2 Juan 1 - Q'eqchi Bible

¹ Laa'in li cheekel winq sa' li Iklees nintz'iib'ak rik'in li Qana' sik'b'il ru ut rik'ineb' li ralal xk'ajol, li ninraheb' chi tz'aqal yaal, ut moko ka'aj ta wi' laa'in; jo'kaneb' ajwi' chixjunileb' li neke'nawok re li yaal.

² Nekeb'inra sa' xk'ab'a' li yaal li nawank qik'in ut taawanq qik'in chi junelik.

³ Li usilal, li uxtaanal ut li tuqtuukil usilal li nachalk rik'in li Yos Yuwa'b'ej ut rik'in li Jesukriist, Ralal li Yuwa'b'ej, taawanq qik'in rik'in li yaal ut li rahok.

⁴ Q'axal xsaho'k sa' inch'ool naq wan xeb'intaw sa' xyanqeb' laawalal aak'ajol li yookeb' chi b'eek sa' li yaal, jo' chanru li qataqlankil xb'aan li Yuwa'b'ej.

⁵ Ut anaqwan nintz'aama chawu, at Qana' (ink'a' yookin chi tz'iib'ak aawik'in chirix jun li ak' chaq'rab', chirix b'an li chaq'rab' li wank qik'in chalen chaq sa' xtiklajik), naq chiqara qib' chiqib'il qib'.

⁶ A'an a'in li rahok: naq choowanq jo' chanru naxye li xchaq'rab' li Yos. A'an a'in li chaq'rab' (jo' chanru eerab'ihom chalen chaq sa' xtiklajik), naq chexb'eeq sa' li rahok.

⁷ Naab'aleb' laj luktesinel ch'oolej xe'waklije'k chaq sa' ruuchich'och': eb' a'an ink'a' neke'xch'olob' naq li Jesukriist koltz'ejwalo'q. A'an a'in laj Luktesinel ch'oolej ut laj Tz'eqtaanahom re li Kriist.

⁸ K'ehomaq reetal, meek'e chi sachk ru leek'anjel, wi tz'aqalaq re ru xq'ajkamunkil leek'anjel teeraj xk'ulb'al.

⁹ Chixjunil li ink'a' xaqxo sa' li xk'utum li Kriist ut na'elk sa' li xb'ehil, a'an moko wank ta li Yos rik'in. Ani xaqxo sa' li xk'utum, a'an wank li Yuwa'b'ej jo' ajwi' li K'ajolb'ej rik'in.

¹⁰ Wi wank junaq taachalq eerik'in ut ink'a' tixk'am chaq li na'leb' a'in, meek'ul sa' leerochoch chi moko teek'e xsahil xch'ool,

¹¹ xb'aan naq ani taak'ehoq xsahil xch'ool, taa'okenq sa'eb' li xyib' aj b'aanuhom.

¹² Wank raj naab'al tintz'iib'a eerik'in, ab'an ink'a' nawaj xtz'iib'ankil chiru hu ut rik'in b'on, nawoyb'eni b'an xik cherilb'al ut chi aatinak tz'aqal chiqib'il qib' re naq tz'aqalaq re ru li xsahil qach'ool.

¹³ Neke'xtaqla xsahil aach'ool eb' li ralal xk'ajol laaChaq'na' sik'b'il ru.