2 Reyes 13 - Q'eqchi Bible

Laj Johakás, awab'ej re Israel

¹ Ak oxib' xka'k'aal chihab' rokik laj Johás, ralal laj Okosías, cho'q awab'ej re Judá, kixtikib' awab'ejink laj Johakás, ralal laj Jehú, sa' xb'eeneb' laj Israel, aran Samaria. Wuqlaju chihab' ki'awab'ejink.

² Ab'anan kixb'aanu li ink'a' nawulak chiru li Qaawa', jo' kixb'aanu laj Jerobohán, ralal laj Nebat, li kik'amok xb'eheb' laj Israel chi maakob'k, ut ink'a' kixkanab' xb'aanunkil.

³ K'ajo' naq kijosq'o'k li Qaawa' sa' xb'eeneb' laj Israel ut kixq'axtesiheb' rub'el xwankil laj Jasahel, awab'ej re Aram, jo'wi' sa' ruq' laj Ben-Adad, li ralal, chiruheb' li kutan a'an.

⁴ Ab'an laj Johakás kitijok chiru li Yos re taatenq'aaq, ut li Qaawa' kirab'i li xtz'aamahom xb'aan naq naril li xrahob'tesinkileb' laj Israel xb'aan li awab'ej re Aram.

⁵ Toja' naq li Qaawa' kixxaqab' jun aj kolol reheb' sa' ruq'eb' laj Aram, ut eb' laj Israel ke'wank wi' chik sa' rochocheb' jo' chaq junxil.

⁶ Ab'anan ink'a' ajwi' ke'xkanab' li xmaak laj Jerobohán, naq kixk'eheb' chi maakob'k eb' laj Israel; toj ke'xb'aanu li ink'a' us ut ink'a' ke'risi li xjalam u lix Aserá sa' li tenamit Samaria.

⁷ Laj Johakás kikanaak yal rik'in lajeeb' roxk'aal chi aj puub' neke'yalok chirix kawaay, jo'wi' rik'in lajeeb' chi b'eleb'aal ch'iich' ut lajeeb' mil laj puub' neke'b'eek chi roqeb', xb'aan naq li awab'ej re Aram kixq'ax ruheb' ut kixsacheb' chi junajwa li junch'ol chik chi aj puub', jo' na'uxk re li pojtz' naq nayeq'iik.

⁸ Chixjunil li xyehom xb'aanuhom laj Johakás, tz'iib'anb'il sa' xHuhil li xyehom ut xb'aanuhomeb' li awab'ej re Israel.

⁹ Naq laj Johakás kiq'ajk kisutq'iik rik'ineb' li xxe'toonil yuwa', kimuqe'k sa' li tenamit Samaria, ut a' chik laj Johás li ralal kikanaak chi awab'ejink sa' xna'aj.

Laj Johás, awab'ej re Israel

¹⁰ Ak wuqlaju xka'k'aal chihab' rokik laj Johás cho'q awab'ej re Judá, kixtikib' awab'ejink laj Johás, ralal laj Johakás, sa' xb'eeneb' laj Israel, aran Samaria. Waqlaju chihab' ki'awab'ejink.

¹¹ Laj Johás kixb'aanu li ink'a' nawulak chiru li Qaawa' ut ink'a' kixkanab' xb'aanunkil li xmaak laj Jerobohán, ralal laj Nebat, naq kixk'am xb'eheb' laj Israel chi maakob'k.

¹² Chixjunil li xyehom xb'aanuhom laj Johás, jo'nimal kixb'aanu naq kiyalok rik'in laj Amasías, awab'ej re Judá, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel.

¹³ Naq laj Johás kiq'ajk kisutq'iik rik'ineb' li xxe'toonil yuwa', a' chik laj Jerobohán ki'ok chi taqlank sa' xna'aj. Laj Johás kimuqe'k aran Samaria, sa' xyanqeb' li awab'ej re Israel.

Xkamik laj Eliseo

¹⁴ Sa'eb' li kutan a'an laj Eliseo kitawe'k xb'aan jun nimla yajel ut kamk re. Toja' naq laj Johás, awab'ej re Israel, koho chi rilb'al, kixq'alu, kiyaab'ak ut kixye re: “At inyuwa', at inyuwa'! Laa'at qana' qayuwa' cho'q qe laa'o aj Israel!”, chan.

¹⁵ Kichaq'ok laj Eliseo: “Chap jun xna' simaj ut eb' li ral”, chan. Ut laj Johás kixchap jun xna' simaj ut eb' li ral.

¹⁶ Toja' naq laj Eliseo kixye re li awab'ej re Israel: “K'e laawuq' sa' xb'een li xna' simaj”. Naq li awab'ej kixb'aanu chi jo'kan, laj Eliseo kixk'e li ruq' sa' xb'een li awab'ej

¹⁷ ut kixye re: “Te li b'entaan li wank sa' xjayal releb'l saq'e”. Naq kixte li b'entaan, laj Eliseo kixye re: “Kut li ral simaj”, chan re. Ut li awab'ej kixb'aanu chi jo'kan. “Simaj re q'axok u sa' xk'ab'a' li Qaawa'! Simaj re xq'axb'al ruheb' laj Aram! Laa'at taasach ruheb' laj Aram chi junajwa sa' li na'ajej Afek”, chan laj Eliseo.

¹⁸ Ut kixye wi' chik: “Chap eb' li ral simaj”. Li awab'ej re Israel kixchapeb' a'an, ut laj Eliseo kixye: “Sak' li ch'och' chiruheb'”. Li awab'ej kixsak' li ch'och' ox sut ut kixkanab'.

¹⁹ Toja' naq li xtaql li Qaawa' kijosq'o'k chiru li awab'ej ut kixye re: “Wi ta xasak' li ch'och' oob' malaj waqib' sut, laa'at taasacheb' raj ru laj Aram chi junwaakaj! Ab'an anaqwan ox sut ajwi' taaq'ax ruheb' laj Aram”.

²⁰ Kikamk laj Eliseo ut ke'xmuq. Jun chihab' chik chirix a'an jun teepeb' aj Mohab ke'ok chi xch'i'ch'i'inkileb' laj Israel.

²¹ Sa' jun kutan wankeb' aj Israel yookeb' chi xmuqb'al jun kamenaq ut naq ke'ril eb' laj Mohab yookeb' chaq chi chalk, ke'xkut li kamenaq sa' xmuqleb'aal laj Eliseo ut ke'elelik. Ab'an li kamenaq naq koxnaqk chiru xb'aqel laj Eliseo, kiyo'laak wi' chik ut kixaqliik.

²² Laj Jasahel, awab'ej re Aram, kixrahob'tesiheb' laj Israel chiru chixjunil li xyu'am laj Johakás.

²³ Ab'an li Qaawa' kixtoq'ob'a ut kiruxtaana ruheb', kisutq'iik wi' chik rik'ineb' sa' xk'ab'a' li xsumwank rik'in laj Abrahán, laj Isahak ut laj Jakob, ut ink'a' kiraj xsachb'aleb' ru chi junajwa, chi moko kixtz'eqtaanaheb' chalen toj anaqwan.

²⁴ Naq kikamk laj Jasahel, awab'ej re Aram, a' chik laj Ben-Adad, li ralal, ki'ok chi awab'ejink sa' xna'aj.

²⁵ Laj Johás, ralal laj Johakás, kireechaniheb' wi' chik li tenamit li wankeb' rub'el xwankil laj Ben-Adad, ralal laj Jasahel, a'eb' li ke'maq'e'k chiru laj Johakás li xyuwa' sa' li yalok. Ox sut laj Johás kixq'ax ru laj Ben-Adad, ut chi jo'kan kireechaniheb' wi' chik li tenamit xteepal Israel.