2 Reyes 3 - Q'eqchi Bible

Laj Jorán li awab'ej

¹ Ak waqxaqlaju chihab' rokik laj Josafat cho'q awab'ej re Judá, naq laj Jorán, ralal laj Ajab, kixtikib' awab'ejink sa' xb'een Israel, aran Samaria, ut kab'laju chihab' kitaqlank.

² Laj Jorán kixb'aanu li ink'a' nawulak chiru li Qaawa', us ta ink'a' jo' tz'aqal kixb'aanu li xna' xyuwa', xb'aan naq kixjuk' li xjalam u laj Bahal li kixyiib' li xyuwa' junxil.

³ Ab'anan kixq'axtesi rib' sa' li maak kixb'aanu laj Jerobohán, ralal laj Nebat, naq kixk'am xb'eheb' laj Israel chi maakob'k.

Eb' laj Israel ut eb' laj Judá ke'yalok rik'ineb' laj Mohab

⁴ Laj Mesá, awab'ej re Mohab, wank naab'al xkarneer, ut naxtoj re li awab'ej re Israel o'k'aal mil chi karneer ut o'k'aal mil rismaleb' li chib'aat.

⁵ Ab'anan, sa' xkamik laj Ajab, li awab'ej re Mohab ink'a' chik kixpaab' li awab'ej re Israel.

⁶ Toja' naq laj Jorán li awab'ej ki'elk Samaria chi rajlankileb' chixjunileb' laj Israel,

⁷ ut kixtaqla xyeeb'al re laj Josafat, awab'ej re Judá: “Li awab'ej re Mohab ink'a' chik na'ab'ink chiwu. Ma taawaj intenq'ankil chi yalok rik'ineb' laj Mohab?”. Kichaq'ok laj Josafat: “Tinxik, xb'aan laa'in ut laa'at, lintenamit ut laatenamit, eb' linkawaay ut eb' laakawaay, junajeb' ajwi' chirib'il”, chan.

⁸ Ut kixpatz' ajwi' re: “B'ar tqak'am naq tooxik?”, chan. Laj Jorán kixsume: “Tqak'am sa' li chaqich'och' re Edom”.

⁹ Jo'kan naq li awab'ej re Israel, li awab'ej re Judá ut re Edom koheb' ut ke'b'eek chiru wuqub' kutan. Chirix chik a'an kilajk li ha' cho'q reheb' li poyanam ut cho'q reheb' li xul aj iiqanel li ke'k'ame'k chirixeb'.

¹⁰ Toja' naq li awab'ej re Israel kixye: “Chanchan naq li Qaawa' xooxch'utub' li oxib'o chi awab'ej yal re qaq'axtesinkil sa' ruq' laj Mohab!”.

¹¹ Ab'an laj Josafat kixye: “Ma maak'a' junaq xpropeet li Yos arin, re naq tixpatz' chiru li Qaawa' k'aru us tqab'aanu?”. Jun reheb' laj k'anjel chiru li awab'ej re Israel kixsume: “Arin wank laj Eliseo, ralal laj Safat, li nak'ehok xch'ajleb' laj Elías junxil”, chan.

¹² “Rik'in li winq a'an taachalq li raatin li Qaawa'”, chan laj Josafat. Tikto li awab'ej re Israel, laj Josafat ut li awab'ej re Edom koheb' rik'in laj Eliseo,

¹³ ut a'in kixye re li awab'ej re Israel: “K'aru twaj aawe laa'in? Ayu chi patz'ok rik'ineb' xpropeet laana' laayuwa'”. Kichaq'ok li awab'ej re Israel: “Mat-aatinak chi jo'kan, xb'aan naq li Qaawa' xooxb'oq li oxib'o chi awab'ej a'in yal re qaq'axtesinkil sa' ruq' laj Mohab”.

¹⁴ Toja' naq laj Eliseo kixye: “Sa' xk'ab'a' li Nimajwal Yos li nink'anjelak chiru ninye eere: Wi ta ink'a' wank arin laj Josafat, awab'ej re Judá, ink'a' raj tin'aatinaq aawik'in chi moko tatwab'i.

¹⁵ K'amomaq chaq junaq aj wajb' anaqwan”. Naq laj wajb' kixtikib' wajb'ak, kichalk li xmusiq' li Qaawa' sa' xb'een laj Eliseo

¹⁶ li kixye: “Jo'ka'in xye li Qaawa': «B'ekomaq naab'al li roqha' sa' li na'ajej a'in,

¹⁷ xb'aan naq jo'ka'in xyehom li Qaawa': Laa'ex ink'a' teeril li iq' chi moko li hab', ab'anan li na'ajej a'in taanujaq chi ha' ut tex'uk'aq laa'ex, eb' laj puub' jo' ajwi' leeketomq».

¹⁸ Ut ink'a' taak'ojlaaq xch'ool li Qaawa' rik'in a'in, xb'aan naq tixq'axtesiheb' ajwi' laj Mohab sa' eeruq'.

¹⁹ Teereechani chixjunil li xninqaleb' tenamit li suttz'akinb'ileb', teeyok'i eb' li chaab'il che', teetz'apiheb' chixjunil li yu'amha' ut teenujob'resi chi pek chixjunil li chaab'il ch'och'”.

²⁰ Ut relik chi yaal, chiru li eq'la jun chik, sa' xhonalil li mayejak, ki'ok chi chalk li ha' sa' xjayal Edom ut kinujak chi ha' li ch'och' a'an.

²¹ Naq chixjunileb' laj Mohab ke'rab'i xwulajikeb' li awab'ej chi yalok rik'ineb', ke'xch'utub' rib', chalen eb' li ak yo'oon wankeb' chi yalok ut li ak xikenaqeb' xchihab'eb', ut koxe'xtzolob' rib' sa' xnub'ajlil li tenamit.

²² Wulajaq chik naq ke'wakliik, ke'ril li saq'e nalemtz'uno'k sa' xb'een li ha'. Ut eb' laj Mohab ke'ril li ha' naq kaqkaq ru jo' li kik'.

²³ Toja' naq ke'xye: “A'an kik'. Eb' li awab'ej xe'yalok chirib'ileb' rib' ut xe'xkamsi rib'eb'. Jo'kan utan, ex aj Mohab, qaxokaq chaq li k'a'aq re ru reheb'!”, chankeb'.

²⁴ Ab'an naq ke'wulak sa' xmuheb'aaleb' laj Israel, eb' a'in ke'wakliik chaq ut ke'xtikib' yalok rik'ineb' laj Mohab, li ke'elelik chaq chiruheb'. Toja' naq eb' laj Israel ke'raanilasiheb' ut ke'xsach ruheb'.

²⁵ Chirix chik a'an ke'xjuk'iheb' li tenamit, chi xjunjunqaleb' ke'xkutuxi li pek chiruheb' li chaab'il ch'och' toj reetal kinujak; ke'xtz'apaxi eb' li yu'amha' ut ke'xyok'i eb' li che' neke'uuchink. Ka'aj chik li xsuttz'akil li tenamit Kir-Jaréset kikanaak. Ab'an eb' laj rant'in ke'xsut rix toj reetal ke'xjuk'.

²⁶ Naq li awab'ej re Mohab kixk'e reetal naq jwal kaweb' rib' laj Israel ut ink'a' neke'ruuk xq'axb'al ruheb', kixsik' ruheb' o'lajuk'aal xkab' o'q'ob' (700) chi winq li wankeb' xch'iich' ut kiraj nume'k toj wan wi' li awab'ej re Aram, ab'anan ink'a' ke'ruhank.

²⁷ Toja' naq kixchap li xb'een ralal, a' li taa'awab'ejinq raj sa' xna'aj, ut kixk'at cho'q xmayej sa' xb'een li suttz'ak. K'ajo' naq ke'ok xxiw eb' laj Israel! Ke'elk aran ut ke'sutq'iik sa' li xtenamiteb'.