2 Reyes 17 - Q'eqchi BibleLi nimla rahilal kichalk sa' xb'eeneb' laj Samaria ut sa' xb'eeneb' laj Israel 1 Ak kab'laju chihab' rokik laj Ajás cho'q awab'ej re Judá, kixtikib' awab'ejink laj Oseas, ralal laj Elá, sa' xb'eeneb' laj Israel, aran Samaria. B'eleeb' chihab' ki'awab'ejink, 2 ab'an kixb'aanu li ink'a' nawulak chiru li Qaawa', us ta ink'a' jwal jo' li xmaakeb' li awab'ej re Israel ke'wank xb'enwa. 3 Laj Salmanasar, awab'ej re Asiria, koho chi yalok rik'in laj Oseas, ut a'in kikanaak rub'el xwankil laj Salmanasar ut ki'ok chi xk'eeb'al xtoj re. 4 Ab'an li awab'ej re Asiria koxnaw naq laj Oseas yo chi xb'alaq'inkil: naxtaqlaheb' li xtaql rik'in laj So, awab'ej re Ejiipt, ut ink'a' chik naxk'e xtoj re kama' chaq xb'enwa. Jo'kan naq li awab'ej re Asiria kixtaqla xchapb'al laj Oseas ut kixtz'ap sa' tz'alam. 5 Chirix chik a'an li awab'ej re Asiria kixtikib' yalok rik'in chixjunileb' laj Israel, koho sa' li tenamit Samaria ut oxib' chihab' kiyalok aran. 6 B'eleeb' chihab' chik rokik chi awab'ejink laj Oseas, naq laj Salmanasar, awab'ej re Asiria, kireechani li tenamit Samaria, kixk'ameb' chi preexil laj Israel toj Asiria, ut koxkanab'atqeb' sa'eb' li na'ajej Jalaj, Jabor, chire li nima' Kosán, ut sa'atq xteepal Media. 7 A'in kik'ulmank xb'aan naq eb' laj Israel ke'maakob'k chiru li Qaawa' li xYoseb', li ki'isink chaq reheb' sa' li tenamit Ejiipt ut kixmaq'eb' sa' ruq' laj Parahón, awab'ej re Ejiipt. Ke'xloq'oniheb' li jalanil yos, 8 ut ke'xb'aanu li tz'i'b'eetalil neke'xb'aanu eb' li tenamit li kixsacheb' li Qaawa' chiruheb' laj Israel. 9 Eb' laj Israel ke'xb'aanu chi muqmu li ink'a' nawulak chiru li Qaawa' li xYoseb': ke'xyiib'atq tijob'aal re xloq'oninkileb' li jalanil yos, sa' chixjunil li xtenamiteb', chalen sa'atqeb' li kab'l najteb' xteram neke'ilok wi' li tenamit toj sa'atqeb' li tenamit suttz'akeb' rix. 10 Ke'xyiib'atq xjalam u pek che' sa' xjolomeb' li tzuul ut rub'elatqeb' li xninqal che'. 11 Aran ke'k'atok pom sa' chixjunileb' li tijob'aal, jo' neke'xb'aanu li tenamit li ke'isiik sa' xna'ajeb' xb'aan li Qaawa' chiruheb' laj Israel. Ke'xb'aanu li ink'a' us ut ke'xchiq' xjosq'il li Qaawa'. 12 Ke'xloq'oni ruheb' li jalanil yos, us ta yeeb'il reheb' xb'aan li Qaawa': “Meeb'aanu li yib' aj b'aanuhom a'an”. 13 Li Qaawa' kixq'useb' laj Israel ut eb' laj Judá chi xtz'uumal reheb' li propeet ut eb' li xtaql, naq kixye reheb': “Kanab'omaq xb'aanunkil li maa'usilal ut b'aanuhomaq li naxye linchaq'rab'. Paab'omaq lintaqlahom ut li waatin li kintijeb' wi' leena' leeyuwa' ut kink'ut cheru laa'ex chi xtz'uumal reheb' li propeet aj k'anjeleb' chiwu”. 14 Ab'anan ink'a' ke'xpaab' ut ke'xjipi xch'ool, jo' ke'xb'aanu li xna' xyuwa'eb' naq ink'a' ke'xk'ojob' xch'ooleb' rik'in li Qaawa' li xYoseb'. 15 Ke'xtz'eqtaana li xchaq'rab' ut li xsumwank li Qaawa' li kixk'ojob' rik'ineb' li xxe'toonil yuwa'eb'. Ke'xq'et li teneb'anb'il sa' xb'eeneb' ut koheb' chirixeb' li yos li maak'a' neke'ok wi'. Jo'kan naq ke'kanaak chi maak'a' neke'ok wi' ut ke'xk'anasi eb' li tenamit wankeb' chi xsutameb', us ta yeeb'il reheb' xb'aan li Qaawa' naq ink'a' te'xb'aanu jo' eb' a'an. 16 Ke'xkanab' xpaab'ankil chixjunil li xchaq'rab' li Qaawa' li xYoseb' ut ke'xha'lesi li q'anch'iich' re xyiib'ankil li xyoseb', eb' li wiib' xjalam uheb' li wakax jo' ajwi' li xjalam u lix Aserá. Ke'xwiq'ib' rib' chi xloq'oninkil ru eb' li chahim chiru choxa ut ke'mayejak chiru laj Bahal. 17 Ke'xk'ehatq chi k'ate'k eb' li ralal xk'ajoleb' cho'q mayej, ke'patz'okje'k rik'ineb' laj q'e ut ke'xtzolatq li nawalink. Ke'xk'e xch'ooleb' chi xb'aanunkil li maa'usilal xb'aan li tumin, toj reetal ke'xchiq' xjosq'il li Qaawa'. 18 K'ajo' naq kijosq'o'k li Qaawa' rik'ineb' laj Israel ut kirisiheb' chi xnaq' ru. Ka'aj chik laj Judá kikanaak rik'in. 19 Ab'anan chi moko eb' laj Judá ke'xpaab' xchaq'rab' li Qaawa' li xYoseb', ke'xk'e b'an xch'ooleb' chirix li maa'usilal li k'aynaqeb' xb'aanunkil eb' laj Israel. 20 Toja' naq li Qaawa' kixtz'eq chirix xch'ool eb' li ralal xk'ajoleb' laj Israel, kixk'ut xxutaaneb' ut kixq'axtesiheb' sa' ruq'eb' laj elq', toj reetal kirisiheb' sa' li xna'ajeb'. 21 Naq eb' laj Israel ke'risi rib' sa' xyanqeb' li ralal xk'ajol laj David ut ke'xxaqab' laj Jerobohán, ralal laj Nebat, cho'q x'awab'ejeb', laj Jerobohán kixk'eheb' laj Israel chi xtz'eqtaanankil li Qaawa' ut xb'aanunkil li maa'usilal. 22 Eb' laj Israel ke'xk'e xch'ool chi xb'aanunkil chixjunil li maak kixb'aanu laj Jerobohán ut ink'a' ke'xkanab' xb'aanunkil. 23 Toja' naq li Qaawa' kixtz'eqtaanaheb' laj Israel, jo' yeeb'il chaq chi xtz'uumal reheb' li propeet aj k'anjeleb' chiru: eb' laj Israel ke'isiik sa' li xna'ajeb' ut ke'k'ame'k sa' li tenamit Asiria chalen toj anaqwan. Kitenamito'k wi' chik Samaria 24 Li awab'ej re Asiria kixk'ameb' chaq laj Babilonia, laj Kutá, aj Abá, laj Jamat ut eb' aj Separbáhin, ut kixk'eheb' xna'aj sa' li tenamit Samaria, ke'wank wi' eb' laj Israel. Jo'kan naq ke'reechani Samaria ut ke'kanaak sa' li xna'ajeb' laj Israel. 25 Ab'an naq eb' li poyanam a'an ke'xtikib' wank Samaria, ink'a' ke'xloq'oni li Qaawa'; jo'kan naq li Qaawa' kixtaqlaheb' chaq li kaqkoj sa' xyanqeb' chi xkamsinkileb'. 26 Toja' naq kiyehe'k re li awab'ej re Asiria: “Eb' li poyanam xak'ameb' chaq chi wank Samaria ink'a' neke'xnaw li xchaq'rab' li xYos li ruuchich'och', ut A'an xtaqlaheb' chaq li kaqkoj chi xkamsinkileb', xb'aan naq ink'a' neke'xnaw li xchaq'rab' li xYos li ruuchich'och'”. 27 Kichaq'ok li awab'ej re Asiria: “Taqlahomaq junaq aj tij aran Samaria, xkomoneb' li xek'am chi preexil Asiria. Xikaq aran chi xk'utb'al chiruheb' chanru xpaab'ankil li xchaq'rab' li xYos li ruuchich'och'”, chan. 28 Toja' naq jun reheb' laj tij li ke'isiik Samaria, koho chi wank aran Betel ut kixk'ut chiruheb' chanru xloq'oninkil li Qaawa'. 29 Ab'an li junjunq chi tenamit ke'xyiib'atq xyoseb' ut ke'xk'e sa'atqeb' li tijob'aal sa' xjolomeb' li tzuul yiib'anb'ileb' xb'aaneb' laj Samaria. Li junjunq chi tenamit ke'xk'e li xyoseb' sa' li na'ajej b'arwi' wankatqeb'. 30 Eb' laj Babilonia ke'xyiib' xjalam u laj Sukot-Benot; eb' laj Kutá ke'xyiib' xjalam u laj Nerkal; eb' laj Jamat ke'xyiib' laj Asimá; 31 eb' laj Abá ke'xyiib' laj Nibjás ut laj Tartak; ut eb' laj Separbáhin ke'xk'at eb' li ralal xk'ajol sa' xk'ab'a'eb' li xyoseb', a'aneb' laj Adremélek ut Anamélek. 32 Neke'xloq'oni ajwi' ru li Qaawa', ab'an ke'xxaqab'eb' ajwi' aj tij sa' xyanqeb', re naq te'k'anjelaq sa'eb' li tijob'aal sa' xjolomeb' li tzuul. 33 Us ta neke'xloq'oni ru li Qaawa', neke'k'anjelak ajwi' chiru li xyoseb' jo' k'aynaqeb' chi xb'aanunkil sa'atqeb' li na'ajej b'arwi' ke'chalk chaq. 34 Toj anaqwan ajwi' neke'xb'aanu jo' naxye li najter na'leb'. Ink'a' neke'xloq'oni chi chaab'il li Qaawa' ut ink'a' neke'xpaab' li raatin ut li xchaq'rab'; ink'a' neke'xk'uula sa' xch'ooleb' li xtaqlahom li Qaawa', li kixchaq'rab'iheb' wi' li ralal xk'ajol laj Jakob, li kik'ehe'k aj Israel cho'q xk'ab'a'. 35 Naq li Qaawa' kixk'ojob' li sumwank rik'ineb', kixye reheb': “Ink'a' teeloq'oni ru eb' li jalanil yos; meewiq'ib' eerib' chiruheb', chi moko texk'anjelaq ut texmayejaq chiruheb'. 36 Ka'ajwi' li Qaawa' teeloq'oni ru, li ki'isink chaq eere sa' xteepal Ejiipt rik'in xnimal xwankil. Ka'ajwi' chiru A'an teewiq'ib' eerib' ut texmayejaq. 37 Teek'uula sa' eech'ool li raatin, li xchaq'rab', li xtijom ut li xtaqlahom kixk'e eere chi tz'iib'anb'il. Teepaab' a'an wulaj wulaj, ut meeloq'oni ru eb' li jalanil yos. 38 Misachk sa' eech'ool li sumwank xink'ojob' eerik'in; meeloq'oni ru eb' li jalanil yos. 39 Ka'ajwi' li Qaawa' leeYos teeloq'oni ru ut A'an texxkol chiru chixjunileb' li xik' neke'ilok eere”. 40 Ab'anan eb' a'an ink'a' ke'xpaab' raatin li Qaawa', ke'xb'aanu b'an chik li mayer loq'onink. 41 Eb' li tenamit a'an neke'xloq'oni ru li Qaawa', ab'an neke'xk'anjela ajwi' ru li jalanil yos. Toj anaqwan ajwi' eb' li ri xmameb' li ralal xk'ajol neke'xb'aanu jo' li xmama' rixa'aneb'. |
Q'eqchi DC Bible © Bible Society in Guatemala, 2005.
Bible Society in Guatemala