. Toja' naq laj Eliseo kixaqliik ut koho chirix li ixq.

³¹ Laj Kejasí koho chi uub'ej ut koxk'e li xuq' chi xnaq' ru li ch'ina'al, ab'anan li ch'ina'al ink'a' kik'ulunk xch'ool. Jo'kan naq laj Kejasí koho chi xk'ulb'al laj Eliseo ut kixye re: “Li ch'ina'al ink'a' nak'ulunk xch'ool”.

³² Naq laj Eliseo ki'ok sa' rochoch li ixq, aran wank li ch'ina'al kamenaq, jiljo chiru li xwarib'aal.

³³ Toja' naq ki'ok, kixtz'ap rib' aran ut kikanaak xjunes rik'in li kamenaq. Ut kitijok chiru li Qaawa'.

³⁴ Koxhupub' rib' sa' xb'een li ch'ina'al chiru li ch'aat, kixk'e li re sa' xb'een li re, li ru sa' xb'een li ru ut li ruq'eb' sa' li ruq'eb' li kamenaq. Tikto li xjunxaqalil li ch'ina'al ki'ok chi q'ixno'k.

³⁵ Kiwakliik laj Eliseo ut ki'ok chi b'eek sa' li na'ajej chi nachalk naxik. Kitaqe'k wi' chik chiru li ch'aat ut kixhupub' wi' chik rib' sa' xb'een li ch'ina'al chiru wuqub' sut. Toja' naq li ch'ina'al ki'at'isb'ak ut kixte xsa'eb' li ru.

³⁶ Laj Eliseo kixb'oq laj Kejasí ut kixye re: “B'oq chaq laj Sunam”. Laj Kejasí kixb'oq chaq li ixq, ut naq a'in ki'ok, laj Eliseo kixye re: “Chak'ul laach'ina'al”.

³⁷ Li ixq koxwiq'ib' rib' chi roq laj Eliseo. Chirix chik a'an kixk'am li xch'ina'al ut ki'elk aran.

Wiib' chik sachb'ach'oolej li kixb'aanu laj Eliseo

³⁸ Chirix chik a'an laj Eliseo kisutq'iik sa' li tenamit Kilkal, naq yo tz'aqal li we'ej aran. Sa' jun kutan k'ojk'ookeb' li propeet chiru laj Eliseo, ut a'in kixye re laj tenq' re: “K'e li nimla uk'al sa' xam ut k'uub' xtzekemqeb' li propeet”.

³⁹ Jun reheb' li propeet koho sa' k'aleb'aal chi xsik'b'al richaj, ut kixtaw chaq k'umpaap. Rik'in a'an kixnujob'resi chaq li xt'ikr, ut naq kisutq'iik chaq, kixseti sa' uk'al, sa' xyanq li tzekemq, chi ink'a' naxnaw k'aru a'an.

⁴⁰ Chirix chik a'an kik'ehe'k reheb' li winq re te'tzekanq. Ab'an naq yookeb' chi tzekank, ke'xjap re chi xyeeb'al: “At xtaql li Yos, li tzekemq a'in nakamsink!”, chankeb'. Ut maajun kiruhank chi xtzekankil.

⁴¹ “K'amomaq chaq kach'inaq ink'aj”, chan laj Eliseo. Naq ke'xk'e re, kixkut sa' li uk'al ut kixye: “K'ehomaq reheb' li poyanam re te'tzekanq”. Ut naq ke'xyal, chaab'il chik li tzekemq, maak'a' reek' li wank chisa' li uk'al!

⁴² Moqon chik kiwulak jun li winq aj Bahal-Salisá rik'in li xtaql li Yos. Kixk'am chaq junmay chi ak'waj toja' yiib'anb'il chaq, jo'wi' ak' triiw, sa' li xjelool. “K'ehomaq reheb' li poyanam re te'xwa'”, chan laj Eliseo re laj tenq' re.

⁴³ Ab'an a'in kixye: “Chanru naq tink'e a'in reheb' o'k'aal chi winq?”. Kichaq'ok laj Eliseo ut kixye: “K'e reheb' li poyanam ut xwa'aqeb', xb'aan naq jo'ka'in xye li Qaawa': «Te'wa'aq ut taa'ela'anq»”.

⁴⁴ Toja' naq laj Kejasí kixk'e li tzekemq reheb' li poyanam: ke'wa'ak ut toj naab'al ki'ela'ank, jo' tz'aqal kixye li Qaawa'.