2 Reyes 18 - Q'eqchi Bible

Laj Esekías, awab'ej re Judá

¹ Ak oxib' chihab' rokik laj Oseas, ralal laj Elá, cho'q awab'ej re Israel, kixtikib' awab'ejink laj Esekías, ralal laj Ajás, awab'ej re Judá.

² Oob' xka'k'aal chihab' wank re laj Esekías naq ki'ok chi awab'ejink, ut b'eleeb' xka'k'aal chihab' kitaqlank aran Jerusalén. X'Abía xk'ab'a' li xna', xrab'in laj Sakarías.

³ Kixb'aanu li nawulak chiru li Qaawa', jo' tz'aqal kixb'aanu laj David li xyuwa'.

⁴ A'an li kisachok reheb' li tijob'aal sa' xjolomeb' li tzuul, kixjuk'eb' li xjalam u pek che' neke'loq'oniik wi' eb' li jalanil yos. Kixputz'i li k'anti' yiib'anb'il rik'in q'anch'iich' xb'aan laj Moisés, xb'aan naq toj sa' li kutan a'an eb' laj Israel neke'k'atok pom chiru ut Nejustán neke'xk'e cho'q xk'ab'a'.

⁵ Kixkawu xch'ool rik'in li Qaawa', xYos laj Israel. Maajun junaq awab'ej jo' laj Esekías, sa' xyanqeb' chixjunileb' li awab'ej ke'wank xb'enwa aran Judá chi moko moqon chik.

⁶ Kixk'ojob' xch'ool rik'in li Qaawa' ut maajun wa kirisi rib' rik'in. Kixpaab' li xchaq'rab' li Qaawa' xk'ehom re laj Moisés.

⁷ Junelik ki'ochb'eeniik ut kitenq'aak xb'aan li Qaawa'; jo'kan naq jwal us ki'elk sa' chixjunil li kixb'aanu. Laj Esekías kiq'etq'eto'k chiru li awab'ej re Asiria ut ink'a' kiraj wank rub'el xwankil a'an.

⁸ Kixq'ax ruheb' laj Filistea toj Gasa ut sa' xnub'ajlil, chalen sa'eb' li rochochil k'aak'alenk tenamit toj sa'eb' li suttz'akal tenamit.

Li tenamit Samaria ki'eechaniik xb'aaneb' laj Asiria

⁹ Ak kaahib' chikab' rokik chi awab'ejink laj Esekías, ut ak xwuq xchihab' chi awab'ejink laj Oseas, ralal laj Elá, awab'ej re Israel, koho laj Salmanasar, awab'ej re Asiria, chi yalok rik'ineb' laj Samaria ut kixsut rix li tenamit.

¹⁰ Toj chiru oxib' chihab' kireechani. Ak waqib' chihab' chi awab'ejink laj Esekías, ut ak xb'ele xchihab' chi awab'ejink laj Oseas, awab'ej re Israel, naq ki'eechaniik Samaria xb'aan laj Salmanasar.

¹¹ Li awab'ej re Asiria kixk'ameb' laj Israel aran Asiria, ut kixk'eheb' chi wank sa'eb' li na'ajej Jalaj, Jabor, chire li nima' Kosán, ut sa'atq xteepaleb' laj Media.

¹² Ke'xk'ul chi jo'kan xb'aan naq ink'a' ke'xpaab' li Qaawa' li xYoseb', ut ke'xq'et li xsumwank jo'wi' chixjunil li ke'chaq'rab'iik wi' xb'aan laj Moisés, laj k'anjel chiru li Qaawa'. Ink'a' ke'xpaab' chi moko ke'xk'anjela ru.

Laj Senakerib kiyalok rik'ineb' laj Judá

¹³ Ak kaalaju chihab' rokik laj Esekías chi awab'ejink, naq laj Senakerib, awab'ej re Asiria, koho chi yalok rik'in chixjunileb' li tenamit sutsuukeb' chi tz'ak sa' xteepal Judá, ut kilajreechaniheb'.

¹⁴ Toja' naq laj Esekías, awab'ej re Judá, kixtaqla xyeeb'al resil re laj Senakerib aran Lakix: “Xinmaakob'k chawu. Chakuy inmaak, elen sa' lintenamit ut tinkuy xtojb'al li jo'k'ihal taapatz' we”. Li awab'ej re Asiria kixye re laj Esekías, awab'ej re Judá, naq tixtoj o'lajuk'aal (300) chi tumin plaat ut lajeeb' xka'k'aal (30) chi tumin oor.

¹⁵ Jo'kan naq laj Esekías kixq'axtesi chixjunil li tumin li wank sa' rochoch li Qaawa' ut sa' xk'uuleb'aal li awab'ej.

¹⁶ Chiru li kutan a'an laj Esekías kixweq re li rochoch li Qaawa' rochb'eeneb' li roqechal re risinkil li oor chiru li kixletz ajwi' laj Esekías, awab'ej re Judá, ut koxk'e re li awab'ej re Asiria.

¹⁷ Chirix chik a'an li awab'ej re Asiria kixtaqla jun xnimal ru aj k'anjel chiru, jo'wi' jun aj jolominel ut jun aj k'aak'alenel rochb'eeneb' jun teepeb' chi aj puub', re te'elq aran Lakix ut te'xik Jerusalén b'arwi' wank laj Esekías. Naq ke'wulak Jerusalén, koxe'kanaaq chi xk'atq li ha' wank chi tzuul, sa' li b'e naxik sa' li Xna'aj laj Puch'unel.

¹⁸ Tikto ke'xb'oq li awab'ej, ab'an laj Esekías ink'a' ki'elk chaq, kixtaqla b'an laj ilol re li rochoch li awab'ej, aj Eliakín xk'ab'a', ralal laj Jilkías, jo'wi' laj Sebná aj tz'iib' ut laj Johaj, ralal laj Asaf, xjolomileb' laj k'anjel.

¹⁹ Toja' naq li xnimal ru aj k'anjel aj Asiria kixye reheb': “Yehomaq li esil a'in re laj Esekías: Jo'ka'in xye chaq li xnimal ru awab'ej re Asiria: Ani nakakawu wi' laach'ool?

²⁰ Ma nakak'oxla naq li aatinak chi chaab'il a'an jwal us chiru li na'leb'ak ut li kawilal sa' xhonalil li yalok? Ani nakak'ojob' wi' laach'ool naq nakaq'etq'eti aawib' chiwu?

²¹ Nink'e reetal naq kaw aach'ool rik'ineb' laj Ejiipt chatenq'ankil. Ab'an eb' a'an moko kaweb' ta rib', chanchaneb' b'an jun kaxlan'aj jorol li naxset ut naxpaynumi li ruq' li ani naxkuutu rib' chiru. Jo'kan naxb'aanu laj Parahón, awab'ej re Ejiipt, reheb' chixjunileb' li neke'xkawu xch'ooleb' rik'in.

²² Ut wi laa'ex nekeye we: «Laa'o kaw qach'ool rik'in li Qaawa' li qaYos», ma ink'a' tab'i' a' ajwi' laj Esekías kijuk'uk re chixjunileb' li tijob'aal ut eb' li artal, naq kixye reheb' laj Judá ut eb' laj Jerusalén: «Jun ajwi' chi artal teewiq'ib' wi' eerib' chi loq'onink»?

²³ Anaqwan yalomaq eeru rik'in li awab'ej re Asiria, linwa'chin; tqak'uub' ru junaq li na'leb': Laa'in tink'e oob' o'q'ob' (2,000) aakawaay, ma taataweb' tana oob' o'q'ob' (2,000) chi winq li te'b'eeq chirixeb'.

²⁴ Ab'anan laa'at moko kaw ta aawib' chi raanilasinkil junaq reheb' laj puub' re linwa'chin, us ta a'an q'axal toq'ob'aal ru. K'a'ut naq yookat royb'eninkileb' aab'eleb'aal ch'iich' ut aakawaay aran Ejiipt?

²⁵ Ma nakak'oxla naq xinchalk chi xjuk'b'al li na'ajej a'in chi ink'a' ta xinxtaqla chaq li Qaawa'? A' li Qaawa' xyehok we: «Ayu chi xsachb'al li tenamit a'an», chan we”.

²⁶ Toja' naq laj Eliakín, laj Sebná ut laj Johaj ke'xye re li xnimal ru aj k'anjel aj Asiria: “B'aanu usilal, aatinaho sa' arameo, xb'aan naq naqataw ru. Moohaawaatina sa' hebreo, xb'aan naq chixjunileb' li wankeb' sa' xb'eeneb' li xsuttz'akil li tenamit yookeb' chi ab'ink”.

²⁷ Ab'an li xnimal ru aj k'anjel aj Asiria kixye reheb': “Meek'oxla naq li awab'ej re Asiria xinxtaqla chaq chi xyeeb'al a'in aawe chi moko re laj Esekías, laj eechal aawe. Xinxtaqla b'an chaq chi xyeeb'al reheb' li winq wankeb' chaq sa' xb'een li suttz'ak. Xb'aan naq eb' a'an jo' ajwi' laa'ex tento teelow leek'ot ut teeruk' leechu'”.

²⁸ Toja' naq li xnimal ru aj k'anjel aj Asiria kixaqliik ut ki'aatinak chi kaw xyaab' xkux sa' raatinob'aaleb' laj Judá: “Ab'ihomaq li naxye chaq li xnimal ru Awab'ej, a' li awab'ej re Asiria.

²⁹ Jo'ka'in xye chaq li awab'ej: «Meek'e eerib' chi xb'alaq'i laj Esekías, xb'aan naq a'an moko taaruuq ta chekolb'al sa' wuq' laa'in».

³⁰ Chi moko chepaab' wi tixye naq k'ojk'ooq eech'ool rik'in li Qaawa'. Meepaab' wi tixye eere: «Li Qaawa' taakoloq qe; li tenamit a'in maajoq'e taat'ane'q sa' ruq' li awab'ej re Asiria».

³¹ Meepaab' raatin laj Esekías, xb'aan naq jo'ka'in xye chaq li awab'ej re Asiria: «K'amomaq eerib' sa' usilal wik'in ut q'axtesihomaq eerib' chiwu. Chi jo'kan li junjunq eere sa tixtzeka ru li x'uub' ut li x'iig, ut taaruk' li ha' wank sa' li xkumb'.

³² Chirix chik a'an tinwulaq laa'in ut texink'am sa' jun na'ajej jo' leena'aj laa'ex, b'arwi' na'elk chi us li triiw, li uub', li aseeyt ut li xya'al kab'. Chi jo'kan taawanq leewa leeruk'a' chi yo'oon, yo'yooqex ut ink'a' texkamq. Laj Esekías yo cheb'alaq'inkil rik'in xyeeb'al naq li Qaawa' taakoloq eere.

³³ Ma wank tab'i' junaq tenamit li xkole'k sa' ruq' li awab'ej re Asiria xb'aaneb' li xyos?

³⁴ B'ar wankeb' li xyoseb' laj Jamat ut li xyoseb' laj Arpad? B'ar xkoheb' li yos re Separbáhin, re Hená ut Abá? Ma xe'ruuk tab'i' xkolb'al Samaria sa' wuq'?

³⁵ K'a' chi yosil, sa' xyanq chixjunileb' li xyoseb' li tenamit, xkol ta li xtenamit sa' wuq' laa'in? Chan put ru naq li Qaawa' tixkol li tenamit Jerusalén sa' wuq'?»”.

³⁶ Mem ke'kanaak eb' li poyanam ut maajun chik aatin ke'xye, xb'aan naq xyehom li awab'ej: “Maajun aatin te'xsume”.

³⁷ Toja' naq laj Eliakín, laj ilol re li rochoch li awab'ej, ralal laj Jilkías, jo'wi' laj Sebná laj tz'iib' ut laj Johaj, ralal laj Asaf, xjolomileb' laj k'anjel, ke'wulak rik'in laj Esekías, chi q'ichilk chik li raq'eb', ut ke'xseeraq'i re li k'aru yeeb'il chaq xb'aan li xnimal ru aj k'anjel aj Asiria.