2 Reyes 10 - Q'eqchi Bible

Naq laj Jehú kixkamsi chixjunileb' laj Ajab

¹ Lajeeb' xkaak'aaleb' li ralal xk'ajol laj Ajab wankeb' sa' li tenamit Samaria. Jo'kan naq laj Jehú kitz'iib'ank hu ut kixtaqla rik'inatqeb' li xjolomileb' li tenamit, rik'ineb' li cheekel winq ut rik'ineb' ajwi' li neke'ilok reheb' li ralal xk'ajol laj Ajab, aran Samaria; ut kixye reheb':

² “Laa'ex nekex'ilok reheb' li ralal xk'ajol laj Ajab laj eechal eere, ut eerik'in wank li xk'ihaleb' li b'eleb'aal ch'iich', eb' li kawaay, li tenamit suttz'akanb'il ut li k'a'aq re ru nak'anjelak sa' li yalok. Jo'kan naq, ka'ajwi' taawulaq li hu a'in sa' leeruq',

³ ilomaq chi us ani jwal chaab'il ut jwal tiik xch'ool sa' xyanqeb' li ralal xk'ajol leewa'chin, xaqab'omaq cho'q awab'ej sa' xna'aj li xyuwa' ut kolomaq rix li xjunkab'lal leewa'chin”.

⁴ Ab'anan eb' a'an k'ajo' naq ke'xiwak, ut ke'xye: “Eb' li wiib' chi awab'ej ink'a' xe'ruhank chi yalok rik'in: chan put ru naq tooruhanq laa'o?”, chankeb'.

⁵ Toja' naq laj ilol kab'l, laj jolominel re li tenamit, eb' li cheekel winq ut eb' laj ilol reheb' li ralal li awab'ej ke'xtaqla xyeeb'al re laj Jehú: “Laa'o aj k'anjel chawu ut tqab'aanu li k'aru taaye qe. Ink'a' tooxaqab'ank awab'ej. B'aanu li k'aru us cho'q aawe”.

⁶ Laj Jehú kixtaqla xkab' xhu re xyeeb'al reheb': “Wi laa'ex nekex'okenk chiwix ut teeraj xpaab'ankil li waatin, wulaj, sa' li honal a'in, teek'am chaq we li xjolomeb' li ralal xk'ajoleb' li awab'ej, arin Jisrehel, ut too'aatinaq”. Li lajeeb' xkaak'aal chi ralal li awab'ej wankeb' rochb'eeneb' li xninqaleb' ru sa' li tenamit, a'eb' li ke'k'iiresink reheb'.

⁷ Naq ke'xk'ul li xhu laj Jehú, eb' laj k'amol b'e aran Samaria ke'xchap li lajeeb' xkaak'aal chi alalb'ej ut ke'xch'ot li xjolomeb', ke'xk'e li xjolomeb' sa' jun chakach ut ke'xtaqla Jisrehel.

⁸ Naq kiwulak li taql rik'in laj Jehú, kixye re: “Xe'xk'am chaq li xjolomeb' li ralal xk'ajoleb' li awab'ej”. Kichaq'ok laj Jehú: “K'ehomaq sa' wiib' ch'uut sa' rokeb'aal li tenamit, ut kanaaq aran toj wulaj”, chan.

⁹ Wulajaq chik ki'elk chaq laj Jehú, kixxaqab' rib' chiruheb' li tenamit ut kixye reheb': “Laa'ex maak'a' eemaak. Relik chi yaal naq laa'in xinq'etq'eti wib' chiru li awab'ej ut xinkamsi. Ab'an ani xkamsink reheb' a'in?

¹⁰ Chenawaq naq maajun li k'aru kixye li Qaawa' chirix li xjunkab'al laj Ajab ink'a' ta taak'ulmanq. Li Qaawa' xb'aanu anaqwan jo' kixye chi xtz'uumal re laj Elías, laj k'anjel chiru”.

¹¹ Ut laj Jehú kixkamsi chixjunileb' li xkomoneb' laj Ajab li wankeb' Jisrehel, chixjunileb' li xninqaleb' ru winq, eb' li rech'alal ut eb' laj tij: maajun chik kixkanab' chi yo'yo.

¹² Chirix chik a'an laj Jehú koho Samaria ut naq kiwulak sa' xna'ajeb' laj b'esol rixeb' karneer,

¹³ kixk'uleb' li riitz'in laj Okosías, awab'ej re Judá, ut kixpatz' reheb': “Anihex laa'ex?”, chan reheb'. Ke'xsume: “Laa'o li riitz'in laj Okosías, ut xoochalk chi xk'eeb'al xsahil xch'ooleb' li ralal xk'ajol li awab'ej jo'wi' eb' li ralal xk'ajol li xna'eb' li tenamit”.

¹⁴ Toja' naq laj Jehú kixye reheb' li rochb'een: “Chapomaqeb' chi yo'yo”. Eb' li rochb'een laj Jehú ke'xchapeb' chi yo'yo, ke'xch'ot li xkuxeb' chi xk'atq xjulel ha' re li xNa'ajeb' laj b'esol rixeb' li karneer: wiib' roxk'aaleb' li ke'kamsiik. Maajun kikanaak chi yo'yo.

¹⁵ Naq laj Jehú ki'elk sa' li na'ajej a'an, kixk'ul sa' b'e laj Jonadab, ralal laj Rekab, li yo chi xik chi xk'ulb'al. Laj Jehú kixk'e xsahil xch'ool ut kixye re: “Ma tiik laach'ool chiwix jo' naq laa'in tiik linch'ool chawix?”. Kichaq'ok laj Jonadab: “Hehe', tiik linch'ool chawix!”, chan re. “Wi jo'kan, k'e laawuq' we”, chan laj Jehú. Laj Jonadab kixk'e li ruq' ut kixtaqsi rik'in sa' li xb'eleb'aal ch'iich'.

¹⁶ Kixye re: “Yo'o chiwix ut taak'e reetal li xmayik linch'ool chirix li Qaawa'”. Ut kixk'am chirix sa' li xb'eleb'aal ch'iich'.

¹⁷ Naq kiwulak Samaria, kixkamsiheb' chixjunileb' li ralal xk'ajol laj Ajab, li jo'k'ihal chik ink'a' ke'kamsiik sa' li tenamit Samaria, toj reetal ke'oso'k chi junajwa, jo' kixye li Qaawa' chi xtz'uumal re laj Elías.

Naq laj Jehú kixsach ru li xloq'oninkil laj Bahal

¹⁸ Moqon laj Jehú kixch'utub'eb' chixjunil li tenamit ut kixye reheb': “Laj Ajab kach'in ajwi' kixloq'oni ru laj Bahal, ab'an laa'in q'axal chik tinloq'oni ru.

¹⁹ Jo'kan naq b'oqomaqeb' chixjunileb' li xpropeet laj Bahal ut chixjunileb' laj tij. Maajun ink'a' ta taachalq, xb'aan naq ok we chi nimla mayejak chiru laj Bahal. Ani ink'a' taachalq, taakamsiiq”. Laj Jehú kixb'aanu chi jo'kan yal re xb'alaq'inkileb' li neke'loq'onink re laj Bahal ut tixkamsiheb'.

²⁰ Jo'kan naq kixye: “Chiwanq jun xnimal ninq'e sa' xk'ab'a' laj Bahal”. Ut jo'kan ki'uxmank.

²¹ Chirix chik a'an kixtaqla xb'oqb'aleb' li neke'paab'ank re laj Bahal sa' chixjunil Israel, ut ke'chalk chixjunileb' chi maajun li ink'a' ta kol'elq. Ke'ok sa' rochoch laj Bahal, li q'axal kinujak xb'aan xk'ihaleb'.

²² Toja' naq laj Jehú kixye re laj k'uulahom re li aq'ej: “Isi chaq chixjunileb' li aq'ej cho'q reheb' chixjunileb' laj k'anjel chiru laj Bahal”. Ut a'an kirisiheb' chaq.

²³ Moqon chik naq laj Jehú ut laj Jonadab, ralal laj Rekab, ke'ok sa' rochoch laj Bahal, laj Jehú kixye reheb' li neke'loq'onink re laj Bahal: “K'ehomaq reetal naq ink'a' te'ok chaq li neke'loq'onink re li Qaawa'; ka'ajwi'aqeb' b'an li neke'loq'onink re laj Bahal”.

²⁴ Naq eb' a'an ke'ok chi mayejak ut chi xyeechi'inkil li k'atb'il mayej, laj Jehú kixkanab'eb' chirix li ochoch kaak'aal chi winq li neke'okenk chirix, ut kixye reheb': “Wi junaq reheb' li winq li xink'e sa' leeruq' taa'eleliq, taakamsiiq junaq eere cho'q reeqaj”.

²⁵ Naq laj Jehú kiraqe'k chi xmayejankil li k'atb'il mayej, kixye reheb' laj k'aak'alenel ut li xjolomileb' laj puub': “Okanqex chisa' ut kamsihomaqeb'. Maajun chi'eleliq”. Ut ke'xkamsiheb' chi ch'iich', toltookeb' ke'kanaak aran chixjunileb'. Chirix chik a'an ke'wulak toj chisa' li rochoch laj Bahal,

²⁶ ke'risi chaq li xjalam u laj Bahal ut ke'xk'at.

²⁷ Ke'xjuk' ajwi' li x'artal laj Bahal, ke'xpuk'i li rochoch ut ke'xkanab' cho'q tz'eqleb'aal mul, chalen toj anaqwan.

²⁸ Jo'ka'in naq laj Jehú kixsach ru laj Bahal sa' li tenamit Israel.

²⁹ Ab'anan, us ta kixb'aanu a'an, laj Jehú ink'a' kixkanab' xb'aanunkil li xmaak laj Jerobohán, ralal laj Nabat, naq kixk'am xb'eheb' laj Israel chi maakob'k, rik'ineb' li saaj wakax yiib'anb'ileb' rik'in oor li wankeb' Betel ut Dan: laj Jehú ink'a' kixsacheb'.

³⁰ Kixye li Qaawa' re laj Jehú: “Laa'at chaab'il xab'aanu; xapaab' li nawulak chiwu ut xasach ruheb' li ralal xk'ajol laj Ajab jo' xraj linch'ool. Jo'kan naq eb' laawalal aak'ajol te'wanq sa' li xk'ojarib'aal Israel, toj rik'ineb' laaxikin i”.

³¹ Ab'an laj Jehú ink'a' kixpaab' chi anchal xch'ool chixjunil li xchaq'rab' li Qaawa', xYos laj Israel. Ink'a' kixkanab' xb'aanunkil li xmaak laj Jerobohán, naq kixk'am xb'eheb' laj Israel chi maakob'k.

³² Sa'eb' li kutan a'an li Qaawa' kixtikib' xk'osb'al li xna'ajeb' laj Israel. Laj Jasahel yo chi xsachb'al ruheb' sa' chixjunil li xnub'ajlileb' laj Israel,

³³ chalen chaq chire li nima' Jordán toj sa' xjayal releb'l saq'e, sa' chixjunil xteepal Galahad, Gad, Rubén ut Manasés, ut chalen chaq Aroher, chire li nima' Arnón, toj sa' xteepal Galahad ut Basán.

³⁴ Chixjunil li xyehom xb'aanuhom laj Jehú, tz'iib'anb'il sa' xHuhil li xyehom ut xb'aanuhomeb' li awab'ej re Israel.

³⁵ Naq laj Jehú kiq'ajk kisutq'iik rik'ineb' li xxe'toonil yuwa', ke'xmuq sa' li tenamit Samaria, ut a' chik laj Johakás li ralal ki'ok cho'q awab'ej sa' xna'aj.

³⁶ Waqxaqib' xka'k'aal chihab' kitaqlank laj Jehú sa' xb'eeneb' laj Israel aran Samaria.