2 Crónicas 4 - Q'eqchi Bible

Eb' li loq'laj k'anjelob'aal

¹ Laj Salomón kixyiib' ajwi' jun li artal rik'in q'anch'iich', oob' moqoj li roq, oob' moqoj li ru ut kach'in chik maa oxib' moqoj xteram.

² Chirix chik a'an kixyiib' jun nimla xna'aj ha' rik'in q'anch'iich', li nab'isok kach'in chik maa oxib' moqoj li re junpak'al rik'in li jun chik, wan xkab' moqoj li xteram ut numenaq waqxaqib' moqoj li xsuram.

³ Chi rub'el ut sa' xsutam li xna'aj ha', wank wiib' tzol reetalil li teelom wakax, lajeetq sa' li junjunq chi xyanq ut latzlo chi junwaakaj rik'in li xna'aj ha'.

⁴ A'an ke'xk'ojob' sa' xb'een kab'laju chi b'ooyx yiib'anb'ileb' rik'in q'anch'iich': oxib' neke'ilok sa' xjayal releb'l iq', oxib' neke'ilok sa' rokeb'l saq'e, oxib' sa' xsak'leb' iq' ut li oxib' chik neke'ilok sa' releb'l saq'e. Chirix chik a'an ke'xchunub' li nimla xna'aj ha' sa' xb'eeneb' li b'ooyx, ut li roqeb' li wankeb' chirix ke'kanaak rub'el li xna'aj ha'.

⁵ Li xpimal ru li xna'aj ha', a'an junq ch'ol k'utub', ut li re chanchan ru li asuseen. Ut naxkuy oxib' mil kuk chi ha'.

⁶ Kixyiib' lajeeb' chik chi xna'aj ha', oob' sa' xnim ut oob' sa' xtz'e. Chisa' neke'xch'aj li k'aru neke'xk'at cho'q xmayejeb'; ab'an li nimla xna'aj ha' nak'anjelak reheb' laj tij re te'ch'ajoq.

⁷ Kixyiib' lajeeb' chi xna'aj kanteel rik'in oor, jo' naxye li chaq'rab', ut kixk'eheb' sa' rochoch li Qaawa', oob' sa' xnim ut oob' sa' xtz'e.

⁸ Kixyiib' ajwi' lajeeb' chi meex, ut kixk'eheb' sa' rochoch li Qaawa': oob' sa' xnim ut oob' sa' xtz'e. Kixyiib' ajwi' o'k'aal chi uk'leb' sek' rik'in oor.

⁹ Kixyiib' ajwi' li neb'aal reheb' laj tij ut li nimla neb'aal, jo' ajwi' eb' li rokeb'aal, ut kixletzi li q'anch'iich' chiruheb'.

¹⁰ Ut kixk'e li nimla xna'aj ha' sa' xseeb'al li rochoch li Yos, sa' xjayal rokeb'l iq' ut releb'l saq'e.

¹¹ Laj Jirán kixyiib' ajwi' li xna'aj li cha, li xokleb' ru xam ut eb' uk'leb' sek'. Jo'ka'in naq laj Jirán kixchoy xyiib'ankil chixjunil li kiyehe'k re xb'aan laj Salomón li awab'ej, cho'q re li rochoch li Qaawa':

¹² eb' li wiib' chi oqech, eb' li xsahob' ru li kik'eemank sa' ru'ujeb' li oqech, eb' li wiib' chi tz'ulb'il ch'iich' re ruutz'u'ujinkil ru eb' li oqech;

¹³ eb' li jun o'q'ob' (400) chi granaad reheb' li b'entaan, ka'kab' tzol chi granaad cho'q re li junjunq chi tz'ulb'il ch'iich';

¹⁴ eb' li lajeeb' chi k'ochleb'aal ut li lajeeb' chi xna'aj ha' sa' xb'eeneb' li k'ochleb'aal;

¹⁵ li nimla xna'aj ha' ut eb' li kab'laju chi b'ooyx chi rub'el xna'aj li ha';

¹⁶ eb' li xna'aj cha, eb' li xokleb' ru xam ut eb' li uk'leb' sek'. Chixjunil li k'a'aq re ru a'in kixyiib' laj Jirán cho'q re laj Salomón re te'k'anjelaq sa' rochoch li Qaawa', chixjunil yiib'anb'il rik'in tz'aqal q'anch'iich'.

¹⁷ Li awab'ej kixk'eheb' chi yiib'aak rik'in seb', sa' xtaq'ahil li nima' Jordán, sa' xyanq Sukot ut Sartán.

¹⁸ K'ajo' xk'ihaleb' li k'anjelob'aal a'in kixk'e chi yiib'aak laj Salomón, ink'a' naru xb'irb'al rix chixjunil li q'anch'iich' li ki'oksimank.

¹⁹ Laj Salomón kixk'e ajwi' chi yiib'aak chixjunil li k'a'aq re ru wank sa' rochoch li Qaawa': li artal yiib'anb'il rik'in oor, li meex li nak'eemank wi' li mayejanb'il wa,

²⁰ eb' li xna'aj kanteel, yiib'anb'ileb' rik'in oor, li wankeb' chiru li Santil Na'ajej rochb'eeneb' li xsaqenk, re naq lochlooqeb' jo' naxye xchaq'rab'il li mayejak;

²¹ eb' li uutz'u'uj, eb' li xna'aj xam ut eb' li waal (chixjunileb' a'in yiib'anb'ileb' rik'in oor);

²² eb' li ch'iich', eb' li uk'leb' sek', li xna'aj li b'iin, li xna'aj ru xam junes tz'aqal oor. Yiib'anb'ileb' ajwi' rik'in oor eb' li rokeb'aal li Santil Na'ajej, a' li q'axal Sant xk'ab'a', ut eb' li rokeb'aal li rochoch li Qaawa'.