2 Crónicas 3 - Q'eqchi Bible

Laj Salomón kixyiib' li rochoch li Qaawa'

¹ Laj Salomón kixtikib' xkab'lankil li rochoch li Qaawa' aran Jerusalén, sa' li tzuul Moria xk'ab'a', b'arwi' kixk'ut rib' li Qaawa' chiru laj David li xyuwa', sa' li na'ajej kixk'uub' laj David, sa' xch'oxleb'aal laj Ornán, Jebús xtenamit.

² Kixtikib' k'anjelak sa' li xkab' po, ak kaahib' chihab' chik rokik chi awab'ejil.

³ A'an a'in li rub'elankil kixk'e laj Salomón cho'q re li rochoch li Qaawa': wan wuqlaju moqoj li roq ut numenaq oob' moqoj li ru.

⁴ Oob' moqoj xnimal ru li xneb'aalil, jo' li xnimal xsa' li rochoch li Yos, ut li xteram a'an oob' moqoj ajwi'. Laj Salomón kixletzi xsa' rik'in oor;

⁵ kixtz'ap li xsa' li loq'laj na'ajej rik'in saqichaj ut kiruutz'u'uji ru rik'in chaab'il oor. Toja' naq kiruutz'u'uji ru rik'ineb' let'exinb'il kala' ut kok' kareen,

⁶ jo' ajwi' rik'in jalan jalanq chi pek chaq'al ru. Li oor ke'roksi, a'an li jwal terto xtz'aq.

⁷ Kixletzi oor chisa' chixjunil li loq'laj ochoch: eb' li tz'amb'a, li tz'ak, eb' li okeb'aal ut chirixeb' li okeb'aal, ut kixlet'exiheb' xjalam uheb' li kerubín chiru li tz'ak.

⁸ Kixyiib' ajwi' li na'ajej q'axal Sant, oob' moqoj li roq, juntaq'eet rik'in li xnimal ru li rochoch li Yos, ut oob' moqoj ajwi' li ru. Toja' naq kixletzi rik'in chaab'il oor, ka'k'aal xkab' o'q'ob' (440) kintal kiroksi aran.

⁹ Numenaq junq liib'r li junjunq chi klawx. Kixletzi ajwi' rik'in oor xsa' li na'ajej wank taqe'q.

¹⁰ Sa' li na'ajej q'axal Sant kixlet'exi wiib' kerubín ut kixletzi oor chiruheb'.

¹¹ Oob' moqoj li roq li xxik'eb'; ut jun reheb' a'an, numenaq jun moqoj li xnimal, nokoxtaw li tz'ak re li nimla na'ajej, juntaq'eet rik'in li xik' jun chik: nokoxk'ul rib' rik'in li xxik' li xb'een kerubín.

¹² Jo'kan ajwi' li kerubín jun chik: numenaq jun moqoj xnimal, nokoxtaw li tz'ak re li nimla na'ajej, juntaq'eet rik'in li xik' jun chik; nokoxk'ul rib' rik'in li xxik' li kerubín jun chik.

¹³ Eb' li kerubín a'in, helho li xxik'eb' ut oob' moqoj xnimal li roq. Xaqxookeb' li kerubín ut neke'ilok sa' xjayal li nimla na'ajej wan chisa'.

¹⁴ Kixyiib' ajwi' li chaab'il t'ikr moraad, q'an ut kaq xb'onol, rik'in liin, ut cho'q xsahob' ru kixk'e reetalileb' li kerubín chiru.

Li wiib' chi oqech

¹⁵ Chiru li Ochoch kixyiib' wiib' ninqi oqech, kach'in chik maa lajeeb' moqoj li roq li junjunq; ut eb' li xsahob' ru kixk'e sa' ru'ujeb' li oqech, aj numenaq jun moqoj xteram li junjunq.

¹⁶ Kixyiib' ajwi' kok' kareen, ut kixk'eheb' sa' xb'een li wiib' chi oqech. Chirix chik a'an kixyiib' o'k'aal chi granaad ut kixletz chiruheb' li kok' kareen.

¹⁷ Toja' naq kixxaqab' li wiib' chi oqech chiru li rochoch li Qaawa', jun sa' xnim ut li jun chik sa' xtz'e: Yakín kixk'e cho'q xk'ab'a' li oqech wank sa' xseeb'al, ut Bohás kixk'e cho'q xk'ab'a' li wank sa' xtz'e.