2 Reyes 12 - Q'eqchi Bible

Laj Johás, awab'ej re Judá

¹ Ak wuqub' chihab' rokik laj Jehú cho'q awab'ej, naq ki'ok laj Johás chi awab'ejink, ut kitaqlank sa' li tenamit Jerusalén chiru ka'k'aal chihab'. Li xna', a'an lix Sibiá, Berseba xtenamit.

² Chiru chixjunil li xyu'am laj Johás kixb'aanu li nawulak chiru li Qaawa', jo' chanru kitije'k wi' xb'aan laj Johadá laj tij.

³ Ab'anan ink'a' kirisiheb' li na'ajej naloq'onimank wi' eb' jalanil yos, ut eb' li tenamit toj neke'mayejak ajwi' ut neke'k'atok pom sa'eb' li tijob'aal sa' xjolomeb' li tzuul.

⁴ Sa' jun kutan laj Johás kixye reheb' laj tij: “Xokomaq chixjunil li tumin li tento taamayejaaq sa' rochoch li Qaawa' ut li tumin na'alaak sa' xch'ooleb' li poyanam xq'axtesinkil cho'q re rochoch li Yos.

⁵ Li junjunq chi aj tij naru tixk'ul li tumin a'an sa' ruq'eb' laj k'anjel, re naq taak'anjelaq re xyiib'ankil chi us li rochoch li Yos b'ar yiib'aak naraj”.

⁶ Ab'anan, naq ak oxib' xka'k'aal chihab' rokik laj Johás cho'q awab'ej, eb' laj tij toj maji' ajwi' neke'xyiib' chi chaab'il li rochoch li Qaawa'.

⁷ Toja' naq laj Johás li awab'ej kixb'oq laj Johadá laj tij ut li xkomoneb' laj tij, ut kixye reheb': “K'a'ut naq toj maji' nekeyiib' chi us li rochoch li Qaawa'? Chalen anaqwan ink'a' chik teek'ul li tumin sa' ruq'eb' laj k'anjel, teeq'axtesi b'an re xyiib'ankil chi us li tijob'aal”.

⁸ Eb' laj tij ke'xk'ul xch'ool naq ink'a' chik te'xk'ul li tumin neke'xmayeja li tenamit; ke'xk'ul ajwi' xch'ooleb' naq ink'a' chik te'xjolomi li xyiib'ankil li rochoch li Yos.

⁹ Toja' naq laj Johadá laj tij kixyiib' jun ch'ina xokleb'aal tumin ut kixhop ru li xtz'apb'al. Kixk'e chi xk'atq li artal, sa' nim uq' naq na'uxk ok sa' rochoch li Qaawa'. Ut eb' laj tij li neke'wank sa' li okeb'aal, neke'xk'e sa' li ch'ina xokleb'aal a'in chixjunil li tumin nayeechi'imank sa' rochoch li Yos.

¹⁰ Naq neke'ril naq nujenaq chik li ch'ina xokleb'aal tumin, laj tz'iib' xaqab'anb'il xb'aan li awab'ej rochb'een li xyuwa'il aj tij neke'xik chi xxokb'al, neke'rajla ut neke'xk'uula jo'nimal li namayejaak sa' rochoch li Qaawa'.

¹¹ Naq ak xe'xb'is jo'k'ihal li tumin, neke'xq'axtesi reheb' laj ilol k'anjel xaqab'anb'ileb' chi xk'aak'alenkil li rochoch li Yos, ut eb' a'in neke'xjek'i re xtojb'aleb' laj peech' ut eb' laj kab'lanel re rochoch li Qaawa'.

¹² Chiru a'an neke'xtoj ajwi' eb' laj tz'ak ut eb' laj sik'ol pek, neke'loq'ok tz'alamche' ut pek, ut jo'nimal li nak'anjelak re xyiib'ankil chi us li rochoch li Qaawa'.

¹³ Ab'anan, chiru li tumin namayejamank sa' rochoch li Yos, ink'a' nayiib'amank uk'leb' sek', ch'iich', xna'aj ru xam, tronpeet, malaj k'a'aq chik ru li naru xyiib'ankil rik'in q'an malaj plaat;

¹⁴ naq'axtesimank b'an reheb' laj jolominel k'anjel re xyiib'ankil chi us li rochoch li Qaawa'.

¹⁵ Ink'a' natz'ilmank rix li tumin naq'axtesimank reheb' li neke'k'uluk re chi xtojb'aleb' laj k'anjel, xb'aan naq tiikeb' xch'ool.

¹⁶ Li tumin namayejamank re xtojb'al rix li maak jo' ajwi' chirix li maak, ink'a' nak'eemank sa' rochoch li Qaawa', reheb' b'an laj tij nakanaak.

¹⁷ Sa'eb' li kutan a'an laj Jasahel, awab'ej re Aram, koho chi yalok rik'ineb' laj Gat ut kireechani li tenamit; moqon koho Jerusalén chi yalok.

¹⁸ Toja' naq laj Johás, awab'ej re Judá, kixxok chixjunil li k'a'aq ru q'axal loq' mayejanb'il xb'aaneb' li xxe'toonil yuwa': a' laj Josafat, laj Jorán ut laj Okosías, awab'ej re Judá. Kixxok ajwi' chixjunil li kixmayeja ajwi' a'an ut chixjunil li oor wank sa' rochoch li Qaawa' ut sa' rochoch li awab'ej, ut kixtaqla re laj Jasahel, awab'ej re Aram, ut chi jo'kan laj Jasahel ink'a' chik kiyalok rik'in Jerusalén.

¹⁹ Chixjunil li xyehom xb'aanuhom laj Johás, tz'iib'anb'il sa' xHuhil xyehom ut xb'aanuhomeb' li awab'ej re Judá.

²⁰ Sa' jun kutan eb' li xjolomileb' laj puub' ke'xq'etq'eti rib' chiru laj Johás ut ke'xk'uub' xkamsinkil, ut ke'xkamsi aran Bet-Miló, sa' xb'ehil Silá.

²¹ Li ke'kamsink re laj Johás a'aneb' laj k'anjeleb' chiru, a' laj Yosakar, ralal laj Simat, ut laj Josabad, ralal laj Somer. Naq kikamk laj Johás, ke'xmuq rik'ineb' li xxe'toonil yuwa' sa' xtenamit laj David, ut a' chik laj Amasías li ralal ki'ok cho'q awab'ej sa' xna'aj.