2 Reyes 14 - Q'eqchi Bible

Laj Amasías, awab'ej re Judá

¹ Wiib' chihab' rokik laj Johás, ralal laj Johakás, cho'q awab'ej re Israel, kixtikib' awab'ejink laj Amasías, ralal laj Johás, sa' xb'eeneb' laj Judá.

² Oob' xka'k'aal chihab' wank re laj Amasías naq kixtikib' awab'ejink, ut b'eleeb' xka'k'aal chihab' ki'awab'ejink aran Jerusalén. xJohadán xk'ab'a' li xna', Jerusalén li xtenamit.

³ Laj Amasías kixb'aanu li nawulak chiru li Qaawa', ab'an ink'a' tz'aqal jo' kixb'aanu laj David li xyuwa'; kiwank b'an jo' kixb'aanu laj Johás li xyuwa'.

⁴ Ink'a' kirisi eb' li na'ajej naloq'oniik wi' li jalanil yos, ut eb' li tenamit toj neke'xik chi mayejak ut chi k'atok pom sa'eb' li tijob'aal sa' xjolomeb' li tzuul.

⁵ Naq li x'awab'ejihom kikawuuk chi us, laj Amasías kixkamsi chixjunileb' laj jolominel li ke'kamsink re li awab'ej, li xyuwa'.

⁶ Ab'anan ink'a' kixkamsiheb' li ralal xk'ajoleb' a'an, jo' chanru tz'iib'anb'il sa' xHuhil li xChaq'rab' laj Moisés, b'arwi' li Qaawa' naxye chi jo'ka'in: “Eb' li na'b'ej yuwa'b'ej ink'a' te'kamsiiq xb'aan li maak ke'xb'aanu li alal k'ajolb'ej; chi moko eb' li alal k'ajolb'ej te'kamsiiq xb'aan xmaakeb' li xna' xyuwa'eb'. Li junjunq taakamsiiq xb'aan li maak xb'aanu”.

⁷ Laj Amasías kixkamsi lajeeb' mil chi winq aj Edom, sa' xTaq'ahil li Atz'am, ut kireechani li tenamit Selá naq kiyalok: Yoktehel chik kixk'e cho'q xk'ab'a', ut a'an naxk'ab'a'in chalen toj anaqwan.

⁸ Toja' naq laj Amasías kixtaqla xyeeb'al resil re laj Johás, ralal laj Johakás, ri laj Jehú ut awab'ej re Israel: “Kim wik'in ut yaloqo, ani tana jwal kaw rib'”.

⁹ Ab'an laj Johás, awab'ej re Israel, kixtaqla xsumenkil li raatin laj Amasías, awab'ej re Judá, chi jo'ka'in: “Li jun toon chi k'ix re Líbano kixtaqla xyeeb'al re li jun toon chi yaw re Líbano: «K'e we laarab'in cho'q rixaqil li walal», chan. Ab'anan kinume'k jun josq' aj xul re Líbano ut kixyeq'i li k'ix sa' roq.

¹⁰ At awab'ej Amasías, laa'at xasach ruheb' laj Edom, jo'kan naq nakak'e aawankil. Us b'i', naru taanima aawib', ab'anan kanaaqat sa' laawochoch! K'a' naq taasik' aarahilal ut taawaj ajwi' li xsachikeb' laj Judá aawochb'een?”.

¹¹ Ab'an laj Amasías ink'a' kixpaab'. Toja' naq laj Johás, awab'ej re Israel, kixchap xb'e ut ki'ok chi yalok rik'in laj Amasías, awab'ej re Judá, sa' li na'ajej Bet-Semes xk'ab'a', sa' xteepal Judá.

¹² Ut naq ke'q'axe'k ru eb' laj Judá xb'aaneb' laj Israel, ke'elelik chi xjunjunqaleb' toj sa' li rochocheb'.

¹³ Laj Johás, awab'ej re Israel, kixchap laj Amasías, awab'ej re Judá, ralal laj Johás ut ri laj Okosías, aran Bet-Semes ut kixk'am Jerusalén. Chirix chik a'an kiruq' junlaju xwaqk'aal moqoj (111) li tz'ak sutsu wi' li tenamit, chalen sa' li Okeb'aal re Efraín toj sa' li Okeb'aal re li Xuk.

¹⁴ Kixxok chixjunil li plaat, li oor ut chixjunil li k'a'aq re ru wank sa' rochoch li Qaawa' ut li wankatqeb' sa' rochoch li awab'ej. Kixchap ajwi' naab'aleb' li poyanam ut kisutq'iik wi' chik Samaria.

¹⁵ Chixjunil li xyehom xb'aanuhom laj Johás ut chixjunil li yalok kixb'aanu rik'in laj Amasías, awab'ej re Judá, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel.

¹⁶ Naq laj Johás kiq'ajk kisutq'iik rik'ineb' li xxe'toonil yuwa', kimuqe'k sa' li tenamit Samaria sa' xyanqeb' li awab'ej re Israel, ut a' chik laj Jerobohán li ralal kixtikib' awab'ejink sa' xna'aj.

¹⁷ Laj Amasías, ralal laj Johás, awab'ej re Judá, toj kiyo'yook chik o'laju chihab' chirix xkamik laj Johás, ralal laj Johakás, awab'ej re Israel.

¹⁸ Chixjunil li xyehom xb'aanuhom laj Amasías, tz'iib'anb'il sa' xHuhil xyehom ut xb'aanuhomeb' li awab'ej re Judá.

¹⁹ Aran Jerusalén ke'xk'uub' xkamsinkil laj Amasías; jo'kan naq a'in ki'elelik toj Lakix. Ab'anan ke'xtaqlaheb' poyanam chi xsik'b'al toj sa' li tenamit Lakix, ut aran ke'xkamsi.

²⁰ Chirix chik a'an ke'xk'am chaq chirix kawaay toj Jerusalén ut ke'xmuq sa' xtenamit laj David, sa' xyanqeb' li xxe'toonil yuwa'.

²¹ Toja' naq chixjunileb' laj Judá ke'xb'oq laj Asarías ut ke'xxaqab' cho'q awab'ej, sa' xna'aj laj Amasías li xyuwa'. Waqlaju chihab' wank re laj Asarías naq ki'ok chi awab'ejink.

²² A' laj Asarías kiwaklesink wi' chik re li tenamit Elat ut kixq'axtesi re Judá, chirix xkamik laj Amasías li xyuwa'.

Laj Jerobohán II, awab'ej re Israel

²³ O'laju chihab' rokik laj Amasías, ralal laj Johás, cho'q awab'ej re Judá, kixtikib' awab'ejink laj Jerobohán, ralal laj Johás, sa' xb'eeneb' laj Israel, sa' li tenamit Samaria. Ut jun roxk'aal chihab' ki'awab'ejink.

²⁴ A'in kixb'aanu li ink'a' nawulak chiru li Qaawa' ut ink'a' kixkanab' xb'aanunkil chixjunil li xmaak laj Jerobohán, ralal laj Nebat, naq kixk'eheb' chi maakob'k eb' laj Israel.

²⁵ A' laj Jerobohán kik'ojob'ank wi' chik re chixjunileb' li xnub'ajlil li tenamit Israel sa' xna'aj, chalen chaq sa' li okeb'aal re Jamat toj chire li palaw re Arabá, jo' kixye li Qaawa', xYos laj Israel, chi xtz'uumal re laj Jonás, li xpropeet, ralal laj Amitay, Gat-Jéfer xtenamit.

²⁶ Li Qaawa' kiril li xnimla rahilaleb' laj Israel, xb'aan naq maajun chik wank chi ach'ab'anb'il chi moko chi munil, chi moko ani ta chik natenq'ank reheb' laj Israel.

²⁷ Jo'kan naq li Qaawa' toj maji' kiraj xsachb'al li xk'ab'a' laj Israel sa' xb'een xteepal li ruuchich'och', ut kixkoleb' sa' ruq' laj Jerobohán, ralal laj Johás.

²⁸ Chixjunil li xyehom xb'aanuhom laj Jerobohán ut chixjunil li yalok kixb'aanu ut chanru naq kixkoleb' wi' chik Damaask ut Jamat cho'q re Israel, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel.

²⁹ Naq laj Jerobohán kiq'ajk kisutq'iik rik'ineb' li xxe'toonil yuwa', ke'xmuq sa' li tenamit Samaria, sa' xyanqeb' li awab'ej re Israel, ut a' chik laj Sakarías li ralal kixtikib' awab'ejink sa' xna'aj.